"މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޓަރީ ބިލު" (މީޑިއާ ބިލު) އަށް އާންމު ރައްޔިތުންގެ ހިޔާލު ހޯދުމަށް އެކަށީގެންވާ ވަގުތު ދިނުމަށް ބާ ކައުންސިލުން ރައްޔިތުންގެ މަޖިލީހުގައި އެދިއްޖެއެވެ.

ތުޅާދޫ ދާއިރާގެ މެންބަރު އަބްދުލްހައްނާނު ހުށަހެޅުއްވި އެ ބިލާ ދެކޮޅަށް ނޫސްވެރިން އިހުތިޖާޖު ކުރަމުން ދަނިކޮށް މަޖިލީހުގެ މިނިވަން މުއައްސަސާތަކުގެ ކޮމިޓީން މިއަދު ވަނީ އެ ބިލު ފާސްކޮށްފައެވެ.

ބާ ކައުންސިލުން މިރޭ ބުނީ އެ ބިލާ ގުޅޭގޮތުން ރައްޔިތުންގެ މަޖިލީހަށް އެ ފަރާތުގެ ކޮމެންޓްތައް ހުށަހަޅާފައިވާ ކަމަށެވެ.

ގާނޫނުއަސާސީގެ އުސޫލުތަކާއި ބައިނަލްއަގުވާމީ އެންމެ ރަނގަޅު އުސޫލުތަކާ އެއްގޮތްވާ ގޮތުގެ މަތިން ބިލަށް ބޮޑެތި އިސްލާހުތަކެއް ގެންނަން ޖެހޭ ކަމަށާއި ބިލު ގާނޫނަކަށް ހެދުމުގެ ކުރިން ކަމާ ގުޅުންހުރި އިދާރާތަކާއެކު މަޝްވަރާކުރުމަށާއި އާންމު ރައްޔިތުންގެ ހިޔާލު ހޯދުމަށް އެކަށީގެންވާ ވަގުތު ދިނުމަށް މަޖިލީހުގައި އެދިފައިވާނެ ކަމަށްވެސް ބުންޏެވެ.

އެ ބިލު ފާސްކުރަން މިއަދު ބޭއްވި ކޮމެޓީ ބައްދަލުވުމުގައި އެ ބިލަށް 72 އިސްލާހު ހުށަހެޅިއެވެ.

މި އިސްލާހުތައް ހުށަހެޅީ، ކޮމިޓީގެ ނާއިބު މުގައްރިރު ކެލާ ދާއިރާގެ މެންބަރު އަބްދުﷲ ޝަރީފެވެ.

އޭނާ ހުށަހެޅި އިސްލާހުތަކުގެ ތެެރެއިން ނޫސްވެރިން ފާހަގަކުރި ބައެއް ކަންބޮޑުންތަަކަށް ބަދަލު ގެނައި ނަމަވެސް ނޫސްވެރިން ފާހަގަކުރި އެންމެ ބޮޑެތި ކަންބޮޑުންތައް ބަދަލުކޮށްފައެއް ނުވެއެވެ.

އޭނާ ހުށަހެޅި އިސްލާހުތަކަށް ހުށަހެޅުމުން، އެ ބިލަށް އިތުރު އިސްލާހުތައް ހުށަހެޅުމުގެ ފުރުސަތަކަށް އެ ކޮމިޓީގައި ހިމެނޭ އިދިކޮޅު އެމްޑީޕީގެ މެންބަރު ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމު އެދިލެއްވިއެވެ.

އެ ފުރުސަތުގައި ބިލްގެ ހުރިހާ މާއްދާއެއް ވަކިވަކިން ވިދާޅުވެ، އެ މާއްދާތަކުގައި ހުރި ކަންބޮޑުވުންތައް ފާޅުކުރައްވައި އެ މާއްދާތައް އުވާލުމަށް މީކާއީލް ހުށަހެޅުއްވިއެވެ.

އެ މަސައްކަތް ހުރިހާ ނަމާދު ގަޑިތަކަކަށް މެދުކަނޑާލުމަށްފަހު، ހަވީރު ގާތްގަނޑަކަށް 5:30 އާ ހަމައަށް ކުރިއަށްދިޔައެވެ.

ސަރުކާރުގެ ފަރާތުން މެންބަރު ޝަރީފް ބިލަށް ހުށަހެޅުއްވި މުހިންމު އިސްލާހުތަކުގެ ތެރޭގައި، ކޮމިޝަންގެ މެންބަރުން ކަނޑައެޅުމަށް ބިލުގެ 17 ވަނަ މާއްދާ އާއި 19 ވަނަ މާއްދާ އާއި 20 ވަނަ މާއްދާއިން ދިން ބާރު ވަނީ ކަނޑުވާލައިފައެވެ.

