ބޮލީވުޑްގެ މަޝްހޫރު އެކްޓަރު އަކްޝޭ ކުމާރުގެ ކުރިއަށް އޮތް ސައިންސް ފިކްޝަން އެކްޝަން ތްރިލާ "ސަމުކް" ގެ ލީޑު ރޯލުން ބެންގާލީ ބަތަލާ ރުކްމިނީ މައިތްރާ ފެނިގެންދާނެ ކަމަށް މީޑިއާތަކުން ރިޕޯޓުކޮށްފިއެވެ. ވެރައިޓީ އިންޑިއާ އަދި ބޮކްސް އޮފީސް ވޯލްޑްވައިޑް ފަދަ މީޑިއާތަކުން ރިޕޯޓުކޮށްފައިވާ ގޮތުގައި، މި ފިލްމުގެ މުހިންމު ރޯލެއް ކުޅުމަށް ރުކްމިނީއާއެކު މިހާރު އަންނަނީ މަޝްވަރާކުރަމުންނެވެ.

ކަނިޝްކް ވަރްމާ ޑައިރެކްޓުކުރާ މި ފިލްމަކީ ވިޕުލް އަމްރުތުލާލް ޝާހު ޕްރޮޑިއުސްކުރާ ފިލްމެކެވެ. މި ފިލްމުގެ ޝޫޓިން މިހާރު އިނގިރޭސިވިލާތުގައި ކުރިއަށްދާއިރު، މިއީ އޭލިއަން އާއި ސަވައިވަލްގެ މައްޗަށް ބިނާކޮށް އުފައްދާ ބޮޑު ބަޖެޓެއްގެ ފިލްމެއް ކަމަށް ރިޕޯޓުތައް ބުނެއެވެ. ރުކްމިނީ މި ފިލްމާ ގުޅޭނެ ކަމަށް ގިނަ މީޑިއާތަކުން ރިޕޯޓުކޮށްފައިވީ ނަމަވެސް، ފިލްމުގެ ޕްރޮޑަކްޝަން ޓީމުން ނުވަތަ ރުކްމިނީގެ ފަރާތުން އަދި މިކަން ރަސްމީކޮށް ކަށަވަރުކޮށްދީފައެއް ނުވެއެވެ.

ބެންގާލީ ސިނަމާގައި ގިނަ ކާމިޔާބީތަކެއް ހޯދާފައިވާ ރުކްމިނީ އެންމެ ފުރަތަމަ ހިންދީ ފިލްމަކުން ފެނިފައިވަނީ 2021 ވަނަ އަހަރު ނުކުތް "ސަނަކް" އިންނެވެ. އެ ފިލްމަކީ ވެސް ކަނިޝްކް ވަރްމާ ޑައިރެކްޓުކޮށް، ވިޕުލް ޝާހު ޕްރޮޑިއުސްކުރި ފިލްމެކެވެ. އެހެންކަމުން "ސަމުކް" ވެގެންދާނީ ރުކްމިނީ ބޮލީވުޑްގައި ކުޅޭ ދެވަނަ ފިލްމަށެވެ. މީޑިއާތަކުން ރިޕޯޓުކޮށްފައިވާ ގޮތުގައި، ފިލްމު އުފައްދާ ފަރާތްތަކުން ބޭނުންވީ އަކްޝޭ ކުމާރާ ގުޅޭ ފަދަ ވަރުގަދަ އެކްޓިންއެއް ދެއްކޭނެ ބަތަލާއެކެވެ.

މި ފިލްމަކީ 2014 ވަނަ އަހަރު ނުކުތް "ހޮލިޑޭ: އަ ސޯލްޖާ އިޒް ނެވާ އޮފް ޑިއުޓީ" އަށްފަހު، 12 އަހަރުގެ މެދުކެނޑުމަކަށްފަހު އަކްޝޭ ކުމާރާއި ޕްރޮޑިއުސަރު ވިޕުލް ޝާހު އެކުގައި މަސައްކަތްކުރާ ފުރަތަމަ ފިލްމެވެ. މީގެ ކުރިން މި ދެ ފަންނާނުން ވަނީ "އާނކޭން" އާއި "ނަމަސްތޭ ލަންޑަން" ފަދަ ފިލްމުތަކުގައި އެކުގައި މަސައްކަތްކޮށްފައެވެ. ރިޕޯޓުތައް ބުނާ ގޮތުގައި "ސަމުކް" ސިނަމާތަކަށް ނެރުމަށް ހަމަޖެހިފައިވަނީ 2027 ވަނަ އަހަރުއެވެ.