މޯލްޑިވްސް އިންލެންޑް ރެވެނިއު އޮތޯރިޓީ، "މީރާ" ގެ ކޮމިޝަނާ ޖެނެރަލް އޮފް ޓެކްސޭޝަންގެ މަގާމަށް ބޭފުޅަކު އައްޔަން ކުރެއްވުމަށްޓަކައި ދެ ބޭފުޅެއްގެ ނަން ރައީސުލްޖުމްހޫރިއްޔާ ޑރ. މުޙައްމަދު މުއިއްޒު މަޖިލީހަށް ފޮނުއްވައިފިއެވެ.

މިކަމާގުޅޭގޮތުން ރައްޔިތުންގެ މަޖިލީހަށް އެމަނިކުފާނު ފޮނުއްވި ސިޓީ ވަނީ މިއަދުގެ ޖަލްސާއަށް އިއްވައިފައެވެ.

އެ ސިޓީގައި ރައީސް ވިދާޅުވެފައިވަނީ، މީގެ ކުރިން ޓެކްސް ކޮމިޝަނަރަކަށް ހުންނެވި، މިހާރުގެ ފިނޭންސް މިނިސްޓަރު ހަސަން ޒަރީރު ޓެކްސް ކޮމިޝަނަރުކަމުގެ މަގާމުން އިސްތިއުފާ ދެއްވުމާ ގުޅިގެން، އެމަގާމަށް ކުރިމަތި ލެއްވުމަށް އާއްމުކޮށް އިއުލާން ކުރުމުން އެކަމަށް އިޖާބަ ދެއްވި ބޭފުޅުންގެ ތެރެއިން އެ މަނިކުފާނަށް ފެނިވަޑައިގަންނަވާ ދެބޭފުޅެއްގެ ނަމާއި އެބޭފުޅުންގެ މައުލޫމާތު މަޖިލީހަށް ފޮނުއްވާ ކަމަށެވެ.

ރައީސް މަޖިލީހަށް ފޮނުއްވި ދެބޭފުޅުން:

  • މުހައްމަދު ހަލީމް އަބްދުﷲ، ސާދާގެ / ހއ. ތަކަންދޫ
  • ފާތިމަތު އަމީޒާ، ކޯޒީ ރައުންޑް / ގދ. ގައްދޫ

އެހެންކަމުން އެ ދެބޭފުޅުންގެ ތެރެއިން، ކޮމިޝަނާ ޖެނެރަލް އޮފް ޓެކްސޭޝަންގެ މަގާމަށް އައްޔަން ކުރައްވާނެ ބޭފުޅެއްގެ ނަން މަޖިލީހުން ފާސްކޮށްދިނުމަށްވެސް އެދިވަދައިގެންފައިވެއެވެ.

އެ ދެބޭފުޅުންގެ ތެރެއިން، ހަލީމަކީ ޔުނިވަސިޓީ އޮފް ލަންޑަން އިން ޕްރޮފެޝަނަލް އެކައުންޓެންސީގެ ދާއިރާއިން މާސްޓާސް ޑިގްރީ ހާސިލުކުރައްވައި، އެކައުންޓިން ދާއިރާގައި ގިނަ ދުވަހުގެ ތަޖުރިބާހުރި ބޭފުޅެކެވެ. އޭނާ މިހާރު ހުންނެވީ އިންސްޓިޓިއުޓް އޮފް ޗާޓަރޑް އެކައުންޓެންޓްސް އޮފް ދަ މޯލްޑިވްސް، ސީއޭ މޯލްޑިވްސްގެ ރައީސްގެ މަގާމުގައެވެ.

އަމީޒާއަކީ އޮސްޓްރޭލިއާގެ މޮނާޝް ޔުނިވާސިޓީން އެކައުންޓިން ދާއިރާއިން މާސްޓާސް ޑިގްރީ ހާސިލުކުރައްވާފައިވާ ބޭފުޅެކެވެ. އޭނާ މިހާރު ހުންނެވީ މީރާގެ ޑެޕިއުޓީ ކޮމިޝަނާ ޖެނެރަލް އޮފް ޓެކްސޭޝަންގެ މަގާމުގައެވެ.

ޓެކްސް ކޮމިޝަނަރަކަށް ބޭފުޅަކު އައްޔަން ކުރެއްވުމަށް ރައީސުލްޖުމްހޫރިއްޔާ ފޮނުއްވި މައްސަލަ ދިރާސާކުރުމަށް އިގްތިސާދީ ކޮމިޓީއަށް މިއަދު ވަނީ ފޮނުވާފައެވެ.