ބޭރުގެ ފަނޑިޔާރުންނާއެކު މާކެންޓައިލް ކޯޓުތަކެއް ގާއިމުކުރަންޖެހޭ ކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.

އައްޑޫ ސިޓީ ފޭދޫގައި ރޭ ބޭއްވި ޕީއެންއެފްގެ ޖަލްސާގައި ވާހަކަފުޅުދައްކަވަމުން ޔާމީން ވިދާޅުވި ގޮތުގައި، މިފަދަ ކޯޓުތަކެއް ބޭނުންވަނީ ރާއްޖޭގައި ކުރާ ބޮޑެތި ފޮރިން އިންވެސްޓްމަންޓްތައް ހިމާޔަތްކުރުމަށެވެ.

ރާއްޖެއަށް ބޭރުގެ އިންވެސްޓްމަންޓްތައް ގެނައުމަށްޓަކައި އިގުތިސާދު ވަރުގަދަ ކުރަންޖެހޭކަން ފާހަގަކުރައްވައި ޔާމީން ވިދާޅުވީ، ފިސްކަލް އަދި މަނިޓަރީ ސިޔާސަތުތައް ހަރުދަނާކޮށް، ރާއްޖޭގެ ކްރެޑިޓް ރޭޓިންއަކީ ބަލައިގަނެވޭ މިންވަރެއްގައި އޮތް އެއްޗަކަށް ހަދަންޖެހޭ ކަމަށެވެ. މިހާރު ރާއްޖޭގެ ކްރެޑިޓް ރޭޓިންއަކީ އެއްވެސް ބަޔަކު ބަލައިލާނެ އެއްޗެއް ނޫން ކަމަށާއި، އިންވެސްޓަރުންނަށް އިގުތިސާދީ ހަކަތަ ހުރިކަން ދައްކައިދެވޭނީ ރޭޓިން ރަނގަޅުކޮށްގެން ކަމަށް ވެސް ވިދާޅުވިއެވެ.

"އަޅުގަނޑުމެންގެ އިތުބާރު ނެތީ މިހާރު ދިވެހިރާއްޖޭގެ އަދުލުގެ ނިޒާމަށް،" ކަމަށް ވިދާޅުވެ، ޔާމީން ވަނީ އުތުރުގައި ތަރައްގީކުރާ 300 ނުވަތަ 400 މިލިއަން ޑޮލަރުގެ ރިސޯޓަކަށް ދިމާވި މައްސަލައެއްގެ މިސާލު ނަންގަވައިފައެވެ. އެ މަނިކުފާނު ވިދާޅުވި ގޮތުގައި، އެ ރިސޯޓު ފެހިކުރުމަށް ގެނައި ރުއްތަކަކަށް ރިސޯޓުގެ ފަރާތުން ބްރޯކަރަކަށް ފައިސާ ދެއްކުމުން، އެ ބްރޯކަރު ވަނީ ރުކުގެ އަސްލު ވެރިންނަށް ފައިސާ ނުދީފައެވެ. މި މައްސަލަ ޝަރީއަތަށް ހުށަހެޅުމުން، ރިސޯޓުގެ ވެރިފަރާތުން ހުރިހާ ލިޔެކިޔުމެއް ދެއްކި ނަމަވެސް، ކޯޓުން މައްސަލަ އަވަހަށް ނިންމައިދީފައި ނުވާ ކަމަށް ޔާމީން ވިދާޅުވިއެވެ. މިއީ އިންވެސްޓަރުންނަށް ދިމާވާ ވަރަށް ބޮޑު މައްސަލައެއް ކަމަށް އެ މަނިކުފާނު ފާހަގަކުރެއްވިއެވެ.

މިފަދަ މައްސަލަތަކަށް ހައްލު ހޯދުމަށްޓަކައި، ސިންގަޕޫރު ފަދަ ގައުމުތަކުގައި މަސައްކަތްކޮށްފައިވާ އިތުބާރު ހުރި ފަނޑިޔާރުން ގެނެސްގެން މާކެންޓައިލް ކޯޓުތަކެއް ހެދުމަށް ޔާމީން ހުށަހެޅުއްވިއެވެ. އެ މަނިކުފާނު ވިދާޅުވި ގޮތުގައި، އެފަދަ ކޯޓުތަކަށް ހުށަހެޅޭ މައްސަލަތައް 15 ނުވަތަ 20 ދުވަހުގެ ތެރޭގައި ނިންމާނެއެވެ. އަދި އެ ފަނޑިޔާރުންނަކީ ދައުލަތުން ނުވަތަ މައްސަލައިގައި ހިމެނޭ ފަރާތަކުން ނުފޫޒު ނުފޯރުވޭނެ، ގަނެނުލެވޭނެ ފަނޑިޔާރުންނަށް ވާންޖެހޭނެ ކަމަށް ވެސް ވިދާޅުވިއެވެ. ރާއްޖޭގެ ފަތުރުވެރިކަމަކީ މަލްޓި ބިލިއަން ޑޮލަރުގެ ސިނާއަތަކަށްވާ އިރު، އެފަދަ ފަނޑިޔާރުންނަށް މަހަކު 60،000 ޑޮލަރުގެ މުސާރައެއް ދޭންޖެހުނު ނަމަވެސް، އެއީ ރާއްޖެއަށް ކުރެވޭނެ ކަމެއް ކަމަށް ޔާމީން ވިދާޅުވިއެވެ.