ޑިމޮކްރެޓިކް ރިޕަބްލިކް އޮފް ކޮންގޯ (ޑީއާރުސީ) ގެ އިޓޫރީ ޕްރޮވިންސްގައި އީބޯލާއަށް ފަރުވާދޭ މަރުކަޒެއްގައި ރޯކޮށްލައިފިއެވެ. މި ހާދިސާ ހިނގާފައިވަނީ އީބޯލާ ޖެހިގެން މަރުވި ކަމަށް ބެލެވޭ ޒުވާނެއްގެ ހަށިގަނޑު އާއިލާއާ ހަވާލުކުރުމަށް ސިއްހީ އިދާރާތަކުން ދެކޮޅުހެދުމާ ގުޅިގެން އުފެދުނު ހަމަނުޖެހުންތަކެއްގެ ތެރެއިން ކަމަށް ހަބަރުތައް ބުނެއެވެ.

އިއްޔެ ރްވަމްޕާރާގައި ހިނގި މި ހާދިސާގައި، ރުޅިގަދަވެފައިވާ އާންމުންގެ ބަޔަކު ވަނީ ހޮސްޕިޓަލަށް ވަދެގަނެ، ބަލިމީހުން އެކަހެރިކޮށްފައި ބައިތިއްބާ ޓެންޓުތަކުގައި އަލިފާން ރޯކޮށްލައިފައެވެ. މަންޒަރު ދުށް މީހުންނާ ހަވާލާދީ މީޑިއާތަކުން ރިޕޯޓުކޮށްފައިވާ ގޮތުގައި، މަރުވި މީހާގެ ހަށިގަނޑު ގަދަކަމުން ގެންދިއުމަށް އާއިލާއާއި ރައްޓެހިން މަސައްކަތްކުރިއެވެ. ހަމަނުޖެހުން ކޮންޓްރޯލް ކުރުމަށް ފުލުހުން ވަނީ ކަރުނަގޭހާއި އިންޒާރުގެ ވަޒަން ވެސް ބޭނުންކޮށްފައެވެ.

އިޓޫރީ ޕްރޮވިންސްގެ ޕަބްލިކް ސެކިއުރިޓީގެ އިސްވެރިޔާ ޖީން ކްލޯޑް މުކެންޑީ ވިދާޅުވި ގޮތުގައި، އާންމުން ރުޅިގަދަވީ އީބޯލާގައި މަރުވާ މީހުން ވަޅުލުމުގައި އަމަލުކުރާން ޖެހޭ ހަރުކަށި އުސޫލުތައް ނޭނގުމުގެ ސަބަބުންނެވެ. އޭނާ ފާހަގަކުރެއްވި ގޮތުގައި، ސަރުކާރުގެ އެންގުންތައް ސާފުކޮށް ހުރި ނަމަވެސް، އާއިލާއިން ބޭނުންވީ އާދަކާދަތަކާ އެއްގޮތަށް ޖަނާޒާ ބޭއްވުމަށް ހަށިގަނޑު ގެންދާށެވެ. އީބޯލާ ޖެހިގެން މަރުވާ މީހުންގެ ހަށިގަނޑުގައި ވެސް ވައިރަސް ހުންނާތީ، ރައްކާތެރިކަމުގެ ފިޔަވަޅުތަކާއެކު ހަށިގަނޑު ވަޅުލުމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ލަފާދެއެވެ.

މި ސަރަހައްދުގައި ހަރަކާތްތެރިވާ ބައިނަލްއަގުވާމީ ސިއްހީ ޖަމިއްޔާއެއް ކަމަށްވާ 'އަލީމާ' އިން ބުނީ، މިފަދަ ހަމަލާތަކުގެ ސަބަބުން ބަލި ފެތުރުން ކޮންޓްރޯލް ކުރުމަށް ކުރާ މަސައްކަތްތަކަށް ބޮޑެތި ހުރަސްތަކެއް އެޅެމުންދާ ކަމަށެވެ. މީގެ އިތުރުން، ސަރަހައްދުގެ ސިޔާސީ އިސް ފަރާތެއް ކަމަށްވާ ލޫކް މަމްބެލޭ ވިދާޅުވީ، މިއީ އީބޯލާއާ ގުޅޭގޮތުން ފެތުރެމުންދާ ދޮގު މައުލޫމާތުތަކުގެ ނަތީޖާ ކަމަށެވެ. ޑީއާރުސީގައި މިހާރު ފެތުރެމުންދާ އީބޯލާގެ ނުރައްކާތެރި ވޭރިއަންޓާ ގުޅިގެން ޑަބްލިއުއެޗްއޯއިން ވަނީ ސިއްހީ ކުއްލި ނުރައްކަލުގެ ހާލަތު އިއުލާންކޮށްފައެވެ. މިހާތަނަށް މި ބަލީގައި 160 އަށްވުރެ ގިނަ މީހުން މަރުވެފައިވާ ކަމަށް ރިޕޯޓުތައް ބުނެއެވެ.