ދޮގު މައުލޫމާތާއި ފިތުނަ އުފެދޭ ފަދަ ކަންކަމުން ދުރުހެލިވެ، ގައުމީ މަސްލަހަތު އިސްކޮށް، ޒިންމާދާރުކަމާ އެކު ހަބަރާއި މައުލޫމާތު ފެތުރުމަށް ހުރިހާ ބްރޯޑްކާސްޓަރުންނަށް، މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން (އެމްއެމްބީސީ) އިން އިލްތިމާސްކޮށްފިއެވެ.

އެ ކޮމިޝަނުން މިހެން ބުނީ، މިއަދު ފާހަގަ ކުރަމުންދާ ދިވެހިރާއްޖޭގެ ގައުމީ ބްރޯޑްކާސްޓިން ދުވަހުގެ މުނާސަބަތުގައި ނެރުނު ނޫސް ބަޔާނެއްގައެވެ.

އެ ބަޔާނުގައި ކޮމިޝަނުން ބުނެފައި ވަނީ، ބްރޯޑްކާސްޓިން ހިދުމަތަކީ ގައުމެއްގެ އިޖުތިމާއީ، ސިޔާސީ އަދި އިގުތިސޯދީ ހޭލުންތެރިކަން އިތުރުކުރުމާއި ރައްޔިތުންނަށް ތެދު މައުލޫމާތު ފޯރުކޮށްދިނުމުގައި އެންމެ މުހިންމު އެއް ވަސީލަތް ކަމަށެވެ.

ހާއްސަކޮށް އިސްލާމީ ރިވެތި އަހްލާގާއި ދިވެހި ގައުމިއްޔަތާއި ސަގާފަތް ދަމަހައްޓައި، ސައްހަ އަދި އިތުބާރު ހުރި މައުލޫމާތު މުޖުތަމައަށް ފޯރުކޮށްދިނުމުގައި ބްރޯޑްކާސްޓަރުން 29 ޑިސެމްބަރު 1962 ގައި "މާލެ ރޭޑިއޯ" ގެ ނަމުގައި ފެށިގެން އަދާކުރަމުން ގެންދަނީ އަގުހުރި ގައުމީ ހިދުމަތެއް ކަމަށްވެސް ބުނެފައިވެއެވެ.

"2007 ގައި އަމިއްލަ ފަރާތްތަކަށް ބްރޯޑްކާސްޓް ކުރުމުގެ ފުރުސަތު ހުޅުވައިލެވުނު ތާރީހީ އޮއިވަރުގެ ތެރެއިން 2010 ވަނަ އަހަރު އަމަލުކުރަން ފެށި ބްރޯޑްކާސްޓްކުރުމުގެ ގާނޫނު (16/2010) އާއެކު ބްރޯޑްކާސްޓަރުންނަށް ހާއްސަ ގާނޫނީ އޮނިގަނޑެއް ގާއިމުވެގެންދިޔަ. އަދި 18 ސެޕްޓެމްބަރު 2025 ގައި ތަސްދީގުކުރި މީޑިއާ އަދި ބްރޯޑްކާސްޓިން ރެގިއުލޭޝަން ގާނޫނު (16/2025) ގެ ދަށުން މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން (އެމްއެމްބީސީ) އުފެދި، ބްރޯޑްކާސްޓިން ދާއިރާ ވަނީ ޒަމާނީ މީޑިއާތައް އެކުވެ އައު ދައުރަކަށް ވަދެފައި،"

އެމްއެމްބީސީން ބުނީ މިއަދު ރާއްޖޭގެ ބްރޯޑްކާސްޓިން ދުވަސް ފާހަގަ ކުރާ އިރު މިއަދާ ހިސާބަށް ރާއްޖޭގައި 37 ބްރޯޑްކާސްޓަރުން އަދި 29 ރީބްރޯޑްކާސްޓަރުން ހިދުމަތް ދެމުން ގެންދާ ކަމަށެވެ.

ޓެކްނޮލޮޖީގެ ގޮތުންނާއި މީޑިއާގެ ދާއިރާއަށް އަންނަމުންދާ ބަދަލުތަކާ އެކު، ބްރޯޑްކާސްޓިން ދާއިރާ ކުރިއަރުވައި، ޒަމާނީ ވަސީލަތްތަކާ އެކު ފެންވަރު ރަނގަޅު ހިދުމަތްތަކެއް ރައްޔިތުންނަށް ފޯރުކޮށްދިނުމަށް ކޮމިޝަނުން އަބަދު ވެސް މަސައްކަތް ކުރަމުން ގެންދާނެ ކަމުގެ ޔަގީންކަން ދޭ ކަމަށްވެސް ބުނެފައިވެއެވެ.

މިގޮތުން ދާއިރާގެ މަސައްކަތްތެރިންގެ ފަންނީ ތަމްރީނުތަކާއި ގާބިލުކަން އިތުރުކުރުމާ އެކު ގާނޫނާއި ގަވާއިދުތަކުގެ އިމުގެ ތެރެއިން، މިނިވަން އަދި ޒިންމާދާރު ނޫސްވެރިކަމަކާއި ބްރޯޑްކާސްޓިން ވެއްޓެއް ގާއިމުކުރުމަށް ބާރުއެޅުމަކީ ކޮމިޝަނުގެ މައިގަނޑު އެއް އަމާޒު ކަމަށްވެސް ނޫސްބަޔާނުގައި ބުނެފައިވެއެވެ.

ބްރޯޑްކާސްޓިން ދާއިރާ ތަރައްގީކޮށް، ދާއިރާގެ މަސައްކަތްތެރިންގެ ހައްގުތައް ރައްކާތެރި ކުރުމަށް ކޮމިޝަނުން ކުރަމުންދާ މަސައްކަތްތައް ހުއްޓުމެއްނެތި ކުރިއަށްދާނެ ކަމުގެ ޔަގީންކަންދޭ ކަމަށްވެސް އެ ބަޔާނުގައި ބުނެފައިވެއެވެ.