އުޒްބެކިސްތާނުގެ ސަމާކާންޑްގައި ކުރިއަށް ދިޔަ 46 ވަނަ އަހަރު އެފްއައިޑީއީ ޗެސް އޮލިމްޕިއާޑްގައި ރާއްޖޭގެ އަންހެން ޓީމުން ކެޓަގަރީ އީގެ ރަން މެޑަލް ހޯދައިފިއެވެ.

މިއީ މިހާތަނަށް ބާއްވަމުންދާ އެންމެ ބޮޑު ޗެސް އޮލިމްޕިއާޑެވެ. އެގޮތުން އަންހެން ޑިވިޝަނުގައިވެސް ޖުމުލަ 189 ޓީމަކުން ވާދަކޮށްފައިވެއެވެ. އަދި އޯޕަން ޑިވިޝަނުގައި ޖުމުލަ 205 ޓީމުން ވާދަކޮށްފައިވެއެވެ. ރާއްޖެ ހިމެނުނު ކެޓަގަރީ އީގައި ޓަންޒޭނިއާ، ކެމްބޯޑިއާގެ އިތުރުން ލާއޯސް، ލައިބީރިއާ، ކެމަރޫން، ބޫޓާން، ނައިގާ، ގްރެނާޑާ، ޖިބޫޓީ، ކޮންގޯ، މާލާވީ، އަންޓީގް އެންޑް ބާބުޑާ، ބްރިޓިޝް ވާޖިން އައިލެންޑްސް، ސައުތު ސޫދާން އަދި ސައު ޓޯމޭ އެންޑް ޕްރިންސިޕޭއާއި ޖަޕާން އަދި ޕާކިސްތާނު ފަދަ ގައުމުތައްވެސް ހިމެނެއެވެ.

ކެޓަގަރީ އީ އިން ރާއްޖޭގެ އަންހެން ޓީމުން ރަން މެޑަލް ހޯދި އިރު، އެޓީމުގައި ހިމެނެނީ ކެޕްޓަން އައިމިނަތު ޝިރުފާއާއި ވުމަންސް ކެނޑިޑޭޓް މާސްޓާ (ޑަބްލިއުސީއެމް) ގައި ހިމެނޭ ނިހާޔާ އަހުމަދު، މަރިޔަމް ލައިޝާ އަބްދުލް ރަޝީދު، އީނާ އަބްދުﷲ ހަސަން، އައިޝަތު އަލްޔާ މުހައްމަދު ޝަރީފް އަދި އައިޝަތު ނޯޔާ ޝަހުރުއްދީން ޝަރީފެވެ.

ރާއްޖޭން ކުޅުނު މެޗުތަކަށް ބަލާ އިރު، އެންމެ ރަނގަޅަށް ކުޅުނު އެއް ކުޅުންތެރިޔާ ނިހާޔާއެވެ. އޭނާ ވަނީ 11 މެޗުން ހަތް ޕޮއިންޓް ހޯދައިފައެވެ. ނިހާޔާ ވަނީ ހަ މެޗުން މޮޅުވެ، ދެމެޗުން އެއްވަރުވެސް ކޮށްފައެވެ. ނިހާޔާ ވަނީ ގުއާމްގެ ރަމާސް ކާމީނާ ޖޭސްމީނާއި ކޮންގޯގެ ކިސިޓާ ހަޓީއާއި ޕާކިސްތާނުގެ ޒެނޯބިއާ ވާސިފާއި މަލާވީގެ ޕިންގަންޖީރާ އެލެންވެސް ބަލިކޮށްފައެވެ.

އޭގެ އިތުރުން ލައިޝާވެސް 11 މެޗުން 5.5 ޕޮއިންޓް ހޯދި އިރު، އީނާވެސް ވަނީ 11 މެޗުން އެ އަދަދަށް ޕޮއިންޓް ހޯދައިފައެވެ.

މިފަހަރު މުބާރާތް ވެގެން ގޮސްފައި ވަނީ ރާއްޖެއަށް އިތުރު ކާމިޔާބީތައްވެސް ލިބިގެން ދިޔަ މުބާރާތަކަށެވެ. އެގޮތުން ލައިޝާއާއި އީނާއަށްވެސް ވަނީ ޑަބްލިއުސީއެމް ޓައިޓަލް ލިބިފައެވެ. އަދި ރާއްޖޭގެ މުހައްމަދު ޝުރާއު ވަނީ އޯޕަން ޑިވިޝަނުގައި ވާދަކޮށް، ގްރޭންޑްމާސްޓާއެއް ބަލިކޮށްފައެވެ. އެއީ މޮނާކޯގެ އީގޯ އެފިމޯވްއެވެ. އޯޕަން ސްކޮޑުގައި ރާއްޖޭން ޝުރާއުގެ އިތުރުން މުހައްމަދު ޝުއާއު، މުހައްމަދު ހަސަން އަދި އަބްދުލް ރަހްމާން އަލީއާއި އަހުމަދު އަބޫބަކުރާއި މުހައްމަދު ރާކިން ފަޔާޒް ވާދަކޮށްފައިވެއެވެ.