ކައިވެނި ކުރަން ކޮންމެ ކޯޓަކަށް ހުށަހެޅިޔަސް، ކައިވެނި ފޯމާއެކު، ތެލަސީމިއާ 'ވާރުތަ ކާޑު' ހުށަހެޅުން ލާޒިމްކޮށްފިއެވެ.

ކައިވެނި ކުރަން ހުށަހަޅާ ފޯމާއެކު ތެލަސީމިއާ ކާޑު ހުށަހެޅުމަށް މީގެ ކުރިން ވެސް އޮވެ އެވެ. ނަމަވެސް އެކަން ލާޒިމުކުރުމާއި ނުކުރުން ބޮޑަށް އޮންނަނީ އެ ކޯޓަކަށް ދޫކޮށްލައިފައެވެ. އެހެންކަމުން ބައެއް ރަށްރަށުގެ ކޯޓުތަކުން ކައިވެނިކޮށްދޭއިރު ވާރުތަ ކާޑަކަށް ނުބަލައެވެ.

ނަމަވެސް މިދިޔަ ޖުލައި މަހު ގެޒެޓްކޮށް، މާދަމާއިން ފެށިގެން އަމަލު ކުރާ މެޖިސްޓްރޭޓް ކޯޓުގެ ގަވައިދުގައިވާ ގޮތުން ކައިވެނިކުރުމަށް އެދި ހުށަހަޅާ އިރު، ކައިވެނިކުރަން އެދޭ ދެ މީހުން ތެލަސީމިއާއަށް ޓެސްޓުކޮށް، އޭގެ ނަތީޖާ (ތެލެސީމިއާ ކާޑު) ހުށަހެޅުމަކީ ކުރަން ޖެހޭނެ ކަމެކެވެ. އެހެންކަމުން މީގެ ކުރިން އެކަމުގައި ލުއި ދީފައިވާ ކޯޓުތަކުން ވެސް މިހާރު އަންނަނީ ކާޑު ހުށަހެޅުމަށް އަންގައި އިއުލާނު ކުރަމުންނެވެ.

ގަވައިދުގައި ބުނެފައިވާ ގޮތުން، ކައިވެނިކުރަން އެދޭ ދެ މީހުންކުރެ އެކަކުގެ ކިބައިގައި ތެލެސީމިއާ ވާރުތަކުރާ ގޮތް ނެތް ނަމަ، ކައިވެނިކުރަން އެދޭ ދެވަނަ މީހާގެ ތެލެސީމިއާ ޓެސްޓުގެ ނަތީޖާ ހުށަހެޅުން ލާޒިމެއް ނޫނެވެ.

ފެމިލީ ކޯޓުން ކައިވެނި ކޮށްދޭ އިރު، ތެލެސީމިއާ ކާޑު ހުށަހެޅުން އަބަދުވެސް ލާޒިމެވެ. ނަމަވެސް ކާޑު ހެއްދުމަކީ މާލެ އައިސް ކުރެވެން އޮންނަ ކަމަކަށްވުމުން، އެ ތަކުލީފަށް ލުޔެއް ދިނުމަށް ބައެއް ރަށްރަށުގެ ކޯޓުތަކުން އެ ކާޑަށް ނުބަލައެވެ. އެހެންވެ، އެ އިހުތިޔާރު ކޯޓުތަކަށް އޮންނަނީ ދޫކޮށްލަައިފައެވެ.

ނަމަވެސް އަލަށް އަމަލު ކުރަން ފަށާ ގަވައިދާ އެކު ހުރިހާ ކޯޓުތަކުން ވެސް އެ ގޮތަށް އަމަލުކުރުން ލާޒިމުވާނެއެވެ.