ރާއްޖޭގައި ހިންގާ އެންމެ ބޮޑު މަޝްރޫއު އީގަލް ހިލްސް އަށް ލިބުމަކީ ބޮޑު ފަހުރެއް ކަމަށާއި ދިވެހިންގެ އުއްމީދާ އެއްގޮތަށް މަސައްކަތް ކުރާނެ ކަމަށް އެކުންފުނީގެ ޗެއާމަން މުހައްމަދު އަލައްބާރު ވިދާޅުވެއްޖެއެވެ.

ރަސްމާލޭގައި ޔޫއޭއީގެ އީގަލް ހިލްސް ކުންފުނިން ހިންގުމަށް ހަމަޖެހިފައިވާ 20 ބިލިއަން ޑޮލަރުގެ ބިޔަ މަޝްރޫއުގެ ދަށުން ޒަމާނީ މެރީނާއަކާއި ދުނިޔޭގެ ފެންވަރުގެ ވޯޓަފްރަންޓް ސިޓީއެއް ތަރައްގީކުރުމަށް ވަނީ ނިންމައިފައެވެ. ދިވެހި ސަރުކާރާއި އީގަލް ހިލްސް ކުންފުންޏާ ދެމެދު ހެދި އެއްބަސްވުމުގައި ސޮއިކޮށްފައިވަނީ މިދިޔަ ހަފުތާގެ ހޯމަ ދުވަހު އަބޫދާބީގައެވެ.

އެ މަޝްރޫއާ ގުޅޭ ގޮތުން އަލައްބާރު އާޓިފިޝަލް އިންޓެލިޖެންސްގެ އެހީގައި ހަދާފައިވާ ވީޑިއޯއަކާ އެކު އިންސްްޓަގްރާމްގައި އާއްމުކުރެއްވި މެސެޖެއްގައި އަލައްބާރު ވިދާޅުވީ އެ މަޝްރޫއު ހިންގަން ލިބުމަކީ އޭނާގެ ކުންފުންޏަށް ލިބުނު ފަހުރެއް ކަމަށެވެ.

"ތާރީހުގައި އަންނަ އެންމެ ބޮޑު އިންވެސްޓްމެންޓާ އެކު ދިވެހިން އަޅުގަނޑުމެންނަށް އިތުބާރުކުރޭ. މިއީ އަޅުގަނޑުމެންނަށް ލިބޭ ޝަރަފެއް. ﷲ އިރާދަކުރެއްވިއްޔާ އެ މީހުންގެ އުއްމީދާ އެއްގޮތަށް އަޅުގަނޑުމެން މަަސައްކަތްކުރާނަން،" އަލައްބާރު ވިދާޅުވިއެވެ.

https://www.instagram.com/p/Dd0oHspNx4T/

އަލައްބާރު ވަނީ އެ މަޝްރޫއު ނިމުމުން ރަސްމާލެ އޮންނާނެ ގޮތް ތަސައްވުރުކޮށް ކިޔައިދެއްވައިފައެވެ. އެގޮތުން އެތަން ތަރައްގީ ކުރާނީ ހުރިހާ ހިދުމަތްތަކާއި ވަސީލަތްތަކާއި މީހުން ދިރިއުޅުމަށް ފުރިހަމަތަނެއްގެ ގޮތުގައި ކަމަށާއި އެތަނުގައި މީހުންނަށް މަހެއް ވަންދެން ނޫނީ ހަފުތާއެއް ވަންދެން ތިބެވޭނެ ކަމަށެވެ. އެ ތަނުގައި ރީތި ގޮނޑުދޮށްތައް ހުންނާނެ ކަމަށާއި ރެސްޓޯރެންޓްތަކާއި ހޮޓާތަކާއި ކުޅިވަރުކުޅޭނެ ތަންތަނާއި ކުޑަކުދިންނަށް ހާއްސަ ތަންތަން ވެސް ހުންނާނެ ކަމަށް އޭނާ ވިދާޅުވިއެވެ.

އޭނާ އިތުރަށް ވިދާޅުވީ އެތަނުން ޕްރޮޕަޓީއެއް ގަނެފި ނަމަ، ފައިދާގެ ގޮތުގައި ލިބޭނީ މުޅި ދުނިޔޭން ވެސް އެފަދަ ވިޔަފާރިއަކުން ލިބޭނެ އެންމެ ރަނގަޅު ފައިދާ ކަމަށެވެ.