ބޮލީވުޑްގެ މަޝްހޫރު ތަރިން ކަމުގައިވާ ރާޖޭޝް ކަންނާ އަދި ޑިމްޕަލް ކަޕާޑިއާގެ ކާފަ ދަރިފުޅު ނައޯމިކާ ސަރަން، އޭނާގެ ފުރަތަމަ ފިލްމީ މަސައްކަތް ފެށުމަށް ތައްޔާރުވެއްޖެއެވެ. ހަބަރުތަކުގައި ބުނާ ގޮތުގައި، އޭނާ ފިލްމީ ދުނިޔެއަށް ނުކުންނާނީ ރޮމޭންޓިކް ކޮމެޑީ ފިލްމެއްގައި، އަމީތާބް ބަޗަންގެ ކާފަ ދަރިފުޅު އަގަސްތްޔަ ނަންދާއާ އެކުގައެވެ.

މި ފިލްމު ޑައިރެކްޓްކުރާނީ ޖަގްދީޕް ސިދުއެވެ. މިއީ ޖަގްދީޕްގެ ހިންދީ ސިނަމާގެ ފުރަތަމަ ޑައިރެކްޝަން މަސައްކަތް ކަމަށްވާއިރު، އޭނާ ވަނީ ޕަންޖާބީ ފިލްމު އިންޑަސްޓްރީގައި ޤިސްމަތް، ޤިސްމަތް 2، ޝަޑާ، އަދި ޖައްޓް އެންޑް ޖޫލިއެޓް 3 ފަދަ ބްލޮކްބަސްޓަރ ހިޓްތަކާއެކު ކާމިޔާބު ހޯދާފައެވެ. އަދި ބޮލީވުޑް ފިލްމުތަކުގެ ތެރެއިން ސާންދް ކީ އާންކް އަދި ސްރީކާންތް ފަދަ ފިލްމުތަކުގެ ޑައިލޮގް ލިޔުމުގައިވެސް ބައިވެރިވެފައިވެއެވެ. އޭނާގެ ވާހަކަ ލިޔުމުގެ ހުނަރާއި، މެޑޮކް ފިލްމްސްގެ ޒަމާނީ ލޯބީގެ ވާހަކަތައް އުފެއްދުމުގެ ހުނަރު އެއްކޮށްލުމުން، މި ބާވަތުގެ ފިލްމުތަކަށް އާ ނަޒަރަކުން ބެލޭނެ ކަމަށް ގިނަ ބަޔަކު އުންމީދުކުރެއެވެ.

މާމަ، ޑިމްޕަލް ކަޕާޑިއާއާ ވައްތަރުކަމުން ނައޯމިކާ ވަނީ މިހާރުވެސް ފިލްމު ލޯބިވެރިންގެ ސަމާލުކަން ހޯދާފައެވެ. އެކްޓަރު ރިންކޭ ކަންނާ އަދި ވިޔަފާރިވެރިޔާ ސަމީރު ސަރަންގެ ދަރިފުޅު، ނައޯމިކާ ވަނީ ކުޑައިރުއްސުރެ އެކްޓަރަކަށްވުމުގެ ހުވަފެން ދެކެފައި ކަމަށް ރިޕޯޓުތައް ބުނެއެވެ. މި ފިލްމާއެކު، އޭނާ ރަސްމީކޮށް އިންޑިއަން ސިނަމާގެ އެންމެ އިހުތިރާމް ލިބިފައިވާ ސުޕަސްޓާރުންގެ ތެރެއިން އެކެއް ކަމުގައިވާ އޭނާގެ ކާފަ ރާޖޭޝް ކަންނާގެ ފިޔަވަޅުތަކުގެ މަތީގައި ހިނގާން ފަށާނެ ކަމަށް ރިޕޯޓުތައް ބުނެއެވެ.

ޒޯޔާ އަޚްތަރުގެ "ދަ އާޗީސް" ގައި ފާއިތުވި އަހަރު ފުރަތަމަ ފަހަރަށް ފެނުނު އަގަސްތްޔަ، ދެން އެންމެ އަވަހަށް ފެންނާނީ ސްރީރާމް ރަގަވަން ޑައިރެކްޓްކުރާ ހަނގުރާމައިގެ ޑްރާމާއެއް ކަމުގައިވާ "އިއްކީސް" ގައެވެ. މި ފިލްމުގައި އޭނާ ފެނިގެންދާނީ ދަރްމެންދްރާ އަދި ޖައިދީޕް އަހްލާވަތްއާ އެކުގައެވެ. މި ފިލްމުގައި ދައްކާނީ ސެކަންޑް ލެފްޓިނަންޓް އަރުން ކެޓަރްޕާލްގެ ހަޔާތުގެ ވާހަކައެވެ.

މި ދެ ޒުވާން އެކްޓަރުންގެ ކެރިއަރުގައި މުހިންމު މަރުހަލާއެއް ކަމުގައިވުމުގެ އިތުރުން، މި ފިލްމަކީ ބޮލީވުޑް ލޯބިވެރީންނަށް ހަނދާނީ އިހުސާސްތަކެއް ގެނެސްދޭނެ ފިލްމެއްކަމުގައި ވާނެކަމަށް ހަބަރުތައް ބުނެއެވެ. މިއީ ބޮލީވުޑްގެ އެންމެ މަޝްހޫރު ދެ އާއިލާއެއްގެ ޖީލުތަކެއް ސްކްރީނުގައި އެއްވުމުގެ މުހިންމު ވަގުތެކެވެ. މި ފިލްމުން އެއްކޮށްލަނީ ރާޖޭޝް ކަންނާ އަދި އަމިތާބް ބައްޗަންގެ ތަރިކައެވެ. މި ދެ ތަރީން ވަނީ އާނަންދް (1971) އަދި ނަމަކް ހަރާމް (1973) ފަދަ އައިކޮނިކް ފިލްމުތަކުގައި އެއް ސްކްރީނެއްގައި ފެނިފައެވެ.