އެސްޓީއޯގެ ސާވިސް ސެންޓަރުގެ ފުރާޅަށް އަރައި އެތަނުގެ އެއާކޮންޑިޝަންތަކަކަށް ގެއްލުންދިން މީހަކު ފަސް މަހާއި 28 ދުވަަހަށް ޖަަލަށްލާން ކުރިމިނަލް ކޯޓުން ހުކުމްކޮށްފިއެވެ.

އެ މައްސަަލައިގައި ޖަލަށްލާން ކުރިމިނަލް ކޯޓުން ހުކުމް ކުރީ ސ. ފޭދޫ އެލޯހައުސް މުހައްމަދު ޝިއުނީޒްގެ މައްޗަށެވެ.

މާލޭގެ ހަވީރީ ހިނގުމާއި އާބުރުޒުހިނގުމާ ގުޅޭ ކަންމަތީގައި ހުންނަ އެސްޓީއޯގެ ސާވިސް ސެންޓަރުގެ ފުރާޅުމައްޗަށް ހުއްދަނެތި އެރި މައްސަލައިގައި އޭނާގެ މައްޗަށް ދެ ދައުވާއެއް ދައުލަތުން ކުރިއެވެ. އެއީ އެނގިހުރެ ހުއްދަނޫން ތަނަކަށް ވަނުމުގެ ދައުވާ އާއި މުދަލަށް ގެއްލުން ދިނުމުގެ ދައުވާއެވެ.

އޭނާގެ މައްޗަށް އެނގިހުރެ ހުއްދަނޫން ތަނަކަށް ވަނުމުގެ ދައުވާ ކުރީ، އެސްޓީއޯގެ ސާވިސް ސެންޓަރުގެ ފުރާޅު މައްޗަށް އެތަނުގެ ހުއްދަނެތި އަރާފައިވާތީއެވެ.

އެ މައްސަލައިގައި ޖިނާއީ އިޖުރާއަތުގެ ގާނޫނުގެ ދަށުން އޭނާގެ މައްޗަށް ހުކުމް ކުރީ، ދެ މަހާއި 28 ދުވަހުގެ މުއްދަތަށް ޖަލަށްލުމަށެވެ. އަދި އެ ތަނަށް އަރައި އެތަނުގައި ހަރުކޮށްފައި ހުރި ތިން އެއާ ކޮންޑިޝަންގެ އައުޓްޑޯ އުނިޓް ރޫޅާލައި އެތަކެއްޗަށް ގެއްލުން ދީފައިވާތީ އޭނާގެ މައްޗަށް ކުރި، މުދަލަށް ގެއްލުން ދިނުމުގެ ދައުވާ ސާބިތުވެގެން އޭނާގެ މައްޗަށް ހުކުމް ކުރީ ތިން މަސް ދުވަހަށް ޖަލަށްލުމަށެވެ.