ބިލްގެ 17 ވަނަ މާއްދާގައި ބުނަނީ، ކޮމިޝަންގައި ތިއްބަވާ ހަތް މެންބަރުންގެ ތެރެއިން ތިން މެންބަރުންނަކީ މަޖިލީހުގެ ރުހުން ލިބިގެން ރައީސުލްޖުމްހޫރިއްޔާ އައްޔަންކުރާ ތިން މެންބަރުން ކަަމަށެވެ.

ނަަމަވެސް ކޮމިޝަން އެކުލެވިގެންވާނީ މަޖިލީހުން ކަނޑައަޅާ ތިން މެންބަރުންނާއި މީޑިއާތަކުން އިންތިހާބުކުރާ ހަތަރު މެންބަރުންކަަމަށް ވަނީ އިސްލާހު ގެނަސްފައެވެ. އަދި ތިން މެންބަރު ކޮމިޝަނަށް އައްޔަން ކުރުމަށް ރައީސުލްޖުމްހޫރިއްޔާއަށް ފެނިވަޑައިގަންނަވާ ނަންތަކެއް މަޖިލީހަށް ފޮނުވުމަށް އޮތް މާއްދާ ބަދަލުކޮށް، މަޖިލީހުން އާންމުކޮށް އިއުލާންކޮށްގެން ކުރިމަތިލާ ފަރާތްތަކުގެ ތެރެއިން މެންބަރުން ހޮވާގޮތަށް ވަނީ ހިމަނައިފައެވެ.

ކޮމިޝަންގެ މެންބަރުންގެ ސިފަތަކުގެ ތެރެއަށް ސިޔާސީ ޕާޓީއެއްގެ މެންބަރަކަށްނުވުމާއި، ކޮމިއުނިކޭޝަނާއި މީޑިއާގެ ހިދުމަތްދޭ ދާއިރާގެ ވިޔަފާރީގެ ހިއްސާއެއް އޮތް ފަރާތަކަށް ނުވުންވެސް ވަނީ ހިމަނައިފައެވެ.

މީޑިއާތަކުން ކޮމިޝަނަށް މެންބަރުން އިންތިހާބުކުރަން އޮތް ގޮތްވެސް ވަނީ އިސްލާހުކޮށްފައެވެ.

އެގޮތުން މި އިންތިހާބުގައި ވޯޓުލެވޭނީ ފަސް އަހަރުވެފައިވާ ބްރޯޑްކާސްޓަރުންނާއި މީޑިއާތަކާއި އެތަންތަނުގައި މަސައްކަތްކުރާ ނޫސްވެރިންކަމަށް އޮތްތަން ބަދަލުކޮށް، އިންތިހާބުގައި ލެވޭނީ ތިން އަހަރު ވެފައިވާ، ރަޖިސްޓްރީ ކޮށްފައިވާ ބްރޯޑްކާސްޓަރުންނާއި މީޑިއާތަކަށް އެއްވޯޓު ކަމަށް ވަނީ ކަނޑައަޅައިފައެވެ.

ކޮމިޝަންގެ ރައިސްކަމަށް އައްޔަންކުރާނީ، ރައީސުލްޖުމްހޫރިއްޔާ މަޖިލީހަށް ފޮނުއްވާ ބޭފުޅެއްގެ ނަން ކަަމަށް އޮތް މާއްދާވެސް ބަދަލުކޮށް، ކޮމިޝަންގެ ރައީސް މަޖިލީހުން ހޮވާގޮތަށް ވަނީ ބަދަލުކޮށްފައެވެ. އަދި ކޮމިޝަންގެ ނާއިބު ރައީސް ހޮވާނީ ކޮމިޝަންގެ މެންބަރުންގެ މެދުގައި ނަގާ ވޯޓަކުންނެވެ.

ކޮމިޝަންގެ މަގާމެއް ހުސްވާ ސިފަތައް ބަޔާންކޮށްފައިވާ 28 ވަނަ މާއްދާއަށް އަކުރެއް އިތުރުކޮށް، އެ މާއްދާގައި ބުނާ ސިފައެއް މެންބަރެއްގެ ކިބައިން އުނިވެއްޖެނަމަ، އެ މެންބަރު ވަކިކޮށްދިނުމަށް އެދި، އިންތިހާބުގައި ވޯޓުލާ މެންބަރުންގެ ތެރެއިން 50 މެންބަރުން ހުށަހެޅުމުން ކޮމިޝަންގެ ވޯޓަކުން ވަކިކުރެވޭގޮތަށް ވަނީ ހިމަނައިފައެވެ.

