ނެޓްފްލިކްސްގެ ރިއަލިޓީ ޝޯ "ލޮކް އަޕް: ސަޗް ޔާ ސަޒާ" ގެ ދެވަނަ ސީޒަނެއް ގެނެސްދޭން ނިންމައި، އެކަން ރަސްމީކޮށް އިއުލާންކޮށްފިއެވެ.

މި ޝޯގެ ދެވަނަ ސީޒަން އިއުލާންކޮށްފައިވަނީ ނެޓްފްލިކްސް އިން ސޯޝަލް މީޑިއާގައި އާންމުކުރި ޕޯސްޓެއްގައެވެ. މި ޕޯސްޓާއެކު، ޝޯގެ ޕްރޮޑިއުސަރު އެކްތާ ކަޕޫރު ވަނީ ފުރަތަމަ ސީޒަނެކޭ އެއްގޮތަށް ދެވަނަ ސީޒަނުގައި ވެސް ޝޯ ހުށަހަޅައިދޭނީ ފަރާ ހާން އާއި ރިތޭޝް ދޭޝްމުކް ކަން ކަށަވަރުކޮށްދީފައެވެ.

އެކްތާ ކަޕޫރު ބުނި ގޮތުގައި، ކުރިއަށް އޮތް ސީޒަނުން ބެލުންތެރިންނަށް މުޅިން އާ ވާހަކަތަކަކާއި، އާ ބައިވެރިންތަކެއްގެ އިތުރުން ގިނަ ސަޕްރައިޒްތަކެއް ފެންނާނެއެވެ. ފަރާ އާއި ރިތޭޝް ޖެއިލަރުންގެ ގޮތުގައި އެނބުރި އައިސް، އެ މީހުންގެ ހަކަތައާއި ތަފާތު ހުށަހެޅުންތައް ޝޯއަށް ގެނެސްދޭނެ ކަމަށް އޭނާ ފާހަގަކުރިއެވެ.

މި ޝޯ ޕްރޮޑިއުސްކުރަނީ އެކްތާ ކަޕޫރާއި، ޝޯބާ ކަޕޫރުގެ އިތުރުން މަނީޝާ ޝަރްމާ އެވެ.

ނެޓްފްލިކްސް އިންޑިއާގެ ވައިސް ޕްރެޒިޑެންޓް އޮފް ކޮންޓެންޓް މޮނިކާ ޝަރްގިލް ވިދާޅުވި ގޮތުގައި، ދެވަނަ ސީޒަނުގެ އަމާޒަކީ ފުރަތަމަ ސީޒަނުން ލިބުނު ކާމިޔާބީ ތަކުރާރުކޮށް، ބެލުންތެރިންނަށް އާ ކަންތައްތަކެއް ގެނެސްދިނުމެވެ. މޮނިކާ އިތުރަށް ވިދާޅުވި ގޮތުގައި، މި ޝޯއަކީ ހަމައެކަނި މުނިފޫހިފިލުވުމުގެ އިތުރުން، ފަންނާނުން އާންމުކޮށް ނުދައްކާ ވާހަކަތައް ހިއްސާކުރާ ޕްލެޓްފޯމެކެވެ.

ޖަލެއްގެ ތީމަށް ކުރިއަށްގެންދާ މި ޝޯގެ ފޯމެޓަށް ބަދަލެއް ނުގެނެސް، ކުރިއެކޭ އެއްގޮތަށް ބައިވެރިން އެކި ޓާސްކުތައް ފުރިހަމަކުރަން ޖެހޭނެއެވެ. ޝޯގެ ތެރެއިން ބައިވެރިންގެ ޒާތީ ދިރިއުޅުމުގެ ކަންކަމާ ގުޅޭގޮތުން ސުވާލުކުރެވޭނެއެވެ. ނަމަވެސް، ދެވަނަ ސީޒަނުގައި ބައިވެރިވާ ފަންނާނުންގެ ނަންތަކާއި، ޝޯ ޕްރިމިއާ ކުރާނެ ވަކި ތާރީހެއް އަދި ރަސްމީކޮށް އިއުލާންކޮށްފައެއް ނުވެއެވެ. ޝޯގެ ފުރަތަމަ ސީޒަން ކާމިޔާބުކުރީ ޝްރެޔާ ކަލްރާއެވެ.