ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ) ގެ ގައުމީ މަޖިލީހުގެ އިންތިހާބު އަންނަ ނޮވެމްބަރު މަހުގެ 27 ވަނަ ދުވަހު ބާއްވަން އެ ޕާޓީން ނިންމައިފިއެވެ.

މިކަން އިއުލާންކުރެއްވީ އެމްޑީޕީގެ ފަސްވަނަ ކޮންގްރެސް ނިންމުމަށް މިރޭ ބޭއްވި ރަސްމިއްޔާތުގައި، ޕާޓީގެ ޗެއާޕާސަން އަދި ކުރީގެ ރައީސް މުހައްމަދު ނަޝީދެވެ.

އިންތިހާބު ބާއްވާނެ ތާރީހު އިއުލާންކުރެއްވި ނަމަވެސް، އެކަމާ ގުޅޭ އިތުރު ތަފުސީލެއް އެ މަނިކުފާނު ހާމައެއް ނުކުރައްވައެވެ.

"އަސާސީ ގަވައިދަށް ގެންނެވި ހަތަރުވަނަ އިސްލާހާ އެއްގޮތަށް ގައުމީ މަޖިލީހުގެ އިންތިހާބު 27 ނޮވެމްބަރު 2026 ވާ ހުކުރު ދުވަހު އޮންނާނެ ވާހަކަ އާންމުކޮށް އަންގައި އިއުލާނުކުރަން،" އެމްޑީޕީގެ ރައީސްކަންވެސް ކުރެއްވި ނަޝީދު ވިދާޅުވިއެވެ.

މިދިޔަ ބުރާސްފަތި ދުވަހު ފެށި އެމްޑީޕީގެ ކޮންގްރެސް މިރޭ ނިންމާލީ އެ ޕާޓީގެ އަސާސީ ގަވާއިދަށް ބޮޑެތި އިސްލާހުތަކެއް ގެނައުމަށް ފަހުގައެވެ. މިއަދު ހަވީރު ބޭއްވި ސެޝަންގައި މި އިސްލާހުތައް ފާސްކޮށްފައިވަނީ 500 އަށްވުރެ ގިނަ މެންބަރުންގެ ވޯޓުންނެވެ.

އަސާސީ ގަވާއިދަށް ގެނައި އެންމެ މުހިންމު އެއް ބަދަލަކީ ޕާޓީގެ ރައީސްގެ މަގާމު އުވާލައި، ޗެއާޕާސަނަކީ ޕާޓީގެ އެންމެ އިސް މަގާމު ކަމުގައި ކަނޑައެޅުމެވެ. މީގެ އިތުރުން ޕާޓީގެ ނައިބު ރައީސުންގެ އަދަދު ތިނަކަށް އިތުރުކޮށް، އޭގެ ތެރެއިން އެކަކީ އަންހެން މެންބަރަކަށް ހެދުމަށްވެސް ވަނީ ފާސްކޮށްފައެވެ.

އެމްޑީޕީގެ ގައުމީ މަޖިލީހަކީ ޕާޓީގެ އެންމެ މުހިންމު ނިންމުންތައް ނިންމައި ސިޔާސަތުތައް ކަނޑައަޅާ މައިގަނޑު ގުނަވަނެވެ. އެއީ ދާއިރާތަކުގެ އާންމު މެންބަރުންގެ ވޯޓުން ހޮވާ މަންދޫބުންގެ މައްޗަށް އެކުލެވޭ މަޖިލީހެކެވެ.

މި ކޮންގްރެސްގައި ޕާޓީގެ ސިޔާސަތުތަކާ ގުޅުންހުރި މުހިންމު ގަރާރެއްވެސް ވަނީ ފާސްކޮށްފައެވެ. އަދި ކޮންގްރެސްގެ ހަވާސާގައި ކައުންސިލުތަކަށް ހާއްސަކޮށްގެން އިންވެސްޓްމަންޓް ފޯރަމެއްވެސް ވަނީ ބާއްވާފައެވެ.