ބޮލީވުޑްގެ ކާމިޔާބު ފިލްމު "ތާރޭ ޒަމީން ޕަރް" ގައި އިޝާންގެ ދޮންބެ، ޔޯހާން އަވަސްތީގެ ރޯލު ކުޅުނު ކުޑަކުއްޖާ، ސަޗޭތު އިންޖިނިއަރ އިނގިރޭސިވިލާތުގައި މަސައްކަތްކުރާ ކާމިޔާބު ދަތުގެ ޑޮކްޓަރަކަށް ވެއްޖެއެވެ. އާމިރް ހާން ޑައިރެކްޓުކޮށް 2007 ވަނަ އަހަރު ނެރުނު މި ފިލްމުގައި ސަޗޭތު ފެނިގެންދިޔައީ ކިޔެވުމަށް މޮޅު، އަދި ކޮއްކޮދެކެ ނުހަނު ލޯބިވާ ކުއްޖެއްގެ ގޮތުގައެވެ. ފިލްމުން ލިބުނު ބޮޑު މަގުބޫލުކަމާއެކުވެސް، އޭނާ ވަނީ ފިލްމީ ދާއިރާ ދޫކޮށްލައި، ސިއްހީ ދާއިރާއިން ކުރިއަށް ދިއުމަށް ނިންމައިފައެވެ.\

ދާދި ފަހުން ސޯޝަލް މީޑިއާގައި އޭނާގެ މި ކާމިޔާބީގެ ވާހަކަތައް އާންމުވެފައިވާއިރު، ގިނަ ބަޔަކު އަންނަނީ އޭނާގެ މި ބަދަލަށް ތައުރީފުކުރަމުންނެވެ. ބައެއް މީހުން ސަމާސާކޮށް ބުނެފައިވާ ގޮތުގައި އޭނާ ދަތުގެ ޑޮކްޓަރަކަށް ވީ ފިލްމުގައި އުޅޭ އޭނާގެ ކޮއްކޮ އިޝާންގެ ދަތްތައް ރަނގަޅުކޮށްދިނުމަށެވެ.

ސަޗޭތުގެ ތައުލީމީ ހަޔާތަށް ބަލާއިރު، އޭނާ ވަނީ އިންޑިއާގެ ޑީވައި ޕާޓިލް ޔުނިވަސިޓީން ދަތުގެ ފަރުވާގެ ދާއިރާއިން ޑިގްރީ ހާސިލުކޮށްފައެވެ. އަދި އެ ޔުނިވަސިޓީން އޭނާ ވަނީ ޕީރިއޮޑޮންޓޮލޮޖީގެ ރޮނގުން ރަން މެޑަލް ހާސިލުކޮށް، ތައުލީމީ ގޮތުން ބޮޑު ކާމިޔާބީއެއް ހޯދާފައެވެ. އޭގެ ފަހުން އިނގިރޭސިވިލާތަށް ބަދަލުވެ، ދުނިޔޭގެ އެންމެ މަޝްހޫރު އެއް ޑެންޓަލް އިންސްޓިޓިއުޓް ކަމަށްވާ ލަންޑަންގެ ޔޫސީއެލް އީސްޓްމަން ޑެންޓަލް އިންސްޓިޓިއުޓުން މާސްޓާސް އިން ކްލިނިކަލް ޑެންޓިސްޓްރީ (އެމް.ކްލިން.ޑެންޓް) ފުރިހަމަކުރިއެވެ. މީގެ އިތުރުން، އިނގިރޭސިވިލާތުގައި ޑޮކްޓަރެއްގެ ގޮތުގައި މަސައްކަތްކުރުމަށް ފުރިހަމަކުރާން ޖެހޭ އޯވަސީސް ރެޖިސްޓްރޭޝަން އެގްޒެމިނޭޝަން (އޯއާރްއީ) ގެ ދެ ބައި ފުރިހަމަކޮށް، އޭނާ މިހާރު އަންނަނީ ޔޫރަޕިއަން ފެޑެރޭޝަން އޮފް ޕީރިއޮޑޮންޓޮލޮޖީގެ ރަޖިސްޓަރީވެފައިވާ މެންބަރެއްގެ ގޮތުގައި އިނގިރޭސިވިލާތުގައި ހިދުމަތް ދެމުންނެވެ.

ދަތުގެ ފަރުވާގެ ދާއިރާގެ އިތުރުން، ސަޗޭތު އަންނަނީ ޕައިލެޓަކަށް ވުމުގެ ހުވަފެންވެސް ހަގީގަތަކަށް ހެދުމަށް މަސައްކަތްކުރަމުންނެވެ. އޭނާގެ އިންސްޓަގްރާމް އެކައުންޓު ޕްރައިވެޓްކޮށްފައި އޮތް ނަމަވެސް، ލިންކްޑްއިން މެދުވެރިކޮށް އޭނާގެ ޕްރޮފެޝަނަލް މަސައްކަތްތައް އާންމުކުރެއެވެ. 2024 ވަނަ އަހަރު އޭނާ ވަނީ މަތިންދާބޯޓެއްގެ ކޮކްޕިޓުގައި އިންދައި ނަގާފައިވާ ފޮޓޯއެއް އިންސްޓަގްރާމްގައި ހިއްސާކޮށްފައެވެ. އެ ފޮޓޯއާއެކު އޭނާ ލިޔެފައިވާ ގޮތުގައި، މަތީގައި އުދުހެމުންދާއިރު ކޮންޓްރޯލް އަތުގައި އޮތުމުން، ތިރީގައި ހުންނަ ބޮޑެތި ގޮންޖެހުންތައް ކުޑަވެގެންދާ ކަމުގެ އިހުސާސް ކުރެވެއެވެ. އަދި މިއީ އޭނާގެ ފުރަތަމަ އުދުހުން ކަމަށާއި، ނަމަވެސް މިއީ އެންމެ ފަހު ފަހަރު ނޫންކަން އޭނާ ފާހަގަކުރިއެވެ. މިކަމުން ދައްކައިދެނީ އޭނާގެ އަމާޒުތައް ހަމައެކަނި ސިއްހީ ދާއިރާއަށް ހުއްޓިފައި ނެތް ކަމެވެ.

