މިއީ "ވާމްއަޕް"އެއް ކަމަށްބުނެ އެމްޑީޕީގެ މުޒާހަރާ ނިންމާލައިފި

މިއީ "ވާމްއަޕް"އެއް ކަމަށްބުނެ، އެމްޑީޕީން މުޒާހަރާ ނިންމާލާފައިވާކަން އިއުލާންކޮށްފި.  މުޒާހަރާ ނިންމާލީ ދުއާއަކުން. 

ހޯމްލޭންޑް ސެކިއުރިޓީ މިނިސްޓަރު އަލީ އިހުސާން ދެންމެ ކުރެއްވި ޕޯސްޓެއްގައި ވިދާޅުވީ އެމްޑީޕީން އެއްވުން ކުރިއަށްގެންދާނެ ރޫޓުގެ ހުއްދައަށް އެދި ހުށަހަޅާފައިވާ ކަމަށާއި ނަމަވެސް އެ ރޫޓުގައި މަޖީދީމަގު ހިމެނޭތީ، އެއީ ޓްރެފިކަށް ބާރުބޮޑުވާނެ މަގަކަށްވާނެތީ ފުލުހުން އެހެން ރޫޓަކުން ކުރިއަށްގެންދިއުމަށް ހުއްދަ ދީފައިވާ ކަމަށް. 

މިނިސްޓަރު ވަނީ އެ ރޫޓުތައް ދައްކުވައިދޭ ޗާޓެއް ވެސް އާންމުކުރައްވާފައި. އެ ޗާޓުން ފެންނަ ގޮތުގައި އެމްޑީޕީން ހުއްދައަށް އެދުނީ އާޓިފިޝަލް ބީޗް ކައިރިން ބޮޑުތަކުރުފާނު މަގުން ގޮސް، އަމީނީމަގުން ސޯޝަލް ސެންޓަރާ ދިމާއިން މަޖީދީމަގަށް ދިއުމަށް. 

ނަމަވެސް ފުލުހުން ހުއްދަދީފައިވަނީ، އާޓިފިޝަލް ބީޗް ކައިރިން ބޮޑުތަކުރުފާނު މަގުން ގޮސް، އަމީނީމަގުން އަލުން ބޮޑުތަކުރުފާނު މަގުން ދިއުމަށް. 

މިނިސްޓަރު އިހުސާން ވިދާޅުވީ އެމްޑީޕީން މަސައްކަތްކުރީ ހުއްދައަށް އެދުނު އަދި ހުއްދަދިން ރޫޓުން ވެސް ނޫން ކަމަށާއި އެމްޑީޕީގެ މުޒާހަރާއަކީ ސުލްހަވެރި މުޒާހަރާއެއް ކަމަށް ނުބެލެވޭ ކަމަށް. އަދި ހުރިހާ ރައްޔިތުންގެ ހައްގުތައް ރައްކާތެރިކުރެވޭ ގޮތަށް، ގާނޫނާ އެއްގޮތަށް ހިޔާލުފާޅުކުރުމުގެ މިނިވަންކަމަށް ސަރުކާރުން ފުރުސަތު ދޭނެ ކަމުގެ ޔަގީންކަން މިނިސްޓަރު ދެއްވި. 

ކަންފަތަށް އުނދަގޫވާ ފަދަ، ބާރު ސައިރެންއެއް ފަދަ ލޯންގް ރޭންޖް އެކޯސްޓިކް ޑިވައިސް (އެލްއާރުއޭޑީ) ވެސް ފުލުހުން ބައެއް ވަގުތުތަކުގައި ދަނީ ބޭނުންކުރަމުން. 

ފުލުހުންގެ ކުރިމަތީގައި ތިބެ މުޒާހަރައިގެ ބައިވެރިން އަދިވެސް ގެންދަނީ ޝުއޫރު ފާޅުކުރަމުން. ބައެއް މީހުން އިށީނދެ ތިބި އިރު، އޭގެ ތެރޭގައި އެމްޑީޕީގެ ލީޑާޝިޕްގެ ބޭފުޅުންނާއި ކުރީގެ ރައީސް އިބްރާހިމް މުހައްމަދު ސޯލިހު ވެސް ހިމެނިވަޑައިގަންނަވާ.  

ފުލުހުން މިރޭ ނެރުނު ނޫސްބަޔާނެއްގައި ބުނީ، އެމްޑީޕީގެ މުޒާހަރައިގެ ބައިވެރިންނަށް ފުލުހުން ހުރަސް އެޅީ ކުރިން ހުއްދަ ދީފައިވާ ރޫޓާ ހިލާފަށް، މަޖީދީމަގުން ކުރިއަށްދާން ފެށުމާ ގުޅިގެން އެގޮތަށް އަމަލު ނުކުރުމަށް ތަކުރާރުކޮށް ނަސޭހަތްތެރިވެ، އިންޒާރުދިނުމަށްފަހު ކަމަށް. 

