އެމެރިކާގެ ރައީސް ޑޮނަލްޑް ޓްރަމްޕް އީރާނުގެ ހަނގުރާމައިގެ ކަންކަން ކުރިއަށްގެންދަވާ ގޮތާ މެދު އެމެރިކާގެ 71 އިންސައްތަ މީހުން ހިތްހަމަނުޖެހޭ ކަމަށް، އެސޯޝިއޭޓެޑް ޕްރެސް (އޭޕީ) އާއި ނޯކް ރިސާޗް ސެންޓަރުން އާންމުކުރި ހިޔާލު ހޯދުމުގެ ވޯޓަކުން ދައްކައިފިއެވެ.

ބުރާސްފަތި ދުވަހު އާންމުކުރި މި ސާވޭގެ ނަތީޖާ ދައްކާ ގޮތުން، 69 އިންސައްތަ މީހުން ދެކޭ ގޮތުގައި އީރާނާ ދެކޮޅަށް ކުރާ ހަނގުރާމައަކީ ކުރަން ހެޔޮވާވަރުގެ ކަމެއް ނޫނެވެ.

އޭޕީ-ނޯކްގެ ސާވޭ ރިޕޯޓުގައި ބުނެފައިވާ ގޮތުގައި، 2025 ވަނަ އަހަރު ޓްރަމްޕް ދެވަނަ ދައުރަކަށް އިންތިހާބުވި ފަހުން ގައުމުގެ އިގުތިސޯދާއި އާންމު ހާލަތު ގޯސްވެފައިވާ ކަމަށް ދެބައިކުޅަ އެއްބަޔަށް ވުރެ ގިނަ މީހުން ގަބޫލުކުރެއެވެ. ގައުމުގެ މިސްރާބު ހުރީ ގޯސްކޮށް ކަމަށް 73 އިންސައްތަ މީހުން ބުނެފައިވާއިރު، އޭގެ ތެރޭގައި ޑިމޮކްރެޓިކް ޕާޓީއަށް ނިސްބަތްވާ 92 އިންސައްތަ މީހުންނާއި ރިޕަބްލިކަން ޕާޓީގެ 47 އިންސައްތަ މީހުން ހިމެނޭ ކަމަށް ވެސް އެ ރިޕޯޓުގައިވެއެވެ.

ފެބްރުއަރީ މަހުގެ ފަހުކޮޅު ފެށި މި ހަނގުރާމަޔާ މެދު އެމެރިކާގެ އާންމުންގެ މެދުގައި ނުރުހުންތެރިކަން އޮތްކަން މި ސާވޭއިން ހާމަވެފައިވާއިރު، މިއީ ކުރިއަށް އޮތް ނޮވެންބަރު މަހު ބާއްވާ މިޑްޓާމް އިންތިހާބުގައި ރިޕަބްލިކަން ޕާޓީއަށް އޭގެ ނޭދެވޭ އަސަރުކޮށްފާނެ ކަމެއް ކަމަށް މީޑިއާތަކުން ރިޕޯޓުކޮށްފައިވެއެވެ.

މި ނަތީޖާތަކާ ގުޅިގެން ވައިޓް ހައުސްގެ ބޭރުގައި ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވި ގޮތުގައި، ހަނގުރާމައިގެ ސަބަބުން އިންތިހާބުގައި ރިޕަބްލިކަން ޕާޓީއަށް ގެއްލުންވުމަކީ އެކަށީގެންވާ ކަމެކެވެ. ނަމަވެސް އޭނާ ވިދާޅުވީ، އީރާނުން ނިއުކްލިއާ ހަތިޔާރު ހޯދުން ހުއްޓުވުމަށްޓަކައި މި ހަނގުރާމަ ކުރުން މުހިންމު ކަމަށެވެ.

މި ދަނޑިވަޅުގައި، އެމެރިކާގެ ދިފާއީ ވުޒާރާ (ޕެންޓަގަން) އިން މެދުއިރުމައްޗަށް އިތުރު މަނަވަރުތަކަކާއި 10،000 ސިފައިން ފޮނުވަން ނިންމާފައިވާ ކަމަށް އެމެރިކާގެ އޮފިޝަލުންނާ ހަވާލާދީ ވޯލް ސްޓްރީޓް ޖާނަލްއިން ރިޕޯޓުކޮށްފައިވެއެވެ.

އޭޕީ-ނޯކްގެ މި ސާވޭގެ އިތުރުން، ސީއެންއެން އިން ދާދި ފަހުން ހެދި ސާވޭއަކުން ވެސް ދައްކާ ގޮތުގައި ޓްރަމްޕްގެ ހާރިޖީ ސިޔާސަތުތަކާ މެދު 71 އިންސައްތަ މީހުން ހިތްހަމައެއް ނުޖެހެއެވެ. އަދި އީރާނުގެ މައްސަލަ ހައްލުކުރުމަށް ޓްރަމްޕް ގެންގުޅުއްވާ ސިޔާސަތަށް ތާއީދުކުރަނީ އެންމެ 26 އިންސައްތަ މީހުން ކަމަށް ސީއެންއެންގެ ސާވޭއިން ދައްކައެވެ.