އެކުވެރި އަރަބި އިމާރާތް (ޔުނައިޓެޑް އަރަބް އެމިރޭޓްސް - ޔޫއޭއީ) ގެ ރައީސްގެ ޑިޕްލޮމެޓިކް އެޑްވައިޒަރު ޑރ. އަންވަރު ގަރްގާޝް، ގަލްފު ސަރަހައްދުގެ ސަލާމަތާއި ހަމަޖެހުން ގާއިމުކުރުމުގެ މުހިންމުކަމާ ގުޅޭގޮތުން ވާހަކަދައްކަވައިފިއެވެ. އޭނާ ވިދާޅުވި ގޮތުގައި، މެދުއިރުމަތީގެ ސަރަހައްދީ ހަމަޖެހުމަކީ ދެމެހެއްޓެނިވި ތަރައްގީއާއި ގުޅިފައިވާ އިގުތިސޯދީ ކުރިއެރުމަށް ކޮންމެހެން ބޭނުންވާ އަސާސެކެވެ.

ސޯޝަލް މީޑިއާ ޕްލެޓްފޯމް އެކްސްގައި ކުރެއްވި ޕޯސްޓެއްގައި ގަރްގާޝް ވިދާޅުވީ، ކުރިއަށް އޮތް ތަނުގައި ކުރިމަތިވެދާނެ ގޮންޖެހުންތަކާ ކުރިމަތިލުމަށްޓަކައި ތިން ކަމަކަށް ޔޫއޭއީން އިސްކަންދޭ ކަމަށެވެ. އެއީ ހަރުދަނާ ޑިޕްލޮމެސީއާއި، ވަރުގަދަ އިގުތިސޯދީ ގުޅުންތަކުގެ އިތުރުން، ގާބިލު އަދި އިތުބާރު ހުރި ދިފާއީ ނިޒާމެއް ގާއިމުކުރުން ކަމަށް އޭނާ ފާހަގަކުރެއްވިއެވެ. މީގެ އިތުރުން، ގަލްފުގެ ގައުމުތަކަށް އަމާޒުކޮށް ދެމުންދާ ހަމަލާތަކަށް އިޝާރާތްކުރައްވައި އޭނާ ވިދާޅުވީ، ޔޫއޭއީގެ އަމާޒަކީ ހަމައެކަނި ވަގުތީ ގޮތުން ހަމަލާތައް މެދުކަނޑާލުން ނޫން ކަމަށާއި، އޭގެ ބަދަލުގައި ދާއިމީ ސަލާމަތްތެރިކަން ކަށަވަރުކޮށްދޭނެ ހައްލުތަކެއް ހޯދުން ކަމަށެވެ.

މި ދަނޑިވަޅަކީ މެދުއިރުމަތީގައި އީރާނާއި އެމެރިކާ އަދި އިސްރާއީލާ ދެމެދު އުފެދިފައިވާ ނުތަނަވަސްކަން ބޮޑުވެ، ސަރަހައްދީ ސަލާމަތަށް ނުރައްކާވެފައިވާ ވަގުތެކެވެ.

ގަލްފު ކޯޕަރޭޝަން ކައުންސިލް (ޖީސީސީ) ގެ ގައުމުތަކުގެ ސަލާމަތީ ވިސްނުމަށް ބަދަލުތަކެއް އަންނަމުންދާކަން ފާހަގަކުރައްވައި، ގަރްގާޝް ވިދާޅުވީ، ނިއުކްލިއަރ ނުރައްކާތަކާއި، މިސައިލާއި ޑްރޯންގެ ނުރައްކާތަކުގެ އިތުރުން ކަނޑުއޮޅިތަކުގެ ސަލާމަތަށް ހުރި ހުރަސްތައް ނައްތާލަން ޖެހޭ ކަމަށެވެ. އަދި ސަރަހައްދީ ހަމަޖެހުން ގާއިމުކުރުމަށްޓަކައި ސިޔާސީ މަޝްވަރާތަކަށް ޔޫއޭއީން އަބަދުވެސް އިސްކަންދޭނެކަން އޭނާ ވަނީ ތަކުރާރުކުރައްވާފައެވެ.