ފަހި ދިރިއުޅުން ކޯޕަރޭޝަން (އެފްޑީސީ)ގެ ބެލުމުގެ ދަށުގައިވާ ފްލެޓްތަކުގެ ތެރެއިން 564 ޔުނިޓަކުން ގަވާއިދުން މަހުން މަހަށް ކުލި ނުދައްކާ ކަމަށް އެފްޑީސީން ބުނެފިއެވެ.

އެފްޑީސީން މިއަދު އެކްސްގައި ކުރި ޕޯސްޓެއްގައި ބުނީ ގަވާއިދުން ކުލި ދައްކަމުން ދަނީ 3،362 ފްލެޓުން ކަމަށެވެ. ނަމަވެސް ބާކީ 564 ފްލެޓުން ފައިސާ ދެއްކުމުގައި ގަވާއިދަށް އަމަލު ނުކުރާ ކަމަށް އެފްޑީސީން ބުންޏެވެ.

ކުލި ނުދެއްކުމުގެ އިތުރުން، އުސޫލުތަކާ ހިލާފުވެގެން 49 ޝަކުވާއެއް ހުށަހަޅާފައިވާ ކަމަށް އެފްޑީސީން ބުންޏެވެ. އޭގެ ތެރޭގައި އެންމެ ގިނައީ ހުއްދަ ނުހޯދައި އެޕާޓްމަންޓްތަކަށް ބަދަލު ގެނައުމުގެ މައްސަލަތައް ކަމަށް އެފްޑީސީން ބުންޏެވެ. އެގޮތުން، ރިޕޯޓްކުރި 28 މައްސަލައިގެ ތެރެއިން ފަސް ފަރާތެއް ޖޫރިމަނާކޮށްފައިވާ އިރު، 23 މައްސަލައެއް އަދިވެސް ދަނީ ބަލަމުން ކަމަށް އެފްޑީސީން ބުންޏެވެ.

ދެވަނައަށް އެންމެ ގިނައިން ފާހަގަކުރެވުނީ އުސޫލާ ހިލާފަށް ސަބްލީސްކުރުން ނުވަތަ އެހެން ފަރާތްތަކަށް ކުއްޔަށް ދިނުމުގެ މައްސަލަތައް ކަމަށް އެފްޑީސީން ބުންޏެވެ. އެފަދަ 16 މައްސަލައިގެ ތެރެއިން ފަސް ފަރާތެއް ޖޫރިމަނާކޮށް، ދެ ފަރާތަކަށް ނޯޓިސް ދީފައިވާ ކަމަށް އެފްޑީސީން ބުންޏެވެ. އަދި ބާކީ ނުވަ މައްސަލަ ބަލަމުންދާ ކަމަށް އެފްޑީސީން ބުންޏެވެ.

މީގެ އިތުރުން، އެ ތަނުގައި ކުނި އެޅުމުގެ ގަވާއިދާ ހިލާފުވި ތިން މައްސަލައެއްގެ ތެރެއިން ދެ މައްސަލައެއްގައި ޖޫރިމަނާ ކޮށްފައިވާ އިރު، އޮފީހުގެ އެންގުންތަކަށް ބޯނުލެނބުމުގެ ދެ މައްސަލައެއް ބަލައި ފިޔަވަޅު އެޅުމުގެ މަސައްކަތް ކުރަމުންދާ ކަމަށް އެފްޑީސީން ބުންޏެވެ.