ސަރުކާރުގެ ހަރަދުތައް ހަމަޖައްސަން ބޭނުންވާ ފައިސާ ހޯދުމަށްޓަކައި 3.5 ބިލިއަން ރުފިޔާގެ ޓީ-ބިލް ވިއްކަން ފިނޭންސް މިނިސްޓްރީން މިއަދު ހުޅުވާލައިފި އެވެ.

ފިނޭންސް މިނިސްޓްރީން މިއަދު ބުނި ގޮތުގައި މި ފަހަރު ހުޅުވާލީ، ތަފާތު ހަތަރު މުއްދަތެއްގައި އަނބުރާ ދައްކާ ގޮތަށް ހަމަޖެހިފައިވާ ޓީ-ބިލްތަކެކެވެ.

ޓީ-ބިލްތަކުގެ ތަފްސީލު

  • މާޗް 9 ވަނަ ދުވަހަށް އަނބުރާ ދެއްކުމަށް ވިއްކާ 1.1 ބިލިއަން ރުފިޔާގެ ޓީ-ބިލް
  • މޭ 18 ވަނަ ދުވަހަށް އަނބުރާ ދެއްކުމަށް ވިއްކާ 160 މިލިއަން ރުފިޔާގެ ޓީ-ބިލް
  • އޮގަސްޓް 10 ވަނަ ދުވަހަށް އަނބުރާ ދެއްކުމަށް ވިއްކާ 1.05 ބިލިއަން ރުފިޔާގެ ޓީ-ބިލް
  • އަންނަ އަހަރުގެ ފެބްރުއަރީ 8 ވަނަ ދުވަހަށް އަނބުރާ ދެއްކުމަށް ވިއްކާ 1.2 ބިލިއަން ރުފިޔާގެ ޓީ-ބިލް

މި ޓީ-ބިލްތަކުގެ އިންޓްރެސްޓް ރޭޓްތައް އުޅެނީ 3.50 ޕަސެންޓާއި 4.60 ޕަސެންޓާ ދެމެދުގަ އެވެ.

މި އަހަރުގެ ބަޖެޓުގެ ހަަރަދުތައް ހަމަޖެއްސުމަށްޓަކައި ސަރުކާރުން ވަނީ މި މަހުގެ ތެރޭގައިވެސް ޓީ-ބިލް ވިއްކާފައެވެ. އަދި މިދިޔަ އަހަރުގެ ފަހުކޮޅުވެސް ސަރުކާރުން ވަނީ 1.8 ބިލިއަން ރުފިޔާގެ ޓީ-ބިލް ވިއްކަން ހުޅުވާލައިފައެވެ.

ސަރުކާރުން ވިއްކާ ޓީ-ބިލްތައް އާންމުކޮށް ގަންނަނީ ރާއްޖޭގެ ޕެންޝަން ފަންޑާއި، ބައެއް ބޭންކުތަކުގެ އިތުރުން ސަރުކާރު ހިއްސާވާ ކުންފުނިތަކުންނެވެ.

ޓީ-ބިލް ނުވަތަ ޓްރެޝަރީ ބިލަކީ ގަވަރުމަންޓް ސެކިއުރިޓީޒްގެ ތެރޭގައި ހިމެނޭ ކުރު މުއްދަތުގެ ސެކިއުރިޓީޒް އެކެވެ.