ނަމަވެސް އެކަމަށް އިޖާބަ ނުދީ، އެއްވުމުގެ ބައިވެރިން ފުލުހުންނާ ދިމާލަށް ގަލާއި ފެންފުޅި އުކައި، ފުލުހުންގެ އާލާތްތައް އަތުލަން މަސައްކަތްކޮށް، އަދި ފުލުހުންގެ ވާޖިބު އަދާކުރުމަށް ހުރަސްއަޅާފައިވާ ކަމަށް ފުލުހުންގެ ބަޔާނުގައި ވަނީ ފާހަގަކޮށްފައި. 

ފުލުހުން ބުނީ އެ އަމަލުތައް ހިންގި ފަރާތްތަކާ މެދު ގާނޫނީ ފިޔަވަޅު އަޅާނެ ކަމަށާއި ފުލުހުންގެ ވާޖިބު އަދާކުރުމަށް ހުރަސްނޭޅުމަށް އެންމެހާ ފަރާތްތަކަށް ނަސޭހަތްތެރިވާ ކަމަށް. 

މުޒާހަރާގެ ބައެއް ބައިވެރިން ފުލުހުންގެ ބެލުމުގެ ދަށަށް ވަނީ ގެންގޮސްފައި. ނަމަވެސް ފުލުހުންގެ ރަސްމީ ބަހެއް ލިބިފައިނުވާތީ، މުޒާހަރާއިން ހައްޔަރުކުރީ ކިހާ އަދަދެއްގެ މީހުން ކަމެއް ކަށަވަރެއް ނުވޭ.  

ނޫސްވެރިންގެ ރައްކާތެރިކަމަށް ކަށަވަރުކޮށްދިނުމަށް ފުލުހުންގެ ކިބައިން ނޫސްވެރިންގެ ޖަމިއްޔާ، މޯލްޑިވްސް ޖާނަލިސްޓްސް އެސޯސިއޭޝަން (އެމްޖޭއޭ) އިން އެދިއްޖެ. 

އެމްޖޭއޭ އިން އެކްސްގައި ދެންމެ ކުރި ޕޯސްޓެއްގައި ބުނީ، ނޫސްވެރިންނަށް ޕެޕޭ ސްޕްރޭގެ އަސަރުކޮށްފައިވާކަމުގެ ރިޕޯޓުތައް ލިބިފައިވާ ކަމަށާއި ފުލުހުންގެ ސަފުގެ ފަހަތުން ނޫސްވެރިންނަށް ރައްކާތެރިކަން ލިބޭގޮތަށް މަސައްކަތްކުރުމަށް ފުލުހުން ފުރުސަތު ދީފައިނުވާ ކަމަށް. 

ފުލުހުން ޝީލްޑްތަކާއެކު ހުރަސް އަޅަމުންދިޔަ ނަމަވެސް، މުޒާހަރައިގެ ބައިވެރިން މަސައްކަތްކުރަމުންދަނީ މަޖީދީމަގުން ކުރިއަށްދިއުމަށް. 

މުޒާހަރައިގައި ވާހަކަދައްކަވަމުން ކުރީގެ ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވީ، އެންމެންގެ ހިތްވަރާއެކު އަނެއްކާވެސް ދިވެހީންގެ ދިވެހިރާއްޖެއެއް ގެނައުމަށް މަސައްކަތްކުރަން ޖެހޭ ކަމަށް. 

ފުލުހުން ގެންދަނީ މުޒާހަރާ ކޮންޓްރޯލުކުރުމަށް ބާރުގެ ބޭނުންކޮށް، ތަކުރާރުކޮށް ޕެޕާ ސްޕްރޭ ބޭނުންކުރަމުން. މުޒާހަރާގައި ބޭނުންކުރި ވެހިކަލެއް ވެސް ފުލުހުންގެ ބެލުމުގެ ދަށަށް ވަނީ ގެންގޮސްފައި. 

މުޒާހަރާގެ ބައިވެރިޔަކު ފުލުހުންގެ ޝީލްޑެއް ހިފައިގެން ދިއުމުން، ހޯމްލޭންޑް ސެކިއުރިޓީ މިނިސްޓަރު އަލީ އިހުސާން އެކަން ކުށްވެރިކުރައްވައިފި. 

މިނިސްޓަރު އިހުސާން ވިދާޅުވީ ގާނޫނު ތަންފީޒުކުރުމަށް ފުލުހުންނަށް ހުރަސް އެޅުމަކީ ސުލްހަވެރިކަމާއެކު އެއްވެ އުޅުން ނޫން ކަމަށް.