މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ 40 ވަނަ އަހަރީ ދުވަސް ފާހަގަކުރުމަށް ބޭއްވި "ސްޓާފް ނައިޓް" ބާއްވައިފިއެވެ.
މިދިޔަ ހުކުރު ދުވަހުގެ ރޭ ހުޅުމާލޭގެ ފަރުކޮޅުފުށީގައި ބޭއްވި މި ހަފްލާ ޝަރަފުވެރިކޮށްދެއްވީ ފިނޭންސް މިނިސްޓަރު ހަސަން ޒަރީރެވެ. އަދި ހާއްސަ މެހެމާނެއްގެ ގޮތުގައި ހެލްތު މިނިސްޓަރު ގީލާ އަލީގެ އިތުރުން، އެމްޕީއެލްގެ ސީއީއޯ ކެޕްޓަން ހުސައިން ޝަފީގާއި ކުންފުނީގެ އިސްވެރިންނާއި ގިނަ އަދަދެއްގެ މުވައްޒަފުން ބައިވެރިވެވަޑައިގަތެވެ.
މި ރަސްމިއްޔާތުގައި ވާހަކަދައްކަވަމުން މިނިސްޓަރު ޒަރީރު ވިދާޅުވި ގޮތުގައި، އެމްޕީއެލުން އަދާކުރަނީ ހަމައެކަނި ވިޔަފާރި ކުންފުންޏެއްގެ ދައުރެއް ނޫނެވެ. އެއީ މުޅި ގައުމުގެ އިގުތިސާދީ ސަލާމަތާއި ރައްޔިތުންގެ ދިރިއުޅުމާ ސީދާ ގުޅިފައިވާ ގައުމީ ބޮޑު ހިދުމަތެއް ކަމަށް މިނިސްޓަރު ފާހަގަކުރެއްވިއެވެ.
މާލޭ ވިޔަފާރި ބަނދަރުގައި މި ވަގުތު ގިނަ ދަތިތަކެއް ހުރި ނަމަވެސް، ރޭގަނޑާއި ދުވާލު އަދި ވާރޭގައާއި އަވީގައި ގައުމަށް ބޭނުންވާ ކާބޯތަކެއްޗާއި މުދާ ހުއްޓުމެއްނެތް ގޮތެއްގައި ފޯރުކޮށްދިނުމަށް މުވައްޒަފުން ކުރަމުންދާ ބުރަ މަސައްކަތަށް އެމްޕީއެލްގެ ސީއީއޯ ޝަފީގު ވަނީ ޝުކުރު އަދާކުރައްވައިފައެވެ. މީގެ އިތުރުން، މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމުގެ ބޮޑު މަޝްރޫއު ފަށާފައިވާކަން ފާހަގަކުރައްވައި، އޭނާ ވިދާޅުވީ އެއީ މި ވަގުތު ބަނދަރަށް ދިމާވެފައިވާ ދަތިތައް ހައްލުވާނެ މަޝްރޫއެއް ކަމަށެވެ.
މި ހަފްލާގައި ވަނީ ފާއިތުވި އަހަރު ހަތަރު ކެޓަގަރީއަކުން އެންމެ ރަނގަޅު މުވައްޒަފުންނަށް އެވޯޑް ދީފައެވެ. އަދި 35 އަހަރަށް ވުރެ ދިގު މުއްދަތަކަށް ހިދުމަތްކޮށްފައިވާ މުވައްޒަފުންނަށާއި، ރިޓަޔާކޮށްފައިވާ މުވައްޒަފުންނަށް ހަނދާނީ ފިލާ ހަވާލުކޮށްފައިވެއެވެ. މީގެ އިތުރުން، އުމުރުން 20 އަހަރުގައި ގުރުއާން ހިތުދަސްކޮށް، ހާފިޒުކަމުގެ ސަނަދު ހާސިލްކޮށްފައިވާތީ، އެކަމުގެ އަގުވަޒަންކޮށް ހިތްވަރު ދިނުމުގެ ގޮތުން އެ ކުންފުނީގެ މުވައްޒަފެއް ކަމަށްވާ ހުސައިން ޒައިން އަލީއަށް ވަނީ ހާއްސަ އެވޯޑެއް ދީފައެވެ.
އެމްޕީއެލް 
އެމްޕީއެލް 
އެމްޕީއެލް 
އެމްޕީއެލް
ކޮމެންޓް