މީގެ ހަތް އަހަރު ކުރިން، 20 މާޗް 2015 ގެ ރޭ ހިންގި މާރާމާރީއެއްގައި ލ. މުންޑޫ/ ނޫވިލު، އަލީ ޒިޔަދަމް މަރާލި މައްސަލައިގައި އެ ރަށު ހީނާވިލާ، މުހައްމަދު ޝަނޫން (24އ)ގެ މައްޗަށް މީހަކު މެރުގެ ހުކުމް ސާބިތުވެގެން އޭނާ މެރުމަށް ކުރިމިނަލް ކޯޓުން ކުރި ހުުކުމް ހައިކޯޓުން ދަމަހައްޓައިފިއެވެ.

ޒިޔަދަމްގެ މަރުގެ މައްސަލައިގައި ދެ މީހެއްގެ މައްޗަށް ދައުލަތުން ދައުވާ ކުރިއެވެ. ޝަނޫންގެ މައްޗަށް ތޫނުއެއްޗެއް ބޭނުންކޮށްގެން މީހަކު މެރުމުގެ ކުށުގެ ދައުވާ ކުރި އިރު، އެ މައްސަލައިގައި ދެން ހިމެނޭ ލ. މުންޑޫ ބީޗްވިލާ އަލީ ސިފާމް (25އ) ގެ މައްޗަށް ކޮށްފައިވަނީ ތޫނުއެއްޗެއް ބޭނުންކޮށްގެން ގަސްތުގައި މީހަކު މެރުމުގައި ބައިވެރިވުމުގެ ކުށުގެ ދައުވާއެވެ.

ޒިޔަދަމް މަރާލުމުގައި ޝަނޫން އެހީތެރިވެފައިވާކަމާއި ޒިޔަދަމްއާ މާރާމާރީ ހިންގުމުގެ އިތުރުން، އޭނާ މަރުވެގެންދިޔަ އަމަލުތައް ހިންގުމުގައި މަގުފަހިކޮށްދީފައިވާކަން ޝަރީއަތަށް ހުށައެޅިފައިވާ ހެކިތަކުން ސާބިތުވާތީ އޭނާގެ މައްޗަށް 25 އަހަރު ދުވަހުގެ ޖަލު ހުކުމެއް ކުރިމިނަލް ކޯޓުން ވަނީ އިއްވައިފައެވެ.

ކުރިމިނަލް ކޯޓުން ސިފާމްގެ މައްޗަށް ކުރި ހުކުމް އޭނާގެ ފަރާތުން ހައިކޯޓުގައި އިސްތިއުނާފު ކުރިއެވެ. މިދިޔަ ޖުލައި މަހުގެ 29 ގައި އެ ހުކުމްވެސް ހައިކޯޓުން ވަނީ ދަމަހައްޓަން ހުކުމްކޮށްފައެެވެ.

ނަމަވެސް ޝަނޫންގެ މައްޗަށް ކުރިމިނަލް ކޯޓުން ކުރި ހުކުމް އޭނާގެ ފަރާތުން ހައި ކޯޓުގައި އިސްތިއުނާފެއް ނުކުރެއެވެ. އެހެންކަމުން ޝަނޫނަށް ކުރި ހުކުމްގެ މައްސަލަ ޕްރޮސިކިއުޓާ ޖެނެރަލްގެ އޮފީހުން ހައިކޯޓަށް ހުށަހަޅާފައިވަނީ، މަރުގެ ހުކުމަކަށްވާތީ، މި ހުކުމް ތަންފީޒު ކުރެވޭނީ ޝަރުއީ ހުރިހާ މަރުހަލާއަކުން މި ހުކުމްގެ ސައްހަކަން ކަށަވަރުކޮށްގެން ކަމަށްވާތީއެވެ.

މި މައްސަލައިގައި ހިމެނޭ މާރާމާރީގައި ޒިޔަދަމްގެ ބޮލަށާއި ބުރަކަށީގެ އިތުރުން ފައިގެ ފަލަމަސްގަނޑަށް ތޫނު އެއްޗަކުން ހަމަލާދީފައިވާ އިރު، އޭނާ މުންޑޫ ހެލްތު ސެންޓަރަށް ގެންދިޔައިރުވެސް މަރުވެފައިވާ ކަމަށް އޭރު ފުލުހުން ވަނީ ބުނެފައެވެ. ޒިޔަދަމަށް ހަމަލާދިނީ ދައުވާ ލިބޭ ދެ މީހުންނާއި ޒިޔަދަމް ކެއްކި ބަނގުރާތަކެއް ބެހުމުގެ ތެރެއިން ޖެހުނު މައްސަލައަކާ ގުޅިގެން ކަމަށާއި މަރުވި ޒިޔަދަމަކީ ވައްކަމާއި މަސްތުވާތަކެތީގެ ކުށުގެ ރެކޯޑުވެސް އޮންނަ މީހެއް ކަމަށް ފުލުހުން ބުނެފައިވެއެވެ.