ސައުދީ އަރަބިއްޔާގެ މަދަދު ލިބޭ ޔަމަނުގެ ސަރުކާރު ސިފައިން، ހޫތީންގެ ބާރުގެ ދަށުގައި އޮންނަ ވެރިރަށް ސަންއާއަށް ވައިގެ ހަމަލާތަކެއް ދީފިއެވެ.

އޭއެފްޕީގެ ނޫސްވެރިންނާ ހަވާލާދީ މީޑިއާތަކުން ރިޕޯޓުކޮށްފައިވާ ގޮތުގައި، ހޮނިހިރު ދުވަހު ސަންއާގެ އެކި ސަރަހައްދުތަކަށް އަމާޒުކޮށް ދިން މި ހަމަލާތަކުގައި ބާރުގަދަ ފަސް ގޮވުމެއްގެ އަޑު އިވިފައިވެއެވެ. ދެ ފައިޓާ ޖެޓުން ސަންއާއަށް މިސައިލް ފޮނުވި މަންޒަރު ފެނިފައިވާ ކަމަށްވެސް ރިޕޯޓުކޮށްފައިވެއެވެ.

އަލްޖަޒީރާއިން ރިޕޯޓުކޮށްފައިވާ ގޮތުގައި، ބައިނަލްއަގުވާމީ ގޮތުން ބަލައިގަނެފައިވާ ޔަމަނުގެ ސަރުކާރުން ބުނީ މި ހަމަލާތައް އަމާޒުކުރީ ސަންއާގައި ހުރި މުހިންމު އަސްކަރީ އަމާޒުތަކަށް ކަމަށެވެ. ނަމަވެސް، ހޫތީންނާ ގުޅުން އޮންނަ އަލް މަސީރާ ޓީވީން ބުނި ގޮތުގައި، ސައުދީން ދިން މި ހަމަލާތައް އަމާޒުވެފައިވަނީ އާންމުންގެ ތަންތަނަށާއި ހޮސްޕިޓާތަކަށެވެ.

މި ހަމަލާތަކާއި ކުރިމަތިލުންތަކުގެ ސަބަބުން ގިނަ ބަޔަކަށް ވަނީ ގެދޮރު ދޫކޮށް ދާން މަޖުބޫރުވެފައެވެ. ޔަމަނުގެ އެގްޒެކެޓިވް ޔުނިޓް ފޯ އިންޓާނަލީ ޑިސްޕްލޭސްޑް ޕާސަންސް ކޭމްޕްސް މެނޭޖްމަންޓުން ހާމަކޮށްފައިވާ ތަފާސްހިސާބުތައް ދައްކާ ގޮތުން، ޖުލައި މަހު އަލުން ހަމަނުޖެހުންތައް ފެށުނު ފަހުން މިހާތަނަށް 1 ލައްކަ 97،000 އަށްވުރެ ގިނަ މީހުން ވަނީ ގެދޮރު ދޫކޮށް ގޮސްފައެވެ. މީގެ ތެރެއިން އެންމެ ގިނަ ބަޔަކު ބަދަލުވެފައިވަނީ ތައިޒް އަދި ލާހިޖް ސަރަހައްދަށެވެ.

ޔަމަނުގެ ދާހިލީ ހަނގުރާމަ އަލުން ހޫނުވެފައިވަނީ، 2022 ވަނަ އަހަރު ވެފައިވާ ހަމަލާތައް މެދުކަނޑާލުމުގެ އެއްބަސްވުން މިދިޔަ ޖުލައި މަހު އުވާލުމާ ގުޅިގެންނެވެ.