ބިލުގެ 41 ވަނަ މާއްދާގައި ބަޔާންކޮށްފައިވާ، މީހުންގެ އަމިއްލަ މައުލޫމާތު ހާމަކުރުމުގެ މިންގަނޑުތަކުގެ ތެރޭގައި، އެކި ފަރާތްތަކުގެ އަމިއްލަ މިނިވަންކަމުގެ ދާއިރާގެ ތެރެއަށް ނުޙައްގުން ވަދެގެން ނުވާނެކަމަށް އޮތް އޮތުން ބަދަލުކޮށް، އެފަދަ މައުލޫމާތެއް ނިސްބަތްވާ ފަރާތުގެ އަމިއްލަ މިނިވަންކަމުގެ ދާއިރާއަށް އިހުތިރާމްކުރުމަކީ މައުލޫމާތު ހާމަކުރުމުގެ މިންގަނޑު ކަމުގައި ވަނީ ހިމަނައިފައެވެ.

އަދި ބިލުގެ 67 ވަނަ މާއްދާގެ ދަށުން، ވަކިވަކި ނޫސްވެރިންނާއި މީޑިއާގައި މަސައްކަތްކުރާ ފަރާތްތަކާމެދު ފިޔަވަޅު އެޅޭގޮތަށް އޮތް މާއްދާ އުނިކޮށް، ކޮމިޝަނުން މައްސަލައެއް ބަލައި ނިމެންދެން އިދާރީ ފިޔަވަޅެއްގެ ގޮތުން، ވަގުތީގޮތުން މީޑިއާއެއްގެ ރަޖިސްޓްރީ ބާތިލުކުރުމުގެ ބާރު ކޮމިޝަނަށް ލިބިދީފައިވާ މާއްދާ، 66 ވަނަ މާއްދާގެ (ޅ) ކޮމިޓީން ވަނީ އުނިކޮށްފައެވެ.

ނަމަވެސް މީޑިއާތަކާއި ނޫސްވެރިންނާއި، ސޯޝަލް މީޑިއަގައި ޝާއިރުކުރާ ހިޔާލުތަކަށް ފިޔަަވަޅު އެޅޭގޮތަށް އަދިވެސް ބިލުގެ ބައެއް މާއްދާތައް އޮތްކަން ފާހަގަކޮށް ބިލު ފާސްނުކޮށް ބޭރުކޮށްލަން ގޮވާލައި ކޮމިޓީ އަޑުއަހަން ވަދެ ތިބި ނޫސްވެރިން އިހުތިޖާޖު ކުރިއެވެ.

ނަމަވެސް މެންބަރު ޝަރީފް ހުށަހެޅުއްވި އިސްލާހުތަކާއެކު ކޮމިޓީގައި ތިއްބެވި މެންބަރުންގެ އިއްތިފާގުން ބިލު ފާސްވީ ކަމަށް ކޮމިޓީގެ މުގައްރިރު މާފުށީ ދާއިރާގެ މެންބަރު ހުސެއިން ރިޒާ ނިންމެވިއެވެ.

މި ބިލަށް މެންބަރު މީކާއީލް ހުށަހެޅުއްވި އިސްލާހުތަކަށް އެއްވެސް މެންބަރަކު ތާއީދު ކުރައްވާފައިނުވާތީ އެ އިސްލާހުތަކަށް ވޯޓަކަށް ނާހައެވެ.

ކޮމިޓީ މެންބަރުންގެ އިއްތިފާގުން ބިލު ފާސްވިކަން މުގައްރިރު އިއުލާން ކުރެއްވީ، ނޫސްވެރިންގެ އިހުތިޖާޖާ ގުޅިގެން ކޮމިޓީ ބައްދަލުވުން މެދުކަނޑާލެއްވުމަށްފަހު، ހަވީރު 5:00 ގައި އަލުން ކޮމިޓީ ބައްދަލުވުން ފެއްޓެވުމަށްފަހުގައެވެ.

ކޮމިޓީ ބައްދަލުވުމުގައި އެ ބިލު ފާސްކުރަން ނުފެންނަކަމަށް އެއްވެސް މެންބަރަކު ވޯޓު ނުދެއްވާ ކަމަށްވެސް މުގައްރިރު އިއުލާންކުރެއްވިއެވެ.

ވޯޓަށް އެހުމަށް އެންމެ ފަހުން ބޭއްވި ބައްދަލުވުން ފެށިކަން ނޫސްވެރިންނަށް އަންގައިފައެއް ނުވެއެވެ.