އެކްޓްރެސް ރާދިކާ އަޕްޓޭ ވަނީ ޑައިރެކްޓަރެއްގެ ދައުރު އަދާކުރުމަށް ތައްޔާރުވެފައެވެ. ފާއިތުވި އަހަރުތަކުގައި "ޕެޑްމަން"، "އަންދާދުން"، "މޮނިކާ އޯ މައި ޑާލިން" ފަދަ ފިލްމުތަކުގައި ތަމްސީލުކޮށްފައިވާ މި އެކްޓްރެސް، މިހާރު ވަނީ "ކޯޓްޔާ" ނަމަކަށް ކިޔާ އެކްޝަން ފެންޓަސީ ފިލްމެއް ޑައިރެކްޓްކޮށްގެން އޭނާގެ ޑައިރެކްޓަރުކަމުގެ ފުރަތަމަ ފިލްމު ހަދަން ތައްޔާރުވެފައެވެ.

ބޮލީވުޑް ހަބަރުތަކުގައިވާ ގޮތުގައި މި ފިލްމު އިއުލާން ކޮށްފައިވަނީ ސިނޭވީ-ސީއެޗްޑީ މާކެޓް ލައިންއަޕްގެ ބައެއްގެ ގޮތުގައެވެ. މިއީ އިންޑިއާގެ ސިނެވެސްޗަރ އިންޓަނޭޝަނަލް ފިލްމް ފެސްޓިވަލް (ސީއައިއެފްއެފް) ގެ ދެވަނަ އެޑިޝަނާއެކުގައެވެ. މި ލައިންއަޕްގައި ހިމެނެނީ މަޝްހޫރު އަދި އަލަށް ފާހަގަކުރެވޭ ފިލްމު ހަދާ ފަރާތްތަކުގެ ތަފާތު 22 ޕްރޮޖެކްޓެވެ.

ރިޕޯޓުގައި ބުނެފައިވާ ގޮތުގައި، ރާދިކާގެ ފިލްމަކީ ހިންދީ/މަރާތީ އެކްޝަން-ފެންޓަސީއެކެވެ. މި ފިލްމުގައި ހިމެނެނީ ޒުވާން އަންހެން ދަނޑުވެރިޔަކަށް ލިބޭ އާދަޔާ ހިލާފު ބާރު ތަކެއްގެ ބޭނުންކޮށްގެން އޭނާގެ އާއިލާ ދަރަނިން މިނިވަންކުރާ ވާހަކައެވެ.

މަސައްކަތުގެ ދާއިރާއިން ބަލާއިރު، ރާދިކާ އެންމެ ފަހުން ފެނިފައިވަނީ "ސިސްޓަރ މިޑްނައިޓް" ގައެވެ. މި ފިލްމުގެ ޕްރިމިއަރ ބޭއްވުނީ ކާންސް ފިލްމް ފެސްޓިވަލްގައެވެ. އަދި ފިލްމަށް ވަނީ ބާފްޓާ (ބީއޭއެފްޓީއޭ) ގެ "އައުޓްސްޓޭންޑިން ޑެބިއު ބައި އަ ބްރިޓިޝް ރައިޓަރ، ޑައިރެކްޓަރ އޯ ޕްރޮޑިއުސަރ" ކެޓަގަރީން ނޮމިނޭޝަނެއް ލިބިފައެވެ. ރާދިކާ ވަނީ ބީއައިއެފްއޭ އެވޯޑަކަށް ވެސް ނޮމިނޭޓްވެފައެވެ.