ރައީސް ޑރ. މުހައްމަދު މުއިއްޒު އާއި ޗައިނާގެ ރައީސް ޝީ ޖިންޕިންގެ ބަދަލުވުމަށް ފަހު ދެ ގައުމުގެ ގުޅުމުގެ ބިންގާ އިތުރަށް ވަރުގަދަވެފައިވާ ކަމަށް ރާއްޖޭގައި ހުންނަވާ ޗައިނާ ސަފީރު ކޮންގް ޝިއުންހުއާ ވިދާޅުވެއްޖެއެވެ.

ޗައިނާގެ 77 ވަނަ ގައުމީ ދުވަހުގެ މުނާސަބަތުގައި އެކްސްގައި ކުރެއްވި ޕޯސްޓެއްގައި ސަފީރު ވިދާޅުވީ ޗައިނާގެ އުފާވެރި މުނާސަބަތު ދެ ގައުމުގެ ރައްޔިތުން ވެސް ހިއްސާކުރާ ކަމަށެވެ.

ސަފީރު ވިދާޅުވީ 2024 ވަނަ އަހަރު ދެ ގައުމުގެ އިސްވެރިންގެ މެދުގައި ބޭއްވުނު ތާރީހީ ބައްދަލުވުމުގެ ސަބަބުން، އެކި ދާއިރާތަކުން ރާއްޖެ އާއި ޗައިނާގެ ގައުމުގެ ގުޅުމުގެ ބިންގާ އިތުރަށް ވަރުގަދަވެފައިވާ ކަމަށެވެ.

ޗައިނާ ސަފީރު ވިދާޅުވީ ރާއްޖެއާ އެކު ޒަމާނުއްސުރެ އޮތް ގާތް ގުޅުމުގެ އަގުވަޒަންކުރާ ކަމަށެވެ.

ޗައިނާގެ ގައުމީ ދުވަހުގެ މުނާސަބަތުގައި ރައީސް ވެސް ވަނީ ތަހުނިޔާ ވިދާޅުވެ އެކްސްގައި ޕޯސްޓެއް ކުރައްވައިފައެވެ.

ރައީސް ވިދާޅުވީ ރާއްޖެ އާއި ޗައިނާއާ ދެމެދު އޮތީ އެއް ގައުމު އަނެއް ގައުމަށް އޮތް އިހްތިރާމާއި އިތުބާރުގެ މައްޗަށް ބިނާވެފައިވާ ބަދަހި ރަހުމަތްތެރިކަމުގެ ގުޅުމެއް ކަމަށެވެ.

އަދި ދެ ގައުމުން ވެސް ގެންގުޅެނީ ތަރައްގީ އާއި ފާގަތިކަމަށް އޮތް އެއްގޮތް ތަސައްވުރެއް ކަމަށާއި މި ގުޅުމުގެ ސަބަބުން ދެ ގައުމުގެ ރައްޔިތުންނަށް ވެސް މާނަ ހުރި ގިނަ ފުރުސަތުތަކެއް ފަހިވަމުންދާ ކަމަށް ވެސް ރައީސް ވިދާޅުވިއެވެ.

ރައީސް އިތުރަށް ވިދާޅުވީ ދެ ގައުމުގެ ދެމެދުގައި ގާއިމުކުރެވިފައިވާ އިސްތިރާޖީ ގުޅުން އިތުރަށް ބަދަހިކޮށް އާ ހަރުފަތަކަށް ގެންދިއުމަށް ދިވެހި ސަރުކާރުން އަބަދުވެސް ސާބިތުކަމާއެކު އޮންނާނެ ކަމަށެވެ.

ޗައިނާގެ ގައުމީ ދުވަހުގެ ގޮތުގައި ފާހަގަކުރަނީ އޮކްޓޫބަރު މަހުގެ ފުރަތަމަ ދުވަހެވެ. މި ދުވަހަކީ 1949 ވަނަ އަހަރު ޕީޕަލްސް ރިޕަބްލިކް އޮފް ޗައިނާ އުފެދުނު ދުވަހެވެ.

ރާއްޖެ އާއި ޗައިނާއާ ދެމެދު ސިޔާސީ ގުޅުން ގާއިމުކޮށްފައިވަނީ 1972 ވަނަ އަހަރުގެ އޮކްޓޫބަރު މަހުގެ 14 ވަނަ ދުވަހުއެވެ. މި އަހަރަށް 54 ފުރޭނެއެވެ.