ސައޫދީ އަރަބިއްޔާގެ ޖިއްދާގައި ބޮޑު ފެން ތާނގީއެއް ވެއްޓުނު މައްސަލަ ތަހުގީގުކުރުމަށް މައްކާ ސަރަހައްދުގެ ގަވަރުނަރު ޕްރިންސް ހާލިދު އަލް ފައިސަލް އަންގަވައިފި ކަމަށް މައްކާ ގަވަރުނަރޭޓުން ބުނެފިއެވެ. ހަރަމްފުޅުގެ ހާދިމުގެ މުޝީރުގެ މަގާމުވެސް ފުރުއްވާ ޕްރިންސް ހާލިދު އަލް ފައިސަލް ވަނީ، މި ހާދިސާ ހިނގައިދިޔަ ގޮތާއި އެކަން މެދުވެރިވި ސަބަބުތައް ދެނެގަތުމަށްޓަކައި ކަމާބެހޭ އިދާރާތައް ހިމެނޭ ކޮމިޓީއެއް އެކުލަވައިލެއްވުމަށް އަންގަވައިފައެވެ.

ގަލްފް ނިއުސްއިން އިއްޔެ ރިޕޯޓުކޮށްފައިވާ ގޮތުގައި، މި އެންގެވުން ނެރުއްވާފައިވަނީ ޖިއްދާގައި ހުންނަ އަމިއްލަ ކުންފުންޏަކަށް ނިސްބަތްވާ ވަގުތީ ފެން ތާނގީއެއް އަންގާރަ ދުވަހު ވެއްޓުމާ ގުޅިގެންނެވެ. އެ ތާނގީ ވެއްޓުމުގެ ސަބަބުން އެ ސަރަހައްދަށް ބާރުމިނުގައި ގިނަ އަދަދެއްގެ ފެންގަނޑު ފެތުރި، އެ ހިސާބަށް ގެއްލުންތަކެއް ލިބުނު ކަމަށްވެސް އެ ނޫހުން ބުނެފައިވެއެވެ. މައްކާ ގަވަރުނަރޭޓުން ބުނި ގޮތުގައި، އެކުލަވާލި ކޮމިޓީން އެ ތަނުގައި ކަނޑައަޅާފައިވާ ރައްކާތެރިކަމުގެ ގަވާއިދުތަކަށް އަމަލުކޮށްފައިވޭތޯ ބަލައި، ކައިރީގައި ހުރި އިމާރާތްތަކާއި ތަންތަނުގެ އޮނިގަނޑުގެ ރައްކާތެރިކަން ވަޒަންކުރާނެއެވެ. އަދި ތަހުގީގުން ހޯދޭ ކަންކަމާއި ހުށަހަޅާ ލަފާތައް، ހެދިފައިވާ ގާނޫނުތަކާއި ގަވާއިދުތަކާ އެއްގޮތަށް އެކަށީގެންވާ ފިޔަވަޅު އެޅުމަށްޓަކައި ކަމާބެހޭ އިދާރާތަކަށް ހުށަހަޅާނެއެވެ.

މި ހާދިސާގައި އެއްވެސް މީހަކަށް އަނިޔާއެއް ލިބުނު ކަމެއް ނުވަތަ ތަކެއްޗަށް ލިބުނު ގެއްލުމުގެ ސީދާ މިންވަރެއް ސައޫދީގެ ކަމާބެހޭ ފަރާތްތަކުން އަދި ހާމަކޮށްފައި ނުވާ ކަމަށް ގަލްފް ނިއުސްއިން ރިޕޯޓުކޮށްފައިވެއެވެ. އެ ނޫހުން ބުނި ގޮތުގައި، ތާނގީ ވެއްޓެން މެދުވެރިވި ސަބަބު އަދިވެސް ދަނީ ތަހުގީގުކުރަމުންނެވެ. އަދި ރައްކާތެރިކަމުގެ މިންގަނޑުތަކާ ހިލާފުވުމުގެ ސަބަބުން މި ހާދިސާ ހިނގުމަށް މަގުފަހިވިތޯ އެ ކޮމިޓީން ކަނޑައަޅާނެ ކަމަށް ބެލެވޭ ކަމަށްވެސް އެ ނޫހުން ބުންޏެވެ.