މައިކަލް ޖެކްސަންގެ މައްޗަށް 2005 ވަނަ އަހަރު ކުރެވުނު ކުޑަކުދީންނަށް ޖިންސީ ގޯނާކުރުމުގެ ތުހުމަތުތަކުގެ ޝަރީއަތަށް އަލިއަޅުވާލައި، ނެޓްފްލިކްސްއިން “މައިކަލް ޖެކްސަން: ދަ ވާޑިކްޓް” ގެ ނަމުގައި އާ ޑޮކިއުމެންޓްރީ ސީރީޒެއް ނެރެފިއެވެ.

ތިން ބަޔަކަށް ބަހާލައިގެން އިއްޔެ ނެރުނު މި ސީރީޒްގައި، ކެލިފޯނިއާގެ ސެންޓާ ބާބަރާ ސުޕީރިއާ ކޯޓުގައި 14 ހަފުތާއަށް ކުރިއަށްދިޔަ ޝަރީއަތުގެ ކަންކަން ވަނީ އަލުން ދިރާސާކޮށްފައެވެ. އުމުރުން 13 އަހަރުގެ ގެވިން އާވިޒޯއަށް ޖިންސީ ގޯނާކުރި ކަމުގެ ތުހުމަތުގައި ކުރިއަށްދިޔަ މި ޝަރީއަތަކީ މުޅި ދުނިޔޭގެ ސަމާލުކަން ލިބުނު މައްސަލައެކެވެ.

މި ޑޮކިއުމެންޓްރީގައި ޝަރީއަތުގައި ބައިވެރިވި މުހިންމު ފަރާތްތަކުގެ އިންޓަވިއުތައް ހިމަނާފައިވެއެވެ. އޭގެ ތެރޭގައި ދައުވާކުރާ ފަރާތުގެ ވަކީލު ރޮން ޒޯނެން އާއި ދިފާއީ ވަކީލު މާކް ޖެރަގޯސްގެ އިތުރުން، ޖޫރީންނާއި ނޫސްވެރިން ހިމެނެއެވެ. ޖެކްސަންގެ ކުރީގެ އެސޯސިއޭޓެއް ކަމަށްވާ ވިންސެންޓް އާމެން ބުނި ގޮތުގައި، ޖެކްސަން ވަނީ އޭނާއާއެކު ވަގުތު ހޭދަކުރި ކުޑަކުދިންނަށް ނިސްބަތްކޮށް ބޭއަދަބީ ނަންތައް ކިޔާފައެވެ. އަދި ނެވާލޭންޑް ރޭންޗުގައި ނަގާފައިވާ ބައެއް ފޮޓޯތަކާ ގުޅޭ އާ ތުހުމަތުތަކެއްވެސް އޭނާ ވަނީ ފާހަގަކޮށްފައެވެ. ނަމަވެސް މި ތުހުމަތުތަކަކީ މިނިވަން ފަރާތަކުން ކަށަވަރުކޮށްފައިވާ ކަންކަމެއް ނޫން ކަމަށް ރިޕޯޓުތައް ބުނެއެވެ. މީގެ އިތުރުން، ޝަރީއަތުގެ ދުވަސްވަރު ޖެކްސަންގެ ސިއްހީ ހާލަތު ވަރަށް ބޮޑަށް ދަށްވެގެންދިޔަ ކަމަށް ދިފާއީ ވަކީލުން ފާހަގަކުރި ގޮތްވެސް މި ސީރީޒްގައި ގެނެސްދީފައިވެއެވެ.

މި މައްސަލައިގައި ހިމެނޭ 10 ދައުވާއިންވެސް ޖެކްސަން ސަލާމަތްވި ނަމަވެސް، މިއަދާ ހަމައަށްވެސް މިކަމާ ގުޅޭގޮތުން ބަހުސްތައް ކުރެވެމުންދެއެވެ. ޑޮކިއުމެންޓްރީ އުފެއްދި ފަރާތްތަކުން ބުނި ގޮތުގައި، ކޯޓަށް ކެމެރާ ވެއްދުން މަނާކޮށްފައި އޮތުމުން، އޭރު އާންމުންނަށް މައުލޫމާތު ލިބުނީ ވަރަށް އުނިކޮށެވެ. އެހެންކަމުން މި ސީރީޒްގެ ބޭނުމަކީ ޝަރީއަތުގެ ކަންކަން ހިނގައިދިޔަ ގޮތް ސާފުކޮށްދިނުމެވެ.

ނަމަވެސް ބައެއް ފާޑުކިޔުންތެރިން ފާހަގަކުރާ ގޮތުގައި، މި ޑޮކިއުމެންޓްރީން މާ ބޮޑު އާ މައުލޫމާތުތަކެއް ނުލިބެއެވެ. މިއީ ދާދި ފަހުން ނެރުނު ޖެކްސަންގެ ބަޔޮޕިކް ފިލްމު “މައިކަލް” އަށް ލިބުނު ތަރުހީބުގެ ފައިދާ ނެގުމަށް އުފެއްދި އެއްޗެއް ކަމަށް ބެލެވޭ ކަމަށްވެސް ބައެއް ރިވިއުތަކުގައި ބުނެފައިވެއެވެ. ޑައިރެކްޓަރު ނިކް ގްރީން އުފައްދާފައިވާ މި ސީރީޒް މައިގަނޑު ގޮތެއްގައި ބިނާކޮށްފައިވަނީ ކޯޓުގައި ހުށަހެޅުނު ހެކިތަކާއި ހެކިވެރިންގެ ބަޔާންތަކުގެ މައްޗަށެވެ.