ހުރިހާ ރައްޔިތުން ރިސޯޓު ހިއްސާދާރުންނަށް ހަދާ މަޝްރޫއު ނޮވެމްބަރު މަހުގެ ތެރޭގައި ފެށޭނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ރައީސް ވިދާޅުވީ ޓޫރިޒަމް ސެކްޓާއަކީ ވަކި ބައެއްގެ އަތްމަތީ އޮންނަންޖެހޭ އެއްޗެއް ނޫން ކަމަށެވެ.

އެހެންކަމުން ދިހަ ރިސޯޓެއް ތަރައްގީކޮށް އެ ރިސޯޓުތަކުގެ ޝެއާ ހޯލްޑަރުންނަކީ ހުރިހާ ދިވެހި ރައްޔިތުން ކަމުގައި ކަނޑައަޅައި ހުރިހާ ދިވެހި ރައްޔިތުންނަކީ ރިސޯޓު ޝެއާ ހޯލްޑަރުންގެ ގޮތުގައި ކަނޑައަޅައި ޑޮލަރު ލިބޭނެ ނިޒާމެއް ގާއިމުކުރައްވާނެކަން ރިޔާސީ ބަޔާނުގައި އިއުލާންކުރައްވާފައިވާނެ ކަމަށް އެމަނިކުފާނު ވިދާޅުވިއެވެ.

"މި މަސައްކަތް އެބަ ހިނގާ ވަރަށް ބާރަށް. މިހާރު ދިހަ ރިސޯޓު ގާއިމުކުރުމަށް މާލެ އަތޮޅާއި އެކި އަތޮޅުތަކުން ބިންތަކާ ފަޅުތަކާ ރަށްތައް ކަނޑައަޅައި މި ހަފްތާ ތެރޭގައި ނިމި، ދެން އަޅުގަނޑުމެން އޭގެ ދެން ހުރި މަސައްކަތްތަކަށް ގޮސް އިރާދަކުރެއްވިއްޔާ އުންމީދަކީ ނޮވެމްބަރު މަހުގެ ތެރޭގަ އަޅުގަނޑުމެންނަށް މީގެ ބައެއް މަޝްރޫއުތައް ފެށިގެންދާނެ،" އެމަނިކުފާނު ވިދާޅުވިއެވެ.

ރައީސް ވިދާޅުވީ ތިން އަހަރުގެ ތެރޭގައި މި ރިސޯޓުތައް އޮޕަރޭޝަނަށް ގެނެވޭނެ ކަމަށް އުންމީދުކުރައްވާ ކަމަށާއި މީގެ ނަތީޖާއަކަށް ވާނީ ކޮންމެ ދިވެހި ރައްޔިތަކީ ވެސް ރިސޯޓު ޝެއާ ހޯލްޑަރަކަށްވެ، ކޮންމެ މީހެއްގެ އެކައުންޓަށް ރިސޯޓުތައް ހުޅުވިގެން ދިޔައީމަ ޑޮލަރުން ފައިސާ ޖަމާވުން ކަމަށެވެ.