ފިލްމު "ކޮކްޓެއިލް 2" ގައި އެކުގައި މަސައްކަތްކުރާ ބަތަލާ ކްރިތީ ސެނޯންއާ ދެމެދު މައްސަލަތަކެއް އުޅޭކަމަށް މީޑިއާގައި ދެކެވޭ ވާހަކަތައް، މަޝްހޫރު އެކްޓަރު ރަޝްމިކާ މަންދާނާ ދޮގުކޮށްފިއެވެ.

ވެރައިޓީ އިންޑިއާއަށް ދިން އިންޓަވިއުއެއްގައި ވާހަކަދައްކަމުން ރަޝްމިކާ ބުނީ، އެއް ފިލްމެއްގައި މަސައްކަތްކުރާ އަންހެން ތަރިންނަށް އެކުވެރިންގެ ގޮތުގައި ނުތިބެވޭނެކަމަށް ގަބޫލުކުރާ ގަބޫލުކުރުމަކީ ވަރަށް ބޯދާ ވިސްނުމެއް ކަމަށާއި، އެ ވިސްނުން މިހާރު ދޫކޮށްލަން ވެއްޖެ ކަމަށެވެ. އަދި ކްރިތީއާއެކު މަސައްކަތްކުރުމަކީ ވަރަށް ހާއްސަ ތަޖުރިބާއެއް ކަމަށާއި، މި ފިލްމުގެ ސަބަބުން އޭނާއަށް ވަރަށް ގާތް އެކުވެރިއެއް ލިބިފައިވާ ކަމަށްވެސް ރަޝްމިކާ ފާހަގަކުރިއެވެ.

“އަންހެނުން އެކަކު އަނެކަކަށް އެހީތެރިވެ ހިތްވަރުދޭނަމަ، ސެޓުމަތީގެ މާހައުލު ވަރަށް ފުރިހަމަވެގެންދާނެ،” ރަޝްމިކާ ބުނެފައިވެއެވެ. އޭނާ އިތުރަށް ބުނި ގޮތުގައި، ފިލްމުގެ ޝޫޓިން ކުރިއަށްދިޔައިރު ދެ ތަރިންގެ މެދުގައި އޮތީ ވާދަވެރިކަމެއް ނޫން ކަމަށާއި، އޭގެ ބަދަލުގައި ދެމީހުން އެކުގައި ކައިބޮއި، މަޖާކޮށް، އެކަކު އަނެކެއްގެ މަސައްކަތަށް ހިތްވަރުދީފައިވާ ކަމަށެވެ.

ޝާހިދު ކަޕޫރާއެކު ރަޝްމިކާ އަދި ކްރިތީ ލީޑު ރޯލުން ފެނިގެންދާ "ކޮކްޓެއިލް 2" އަކީ ހޯމީ އަދަޖާނިއާ ޑައިރެކްޓުކޮށްފައިވާ ރޮމޭންޓިކް ކޮމެޑީއެކެވެ. މި ފިލްމު ސިނަމާތަކަށް ނެރެފައިވަނީ މި މަހުގެ 19 ވަނަ ދުވަހުއެވެ. ފިލްމު ޕްރޮމޯޓުކުރުމުގެ މަސައްކަތްތަކުގައިވެސް ރަޝްމިކާ އަދި ކްރިތީގެ ގާތްކަން ފެނިފައިވާއިރު، ދާދި ފަހުން ޕޫނޭގައި ބޭއްވި އިވެންޓެއްގައި އާންމުންގެ ތެރެއިން ރަޝްމިކާ ރައްކާތެރިކުރުމަށް ކްރިތީ އެހީތެރިވެދިން މަންޒަރު ފެންނަ ވީޑިއޯއެއްވެސް ވަނީ ސޯޝަލް މީޑިއާގައި އާންމުވެފައެވެ.