އާންމު އިޖުތިމާއީ މިންގަނޑާ ހިލާފަށް، ނިވާކަން ކުޑަކޮށް ހެދުން އަޅައިގެން އާންމު ތަންތަނުގައި އުޅޭ ބިދޭސީންނަށް ފިޔަވަޅު އަޅާނެ ކަމުގެ އިންޒާރު ފުލުހުން ދީފިއެވެ.

ފުލުހުން މިއަދު ނެރުނު ބަޔާނެއްގައި ބުނީ ދިވެހި މުޖުތަމައުގެ އަހުލާގީ އަދި އާންމު އިޖުތިމާއީ މިންގަނޑުތައް ހިފެހެއްޓުމަކީ ރާއްޖޭގައި ދިރިއުޅޭ އެންމެހައި ފަރާތްތަކުން އަދާކުރަންޖެހޭ އާންމު މަސްއޫލިއްޔަތެއް ކަމަށެވެ. އަދި ރާއްޖޭގައި ދިރިއުޅޭ ބިދޭސީން ދިވެހި މުޖުތަމައުގެ ސަގާފަތާއި އާދަކާދަ އަށް އިހުތިރާމްކޮށް، އާންމު ތަންތަނާއި މަގުމަތީގައި އުޅޭ އުޅުމުގައި، މުޖުތަމައުގެ އާންމު އިޖުތިމާއީ އަދި އަހުލާގީ މިންގަނޑުތައް ހިފެހެއްޓުމަށް އިލްތިމާސް ކުރާ ކަމަށް ވެސް ބަޔާނުގައި ބުންޏެވެ.

ފުލުހުން ބުނީ ރާއްޖޭގައި ދިރިއުޅޭ ބައެއް ބިދޭސީން އާންމު އިޖުތިމާއީ މިންގަނޑުތަކާ ހިލާފަށް ނިވާކަން ކުޑަކޮށް ހެދުން އަޅައިގެން މަގުމަތީގައި އަދި އެނޫން އާންމު ތަންތަނުގައި އުޅޭކަން ފާހަގަކުރެވިފައިވާ ކަމަށެވެ. އަދި ބައެއް ބިދޭސީންގެ މިފަދަ އަމަލުތަކަކީ، މުޖުތަމައުގެ އާންމު ސުލޫކީ އަދި އަހުލާގީ މިންގަނޑުތަކާ ހިލާފު އަމަލުތަކެއް ކަމަށާއި އޭގެ ސަބަބުން މުޖުތަމައުގެ އަމާންކަމާއި ސުލްހަ މަސަލަސްކަމަށް ނޭދެވޭ އަސަރުކޮށްފާނެ ކަމަށެވެ.

"....ހާލަތްތަކެއް ކުރިމަތިވުމުގެ ކުރިން އެފަދަ ކަންކަން ހުއްޓުވުމަށް މި ހިދުމަތަށް މަތިކޮށްފައިވާ ގާނޫނީ ޒިންމާ އަދާ ކޮށް އެފަދަ ފަރާތްތަކާ މެދު ގާނޫނު ނަންބަރު 2010/11 (އާންމު އިޖްތިމާއީ މިންގަނޑުތަކާ ހިލާފު އަމަލުތައް ހުއްޓުވުމުގެ ގާނޫނު) ގެ ދަށުން އެޅެންހުރި ފިޔަވަޅު އަޅާނެކަމުގައި ދަންނަވަމެވެ." ފުލުހުން ބުންޏެވެ.

ފުލުހުން ބުނީ ރާއްޖޭގައި ދިރިއުޅޭ ބިދޭސީންގެ ކިބައިން މިފަދަ އަމަލުތައް ނުފެންނާނެ ގޮތަކަށް އަމަލުތައް ބެހެއްޓުމަށް ހާއްސަ ސަމާލުކަމެއް ދިނުމަށް ބިދޭސީންނާ ހަވާލުވެ ތިބޭ ފަރާތްތަކަށް އިލްތިމާސް ކުރާ ކަމަށެވެ.

ރާއްޖޭގައި ދިރިއުޅޭ ފަރާތްތަކުގެ އިތުރުން ރާއްޖެއަށް ޒިޔާތްކުރާ ފަތުރުވެރިންނަށް ހާއްސަ ސަރަހައްދުތައް ފިޔަވައި، އެނޫން އާންމު ތަންތަނާއި މަގުތަކުގައި ފަތުރުވެރިން އުޅޭ އުޅުމުގައި ދިވެހި މުޖުތަމައުގެ ސަގާފަތާއި އާދަކާދައަށް އިހުތިރާމުކޮށް، މުޖުތަމައުގެ އާންމު އިޖުތިމާއީ މިންގަނޑުތަކާ އެއްގޮތަށް ހެދުން އެޅުމަށް އިލްތިމާސް ކުރާ ކަމަށެވެ. އަދި މިއާ ހިލާފަށް ޢަމަލުކުރާ ފަރާތްތަކާ މެދު ގާނޫނީ ފިޔަވަޅު އަޅާނެ ކަމަށް ވެސް ފުލުހުން ބުންޏެވެ.