މިއަހަރުގެ ހައްޖުގެ މަތިވެރި އަޅުކަން އަދާކުރުމަށް ސައުދީ އަރަބިއްޔާއަށް ގޮސް ތިބި ދިވެހި ހައްޖުވެރިންގެ ތެރެއިން އެކަކު ފިޔަވައި އެހެން ހުރިހާ އެންމެން ހައްޖުގެ އެންމެ މުހިންމު ރުކުން ކަމުގައިވާ އަރަފާތު ބިމަށް ގޮސްފައިވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

މިނިސްޓަރު ޝަހީމް މީޑިއާތަކަށް މިއަދު ވިދާޅުވީ ދިވެހި ހުރިހާ ހައްޖުވެރިންގެ ހާލުވެސް އާންމު ގޮތެއްގައި ރަނގަޅު ކަމަށާއި، އަޅުކަމުގެ ކަންކަން ކުރިއަށްދަނީ ރޭވިފައިވާ ގޮތަށް ކަމަށެވެ.

އަރަފާތު ބިމުގައި މަޑުކުރުމަކީ ހައްޖުގެ އެންމެ މައިގަނޑު އަޅުކަމަށްވާ އިރު، ދިވެހި ކޭމްޕުތަކުގައި ހައްޖުވެރިންނަށް ބޭނުންވާނެ ކެއިންބުއިމާއި، ސިއްހީ ފަރުވާގެ އިންތިޒާމުތައް ވަނީ ދުރާލައި ހަމަޖައްސައިފައެވެ. މިއަހަރު ރާއްޖެއިން ހައްޖަށް ދިޔަ މީހުންގެ ކަންކަން ބެލެހެއްޓުމަށް ދިވެހި ސަރުކާރުގެ ފަރާތުން ހާއްސަ އިސްކަމެއްދީގެން ގިނަ މަސައްކަތްތަކެއް ދަނީ ކުރަމުންނެވެ.

"އެންމެ ހާޖީއެއް ފިޔަވައި ދިވެހި ހާޖީން ވަނީ އަރަފާތަށް ވަދެފަ. އެއް ހާޖީއަކު މިނާގެ ހޮސްޕިޓަލްގައި އެޑްމިޓްކުރެވި ފަރުވާއެއް ދެވެމުންދަނީ އިންޝާ ﷲ އެބޭފުޅާވެސް އަރަފާތަށް ގެންދެވޭނެ. ހައްޖު ކޯޕަރޭޝަންގެ އެހީތެރިން ދަނީ އެބޭފުޅާއެކު ހަރަކާތްތެރިވެ އެހީތެރިވަމުން. ހުރިހާކަމެއް ވެސް ރަނގަޅު. އަލްހަމްދު ލި ﷲ،" މިނިސްޓަރު ވިދާޅުވިއެވެ.

މޯލްޑިވްސް ހައްޖު ކޯޕަރޭޝަންގެ ފަރާތުން ހައްޖުވެރިންނަށް އެހީތެރިވުމަށް ގޮސް ތިބި ހާއްސަ ޓީމުގެ މެމްބަރުންނާއި ދިވެހި މެޑިކަލް މިޝަންގެ ޑޮކްޓަރުން ހޮސްޕިޓަލުގައި އެޑްމިޓްކޮށްފައިވާ މީހާއާއެކު ހަރަކާތްތެރިވަމުންދާ ކަމަށް މައުލޫމާތު ލިބެއެވެ. ހައްޖުގެ އަޅުކަން ފުރިހަމަވާނީ އަރަފާތު ބިމަށް ހާޒިރުވެގެން ކަމަށްވާތީ، ބަލިމީހުންވެސް އެމްބިއުލާންސްގައި ނުވަތަ ހާއްސަ އިންތިޒާމުތަކެއްގެ ދަށުން އަރަފާތަށް ގެންދިއުމަކީ ސައުދީ ސަރުކާރުން ކޮންމެ އަހަރަކުވެސް ކުރަމުން އަންނަ ކަމެކެވެ. އެހެންކަމުން، ދިވެހި ހައްޖުވެރިޔާވެސް ވަގުތު ފާއިތުވުމުގެ ކުރިން އަރަފާތަށް ގެންދެވޭނެ ކަމުގެ ޔަގީންކަން ކަމާބެހޭ ފަރާތްތަކުން ވަނީ ދީފައެވެ.

މިއަހަރު ރާއްޖެއިން ހައްޖަށް ދިޔަ މީހުންގެ ކަންކަން ސަރުކާރުން ވަރަށް ގާތުން ބަލަމުންދާ އިރު، ހައްޖު ކޯޕަރޭޝަންގެ އިތުރުން ދިވެހިރާއްޖޭގެ ހައްޖު މިޝަންގެ ބޭފުޅުންވެސް ދަނީ މައްކާ އަދި މަޝާއިރުތަކުގައި ހަރަކާތްތެރިވަމުންނެވެ. ދިވެހި ހައްޖުވެރިންނަށް ދިމާވާ ސިއްހީ މައްސަލަތަކަށް އަވަސް ފަރުވާ ދިނުމަށްޓަކައި ދިވެހި ކްލިނިކްތައްވެސް ވަނީ ގާއިމުކޮށްފައެވެ.

އަރަފާތު ބިމުގައި އިރުއޮއްސުމާ ހަމައަށް މަޑުކުރުމަށްފަހު، ދެން ހައްޖުވެރިން މިސްރާބު ޖަހާނީ މުޒްދަލިފާއަށް ދިއުމަށެވެ. އެއަށްފަހު ޖަމްރާއަށް ހިލައުކުމާއި، ގުރުބާންކުރުން ފަދަ ހައްޖުގެ އެހެނިހެން މުހިންމު މަރުހަލާތައް ކުރިއަށް އޮތް ދުވަސްތަކުގައި ފުރިހަމަކުރާނެއެވެ. ދިވެހި ހުރިހާ ހައްޖުވެރިންނަށްވެސް ދަތިކަމެއް ނެތި މި އަޅުކަންތައް ފުރިހަމަކުރެވޭނެ އިންތިޒާމުތައް ހަމަޖެއްސުމަށް ސައުދީގައި ތިބި ދިވެހި އޮފިޝަލުން ދަނީ ކަމާގުޅޭ އިދާރާތަކާއެކު މަސައްކަތް ކުރަމުންނެވެ.

ރާއްޖެއިން މިއަހަރުގެ ހައްޖުގެ އަޅުކަމުގައި 1000 އަށްވުރެ ގިނަ މީހުން ބައިވެރިވެއެވެ.