"ތާރޭ ޒަމީން ޕަރް" ގައި މަސައްކަތްކުރި ދުވަސްވަރުގެ ހަނދާންތައް އާކުރަމުން، 2022 ވަނަ އަހަރު ބޮލީވުޑް ހަންގާމާއަށް ދިން އިންޓަވިއުއެއްގައި ސަޗޭތު ބުނި ގޮތުގައި، އެ ފިލްމުން އޭނާއަށް ފުރުސަތު ލިބުނީ އިއްތިފާގަކުންނެވެ. އޭނާގެ މާމަ ކްރިޝްނާ ކުމާރީ ސޭތު އަކީ ބަތަލާއެއް ކަމަށާއި، ކާފަ ސޫރަޖް ޕްރަކާޝް އަކީ ޕްރޮޑިއުސަރެއް ކަމަށްވިޔަސް، އޭނާ އެކްޓުކުރުމުގެ ވިސްނުމެއް ނުގެންގުޅެއެވެ. ފިލްމުގެ އޮޑިޝަނަށް ދިޔައީ އޭނާގެ ކޮއްކޮ ކަމަށާއި، އެތަނުގައި ހުރުމުން އޭނާއަށްވެސް އޮޑިޝަންގައި ބައިވެރިވުމަށް އެންގީ ކަމަށް ސަޗޭތު ބުންޏެވެ.

ފިލްމުގެ ޝޫޓިން ކުރިއަށްދިޔައިރު އޭނާއާއި ދަރްޝީލް ސަފާރީ އުޅުނީ ވަރަށް މަޖާކޮށެވެ. އެއީ ކުޑަކުދިން ކަމަށްވުމުން، މީހުން އުންމީދުކުރި ވަރަށްވުރެ ސީރިއަސްކަން ކުޑަކޮށް އުޅެވުނު ކަމަށް އޭނާ ބުންޏެވެ. ނަމަވެސް، އާމިރް ހާން ވަކި މަންޒަރެއް ނަގަން ބޭނުންވުމުން، އެ ކުދިން އެ މޫޑަށް ގެނައުމަށްޓަކައި އެހެން މީހުންނާ ވާހަކަދެއްކުން މަނާކުރާ ކަމަށާއި، އޭގެ ސަބަބުން އާމިރް ހާން ބޭނުންވި ފެންވަރަށް އެކްޓުކުރަން ފަސޭހަވި ކަމަށް ސަޗޭތު ފާހަގަކުރިއެވެ.

ޑިސްލެކްސިއާ ހުންނަ ކުއްޖެއްގެ ދިރިއުޅުން ދައްކުވައިދޭ މި ސައިކޮލޮޖިކަލް ޑްރާމާއަކީ އާމިރް ހާންގެ ކެރިއަރުގައިވެސް އުފެއްދި އެންމެ ކާމިޔާބު އެއް ފިލްމެވެ. ފިލްމުގައި ދައްކުވައިދެނީ އުމުރުން 8 އަހަރުގެ އިޝާންއަށް ކިޔެވުމުގައި ދިމާވާ އުނދަގޫތައް އޭނާގެ މައިންބަފައިންނަށް ނުވިސްނި، ހަރުކަށި ބޯޑިން ސްކޫލަކަށް ފޮނުވާލާ މަންޒަރެވެ. އެތަނުން އޭނާއާ ބައްދަލުވާ އާޓް ޓީޗަރެއްގެ އެހީގައި އިޝާން އޭނާގެ ހުނަރުތައް ކުރިއަރުވައެވެ.

މި ފިލްމުގައި އިޝާންގެ ރޯލު ކުޅުނު ދަރްޝީލް ފިލްމީ ދާއިރާގައި ދެމިހުރި ނަމަވެސް، ސަޗޭތު ވަނީ އޭނާ ކުޅުނު ޔޯހާންގެ ކެރެކްޓަރާ އެއްގޮތަށް ތައުލީމީ ރޮނގުން ބޮޑެތި ކާމިޔާބީތަކެއް ހޯދާފައެވެ. އޭނާ މިހާރު އަންނަނީ އިނގިރޭސިވިލާތުގެ ސިއްހީ ދާއިރާގައި ހިދުމަތްކުރަމުން، ޕައިލެޓަކަށް ވުމުގެ ތަމްރީނުތައްވެސް ފުރިހަމަކުރަމުންނެވެ.