އަންނަ ބުދަ ދުވަހުން ފެށިގެން މި ފެށޭ އޮކްޓޫބަރު މަހުގެ 4 ގެ ނިޔަލަށް ކުޅުދުއްފުށީ ސިޓީގައި ބާއްވާ އައިލެންޑް ކާނިވަލްގައި އެސްއެމްއީ ޑިޖިޓަލުން ބައިވެރިވާން ނިންމައިފިއެވެ.

އެޑްވެންޗާ އަޕް އިން އިސްނަގައިގެން ކުޅުދުއްފުށީ ކައުންސިލާ ގުޅިގެން ބާއްވާ މި ކާނިވަލުގެ އެއް ސްޕޮންސަރަކީ ވެސް އެސްއެމްއީ ޑިޖިޓަލް އެވެ. މި ކާނިވަލުގެ މައިގަނޑު މަގުސަދަކީ ހއ.، ހދ. އަދި ށ. އަތޮޅުގެ ކުދި ވިޔަފާރިތަކަށް، ހާއްސަކޮށް އެ ފަރާތްތަކުގެ އުފެއްދުންތައް މާކެޓްކުރުމުގެ ފުރުސަތު ހުޅުވާލުމެވެ. އޭގެ އިތުރުން، އިޖުތިމާއީ ގުޅުން ބަދަހިކުރުމަށް އާއިލީ ހަވީރާއި ތަފާތު ކާނިވަލް ގޭމްތައް ކުޅުމުގެ މަގުފަހިކޮށްދިނުން ވެސް މީގެ ތެރޭގައި ހިމެނެއެވެ.

އެސްއެމްއީ ޑިޖިޓަލުން މިއަދު ނެރުނު ނޫސްބަޔާނެއްގައި ބުނި ގޮތުގައި މި ކާނިވަލުގައި އެ ކުންފުނިން މައިގަނޑު ގޮތެއްގައި ހަރަކާތްތެރި ވާނީ ކުދި އަދި މެދުފަންތީގެ ވިޔަފާރިތައް ތަރައްގީކުރުމަށް މައުލޫމާތު ދިނުމަށެވެ. އެގޮތުން، ގޭބިސީތަކުގައި މަސައްކަތްކުރާ އަންހެނުންނާއި ޒުވާނުންގެ އިތުރުން، ރާއްޖޭގެ އިގުތިސާދުގައި މުހިންމު ދާއިރާތައް ކަމަށްވާ މަސްވެރިކަމާއި، ޓޫރިޒަމް އަދި ދަނޑުވެރިކަމަށް އެ ކުންފުނިން ފޯރުކޮށްދޭ ފައިނޭންސިންއާ ގުޅޭ މައުލޫމާތު ދީ، އާންމުން ހޭލުންތެރިކުރުމަށް ވަނީ ހަމަޖެހިފައެވެ.

އެސްއެމްއީ ޑިޖިޓަލްގެ ހިދުމަތްތަކަށް އެޕްލިކޭޝަން ހުށަހަޅަން ބޭނުންވާ ފަރާތްތަކަށް ލިޔެކިޔުންތައް ތައްޔާރުކުރުމުގައި އެހީތެރިކަން ފޯރުކޮށްދިނުމަށް އެ ކުންފުނީގެ މުވައްޒަފުން ކުޅުދުއްފުށީ ސިޓީގައި ހަރަކާތްތެރިވާނެއެވެ. މީގެ އިތުރުން، އެ ކުންފުނިން ދޫކޮށްފައިވާ ކޮންވެންޝަނަލް ލޯނުތައް އިސްލާމިކް ފެސިލިޓީތަކަށް ބަދަލުކުރުމަށް ބޭނުންވާ، އުތުރުގެ ތިން އަތޮޅުގެ ކަސްޓަމަރުންނަށް ވެސް އެހީތެރިކަން ފޯރުކޮށްދޭނެ ކަމަށް އެސްއެމްއީ ޑިޖިޓަލުން މައުލޫމާތުދެއެވެ.

އެސްއެމްއީ ޑިޖިޓަލުން ބުނި ގޮތުގައި، މުޖުތަމައުގެ ގުޅުން ބަދަހިކޮށްދީ، ކުޑަކުދިންނަށް އުފާވެރި މާހައުލެއް ހޯދައިދިނުމުގެ އިތުރުން ކުދި ވިޔަފާރިތަކަށް މާކެޓް ފުރުސަތުތައް ފަހިކޮށްދޭ މިފަދަ ހަރަކާތްތަކުގައި ބައިވެރިވުމުގެ މައިގަނޑު ބޭނުމަކީ މުޖުތަމައަށް ހިތްހަމަޖެހުން ގެނެސްދިނުމެވެ.