އިންޓަނޭޝަނަލް އިންޑިއަން ފިލްމު އެކެޑަމީ އެވޯޑްސް (އައިއައިއެފްއޭ) 2026 ގައި ދުރަންދަރު ފިލްމުން އެންމެ މޮޅު ފިލްމު ހިމެނޭހެން ބޮޑެތި އެވޯޑްތަކެއް ކާމިޔާބުކޮށްފިއެވެ.

އެކްޓިންއާއި، ޑައިރެކްޝަނާއި، ވާހަކަ ލިޔުމުގެ އިތުރުން ޓެކްނިކަލް ދާއިރާތައް ހިމެނޭހެން ދުރަންދަރު ވަނީ ޖުމްލަ 12 އެވޯޑެއް ހާސިލުކޮށްފައެވެ.

މި ފަހަރުގެ އެވޯޑްސްގައި އެކްޓިންގެ އެންމެ މަތީ ޝަރަފުތަކަށް ބަލާއިރު، ލީޑިން ރޯލަކުން އެންމެ މޮޅު ފިރިހެން އެކްޓަރުގެ އެވޯޑް ހޯދާފައިވަނީ ދުރަންދަރުގެ ލީޑް ތަރި ރަންވީރު ސިންގް ކަމަށް އެވޯޑްސް އިންތިޒާމުކުރާ ފަރާތުން ބަޔާންކޮށްފައިވެއެވެ. މީގެ އިތުރުން، ލީޑިން ރޯލަކުން އެންމެ މޮޅު އަންހެން އެކްޓަރު ނުވަތަ އެންމެ މޮޅު އެކްޓްރެސްގެ އެވޯޑް ލިބިފައިވަނީ މޯހިތު ސޫރީގެ ފިލްމު ސައްޔާރާ އިން އަނީތު ޕައްޑާ އަށެވެ.

ދުރަންދަރު ފިލްމަށް ރަސްމީކޮށް ކަށަވަރުވެފައިވާ އެހެން ބޮޑެތި ކެޓަގަރީތަކުގެ ތެރޭގައި އެންމެ މޮޅު ޑައިރެކްޓަރުގެ އެވޯޑް ހިމެނެއެވެ. އައިއައިއެފްއޭ އިންތިޒާމުކުރާ ފަރާތުން އިއުލާންކުރި ވަނަތަކުގެ ލިސްޓުގައިވާ ގޮތުން، އެ ފިލްމު ޑައިރެކްޓުކޮށްގެން އެންމެ މޮޅު ޑައިރެކްޓަރުގެ މަގާމު އާދިތިޔާ ދާރް ހޯދިއިރު، އެ ފިލްމުގެ ތަރިން ވަނީ އެކްޓިންގެ ތިން ކެޓަގަރީއަކުން އެވޯޑް ހާސިލުކޮށްފައެވެ. އެގޮތުން ރަންވީރު ސިންގްގެ އެވޯޑްގެ އިތުރުން، އެންމެ މޮޅު ސަޕޯޓިން ފިރިހެން އެކްޓަރުގެ އެވޯޑް ސަންޖޭ ދަތުއަށް ލިބުނުއިރު، ނެގެޓިވް ރޯލަކުން އެންމެ މޮޅު އެކްޓަރުގެ އެވޯޑް ދުރަންދަރު އިން ކާމިޔާބުކޮށްފައިވަނީ އަކްޝޭ ކަންނާ އެވެ.