ތައިލެންޑަށް ބޯކޮށް ވާރޭވެހި، ފެންބޮޑުވުމުގެ ހާދިސާގައި ލިބުނު ބޮޑެތި ގެއްލުންތަކާ ގުޅިގެން، އެގައުމުގެ ބޮޑުވަޒީރު އަނުތިން ޗާންވިރަކުލްއަށް، ރައީސް ޑރ. މުހައްމަދު މުއިއްޒު ތައުޒިޔާގެ މެސެޖެއް ފޮނުއްވައިފިއެވެ.

ރައީސް އޮފީހުން މިއަދު ބުނީ އެމަނިކުފާނުގެ މެސެޖުގައި، ތައިލެންޑުގައި ފެންބޮޑުވުމުގެ ސަބަބުން ގިނަ ބަޔަކު މަރުވެ، އެތައް ބައެއްގެ ގެދޮރު ގެއްލި، ބޮޑެތި ގެއްލުންތަކެއް ލިބުމާ ގުޅިގެން އެކަމުގެ ހިތާމައިގައި ބައިވެރިވެވަޑައިގަންނަވާ ކަމަށް ވިދާޅުވެފައިވާ ކަމަށެވެ.

ރައީސްގެ މެސެޖުގައި، ދިވެހި ސަރުކާރާއި ރައްޔިތުންގެ ނަމުގައި، ތައިލެންޑުގެ ބޮޑުވަޒީރަށާއި ސަރުކާރަށް އަދި އެ ގައުމުގެ ރައްޔިތުންނަށް، ހާއްސަކޮށް ކަރަންޓުގައި ޖެހުމާއި ގެނބުމުގެ ހާދިސާތަކުގައި، ފުރާނަ ގެއްލިދިޔަ ފަރާތްތަކުގެ އާއިލާތަކަށް ތައުޒިޔާ އަރިސްކުރައްވާފައިވާ ކަމަށް ރައީސް އޮފީހުން ބުންޏެވެ.

މީގެއިތުރުން، މި ހާދިސާގައި އަނިޔާވި ފަރާތްތަކަށް އަވަސް ޝިފާއަކަށް އެދިވަޑައިގެން، މިކާރިސާއިން އަރައިގަތުމަށްޓަކައި މިހާރު ކުރިއަށްދާ މަސައްކަތްތައް އެއްވެސް ހުރަހެއް ނެތި ކުރިއަށް ގޮސް، އެހީތެރިކަން ބޭނުންވާ ފަރާތްތަކަށް އަވަސް ތަސައްލީއެއް ލިބިގެންދާނެ ކަމަށް އުންމީދުކުރައްވާ ކަމަށް ވެސް އެމަނިކުފާނު ވިދާޅުވެފައިވެއެވެ.

ތައިލެންޑަށް ބޯކޮށް ވާރޭވެހި ފެންބޮޑުވުމާ ގުޅިގެން މިހާތަނަށް ވަނީ 8 މީހަކު މަރުވެފައެވެ. އެތައް ބައެއްގެ ދިރިއުޅުމަށް ވަނީ އަސަރުކޮށްފައެވެ. އެގޮތުން ތައިލޭންޑްގެ ވެރިރަށް ބެންކޮކް ނުލައި 27 ޕްރޮވިންސެއްގެ 500،000 އަށްވުރެ ގިނަ ގެޔަށް ގެއްލުން ވެ، 1.7 މިލިއަން މީހުންގެ ދިރިއުޅުމަށް އަސަރުކޮށްފައިވާ ކަމަށް އެގައުމުގެ ޑިޕާޓްމެންޓް އޮފް ޑިޒާސްޓާ އެންޑް މިޓިގޭޝަން ސެންޓަރުން ބުނެއެވެ.

ބެންކޮކްގެ 50،000 އަށްވުރެ ގިނަ ގެއަށް ގެއްލުން ވެފައިވާއިރު، އެ ސިޓީގެ ގަވަރުނަރު ޗަޑްޗާޓް ސިޓިޕުންޓް ވަނީ ބެންކޮކަކީ ކާރިސާގެ ހާލަތު މެދުވެރިވެފައިވާ ސަރަހައްދެއްގެ ގޮތުގައި ކަނޑައަޅުއްވައިފައެވެ.