އާއިލާއަށް އިކުއިޓީ ލިބޭ ހާއްސަ ސްކީމެއް ވަރަށް އަވަހަށް ފެށިގެންދާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ރައީސް ވިދާޅުވީ 2028 ގެ މެއި، ޖޫން، ޖުލައި ހިސާބަށް ދާއިރު ވަރަށް ގިނަ އަދަދެއްގެ ހައުސިން ޔުނިޓްތަކަށް މީހުންނަށް ވަދެވި އަދި ވަރަށް ގިނަ ހައުސިން ޔުނިޓުތަކެއްގެ ސްޓްރަކްޗާ ނިމި، މީހުންނަށް ހަވާލުކުރެވި ރަޖިސްޓާ ކުރެވިފައި ހުންނާނެ ކަމަށެވެ އަދި ޖުމުލަ 15،000 އަށްވުރެ ގިނަ ހައުސިން ޔުނިޓުގެ މަސައްކަތް މާލެ ސަރަހައްދުގައި އެކަނިވެސް ކުރިއަށްދާނެ ކަމަށް އެމަނިކުފާނު ވިދާޅުވިއެވެ.

ބޯހިޔާވަހިކަމުގެ ވައުދު ފުއްދެނީ ހަމައެކަނި އިމާރާތްކުރާ ފްލެޓަކުން ނޫން ކަމަށާއި މިހާރުވެސް ބޭންކް އޮފް މޯލްޑިވްސް (ބީއެމްއެލް)ގެ ތެރެއިން ފަސް ޕަސަންޓުގެ އިސްލާމިކް ފައިނޭންސް ލޯން ވަރަށް ގިނަ ފަރާތްތަކަށް މިހާރުވެސް ދޫކުރެވިފައިވާ ކަމަށް އެމަނިކުފާނު ވިދާޅުވިއެވެ.

"އަނެއްކާ މިއަހަރު ފަހުކޮޅު އަޅުގަނޑުމެން މި ހުޅުވާލަނީ އިރާދަކުރެއްވިއްޔާ އެއަށްވުރެ މާ ފުޅާ ސްކީމެއް. އިކުއިޓީ ފައިނޭންސް އަޅުގަނޑުމެން ސަރުކާރުގެ މި ފަންޑުގެ ތެރެއިން ފޯރުކޮށްދިނުމުގެ ސްކީމެއް. އިކުއިޓީ ފައިނޭންސް މިދެނީ ކޮންމެ މީހަކަށް ވަކި އަދަދެއް. ހައުސިން މިނިސްޓަރ ކުރިއަށް އޮތްތާނގައި ޑީޓެއިލް ހިއްސާކުރައްވާނެ. އެހެންވީމަ، އާއިލާގެ ތެރޭގަ އެންމެން އެއްވެގެން، މިސާލަކަށް އެ ގޭގެ ފައިނޭންސަށް ބޭނުންވާ އިކުއިޓީއަށް ބޭނުންވާ ކޮމްޕޯނަންޓް ހަމަކުރުމަށް ސަރުކާރުން މިދެނީ އަނބުރާ ދައްކަން ނުޖެހޭ ވަކި އަދަދެއްގެ ފައިސާ،" އެމަނިކުފާނު ވިދާޅުވިއެވެ.

ރައީސް ވިދާޅުވީ އެ ސްކީމުގެ ދަށުން ސަރުކާރުން އެ ފައިސާ ހަމަޖައްސައިދިނުމުން މިހާރު ބޭންކުގައި ބަހައްޓަންޖެހޭ ފަސް ޕަސަންޓުގެ އިކުއިޓީ ހަމަކޮށްލެވޭނެ ކަމަށާއި އެހެންވުމުން ގެ ހެދޭނެ ކަމަށެވެ. އެހެންކަމުން ސަރުކާރުގެ ބޯހިޔާވަހިކަމުގެ ވައުދުގެ ތެރެއިން ހަމައެކަނި ފޯރުކޮށްދެވެނީ އިމާރާތްކޮށްފައިދޭ ފްލެޓެއް ނޫން ކަމަށް އެމަނިކުފާނު ވިދާޅުވިއެވެ.

އޭގެ އިތުރުން ސަރުކާރުން ބިން ދީގެން އަމިއްލަ ކުންފުނިތަކުން ހަދައި ދޫކުރާ ހައުސިން ޔުނިޓުތަކުގެ މަސައްކަތް ވެސް ކުރިއަށްދާނެ ކަމަށާއި އެގޮތަށް ދާދިފަހުން 500 ހައުސިން ޔުނިޓު ހެދުމަށް ބައެއް ފަރާތްތަކާ ހަވާލުކުރެވިފައިވާ ކަމަށް އެމަނިކުފާނު ވިދާޅުވިއެވެ.