މިދިޔަ މަހުގެ 24 ގެ ނިޔަލަށް ދައުލަތަށް އާމްދަނީ އާއި ހިލޭ އެހީގެ ގޮތުގައި 30.205 ބިލިއަން ރުފިޔާ ލިބިއްޖެއެވެ.

ފިނޭންސް މިނިސްޓްރީން މިއަދު އާންމުކުރި ތަފާސްހިސާބުތަކުން ދައްކާ ގޮތުގައި، މިދިޔަ މަހުގެ 24 ގެ ނިޔަލަށް ދައުލަތަށް އާމްދަނީ އާއި ހިލޭ އެހީގެ ގޮތުގައި 30.205 ބިލިއަން ރުފިޔާ ލިބިފައިވާ އިރު، މިއީ މިދިޔަ އަހަރުގެ އެ މުއްދަތުގައި ލިބުނު 28.750 ބިލިއަން ރުފިޔާއާ އަޅައިބަލާއިރު 5.1 ޕަސަންޓުގެ ކުރިއެރުމެކެވެ.

މިނިސްޓްރީގެ ތަފާސްހިސާބުން އެނގޭ ގޮތުގައި މީގެ ތެރެއިން ޓެކުހުގެ ގޮތުގައި ލިބުނު އާމްދަނީ ވަނީ 21.366 ބިލިއަން ރުފިޔާއިން 23.388 ބިލިއަން ރުފިޔާއަށް އިތުރުވެ، 9.5 ޕަސަންޓުގެ ކުރިއެރުމެއް ހޯދައިފައެވެ.

މިދިޔަ ހަފުތާގައި ދައުލަތަށް ލިބުނު މައިގަނޑު އާމްދަނީގެ ތެރޭގައި ފަތުރުވެރިކަމުގެ ދާއިރާގެ މުދަލާއި ހިދުމަތުގެ އަގުން ނަގާ ޓެކްސް (ޓީޖީއެސްޓީ) ހިމެނެއެވެ. އެގޮތުން ޓީޖީއެސްޓީގެ ގޮތުގައި މިހާތަނަށް 7.880 ބިލިއަން ރުފިޔާ ލިބިފައިވާ އިރު، މިއީ މިދިޔަ އަހަރުގެ އެ މުއްދަތުގައި ލިބުނު 7.669 ބިލިއަން ރުފިޔާއާ އަޅައިބަލާއިރު 2.7 ޕަސަންޓުގެ އިތުރުވުމެކެވެ. މީގެ އިތުރުން ރިސޯޓް ކުލީގެ ގޮތުގައި ލިބުނު އާމްދަނީ 1.245 ބިލިއަން ރުފިޔާއިން 1.267 ބިލިއަން ރުފިޔާއަށް އުފުލި، 1.7 ޕަސަންޓުގެ ކުރިއެރުމެއް ވަނީ ލިބިފައެވެ.

އާމްދަނީ ލިބޭ އެހެނިހެން ދާއިރާތަކުން ވެސް މިދިޔަ އަހަރާ އަޅައިބަލާއިރު ކުރިއެރުންތަކެއް ވަނީ ފެނިފައެވެ. އެގޮތުން އިމްޕޯޓް ޑިއުޓީ 13.1 ޕަސަންޓު އިތުރުވެ 2.484 ބިލިއަން ރުފިޔާ ލިބިފައިވާ އިރު، ވިޔަފާރި އާއި މުދަލުގެ ޓެކުހުން ލިބުނު އާމްދަނީ 21.4 ޕަސަންޓު އިތުރުވެ 5.778 ބިލިއަން ރުފިޔާއަށް ވަނީ އަރައިފައެވެ.

އާންމު މުދަލާއި ހިދުމަތުގެ ޓެކްސް (ޖީއެސްޓީ) 10.8 ޕަސަންޓު އިތުރުވެ 4.051 ބިލިއަން ރުފިޔާ ލިބިފައިވާ އިރު، އެއާޕޯޓް ސާވިސް ޗާޖާއި ޑިޕާޗާ ޓެކުހުން ލިބުނު އާމްދަނީ 8.8 ޕަސަންޓު އިތުރުވެ 1.431 ބިލިއަން ރުފިޔާއަށް ވަނީ އުފުލިފައެވެ. މުދަލުން ލިބޭ އާމްދަނީ 25.3 ޕަސަންޓު އިތުރުވެ 1.856 ބިލިއަން ރުފިޔާ ލިބިފައިވާ އިރު، ހިލޭ އެހީގެ ގޮތުގައި ލިބުނު މިންވަރު ދެގުނައަށްވުރެ އިތުރުވެ 0.237 ބިލިއަން ރުފިޔާއިން 0.496 ބިލިއަން ރުފިޔާއަށް ވަނީ މަތިވެފައެވެ.

ދައުލަތުގެ ޖުމްލަ ހަރަދު މިދިޔަ މަހުގެ 24ގެ ނިޔަލަށް ހުރީ 33.562 ބިލިއަން ރުފިޔާގައެވެ. މިއީ މިދިޔަ އަހަރުގެ އެ މުއްދަތުގައި ހަރަދުކުރި 28.251 ބިލިއަން ރުފިޔާއާ އަޅައިބަލާއިރު 18.8 ޕަސަންޓު އިތުރު އަދަދެކެވެ. ރިކަރަންޓް ހަރަދުތައް 24.321 ބިލިއަން ރުފިޔާއިން 28.897 ބިލިއަން ރުފިޔާއަށް ނުވަތަ 18.8 ޕަސަންޓު ވަނީ އިތުރުވެފައެވެ. މީގެ ތެރެއިން އާސަންދައަށް ކުރި ހަރަދު 23.3 ޕަސަންޓު އިތުރުވެ 1.748 ބިލިއަން ރުފިޔާއަށް ވަނީ އަރައިފައެވެ.

ރިކަރަންޓް ހަރަދުތަކުގެ ތެރެއިން މުސާރަ އާއި އިނާޔަތްތަކަށް ކުރި ހަރަދު 10.1 ޕަސަންޓު އިތުރުވެ 10.702 ބިލިއަން ރުފިޔާއަށް އަރާފައިވާ އިރު، އިދާރީ އަދި ހިންގުމުގެ ހަރަދުތައް 24.3 ޕަސަންޓު އިތުރުވެ 18.123 ބިލިއަން ރުފިޔާއަށް ވަނީ މަތިވެފައެވެ. ސަބްސިޑީއަށް ކުރި ހަރަދު 77.1 ޕަސަންޓު އިތުރުވެ 4.148 ބިލިއަން ރުފިޔާއަށް އަރާފައިވާ އިރު، ކައުންސިލްތަކަށް ދިން ގްރާންޓް 16.6 ޕަސަންޓު އިތުރުވެ 1.884 ބިލިއަން ރުފިޔާއަށް ވަނީ އުފުލިފައެވެ. އަދި އެހެނިހެން އެހީތަކާއި އިނާޔަތްތަކަށް ކުރި ހަރަދު 53.3 ޕަސަންޓު އިތުރުވެ 1.899 ބިލިއަން ރުފިޔާއަށް ވަނީ އަރައިފައެވެ.

ތަރައްގީގެ މަޝްރޫއުތަކަށް ކުރާ ހަރަދު ނުވަތަ ކެޕިޓަލް ހަރަދުތައް 18.7 ޕަސަންޓު އިތުރުވެ 4.666 ބިލިއަން ރުފިޔާއަށް ވަނީ އަރައިފައެވެ.

މީގެ ތެރެއިން އުމްރާނީ ތަރައްގީގެ ވަސީލަތްތަކަށް ކުރި ހަރަދު 18.7 ޕަސަންޓު އިތުރުވެ 4.109 ބިލިއަން ރުފިޔާއަށް އަރާފައިވެއެވެ. އޭގެ ތެރޭގައި ބިމާއި އިމާރާތްތަކަށް ކުރި ހަރަދު 35.2 ޕަސަންޓު، ފާލަމާއި ބަނދަރު ހެދުމަށް ކުރި ހަރަދު 57.3 ޕަސަންޓު، އަދި އެހެނިހެން އުމްރާނީ ވަސީލަތްތަކަށް ކުރި ހަރަދު 49.3 ޕަސަންޓު އިތުރުވެފައިވެއެވެ. މީގެ އިތުރުން ކެޕިޓަލް އިކުއިޕްމަންޓަށް ކުރި ހަރަދު ވެސް ވަނީ 18.6 ޕަސަންޓު އިތުރުވެ 0.540 ބިލިއަން ރުފިޔާއަށް އަރައިފައެވެ.

ތަފާސްހިސާބުތައް ދައްކާ ގޮތުގައި މިދިޔަ މަހުގެ 24ގެ ނިޔަލަށް ދައުލަތުގެ ޕްރައިމަރީ ސާޕްލަސް އަކީ 0.442 ބިލިއަން ރުފިޔާއެވެ.