އެމެރިކާއާ އެކު އަލުން ހަނގުރާމައެއް ފަށަން ޖެހިއްޖެ ނަމަ، އެއީ ފަނާކުރަނިވި ބޮޑު ހަނގުރާމައަކަށް ވިޔަސް އީރާނުން ފަހަތަށް ނުޖެހޭނެ ކަމަށް، އެ ގައުމުގެ ހާރިޖީ ވަޒީރު އައްބާސް އަރަގްޗީ ވިދާޅުވެއްޖެއެވެ. އެންބީސީ ނިއުސްއިން ރިޕޯޓުކޮށްފައިވާ ގޮތުގައި، އޭނާ މިހެން ވިދާޅުވީ، އދ.ގެ އާންމު މަޖިލީހުގެ ހަވާސާގައި އީރާނުން ހުށަހެޅި ސުލްހައިގެ ހުށަހެޅުން އެމެރިކާގެ ރައީސް ޑޮނަލްޑް ޓްރަމްޕް ގަބޫލު ނުކުރައްވައި އަނބުރާ ފޮނުވާލެއްވުމާ ގުޅިގެންނެވެ.

އެންބީސީގެ 'މީޓް ދަ ޕްރެސް' ޕްރޮގްރާމްގައި ވާހަކަދައްކަވަމުން އަރަގްޗީ ވިދާޅުވި ގޮތުގައި، އެމެރިކާއިން ކުރިމަތިކޮށްފާނެ ކޮންމެ ހަމަލާއަކަށް ރައްދުދިނުމަށް އީރާން އޮތީ ފުރިހަމައަށް ތައްޔާރުވެގެންނެވެ. މީގެ އިތުރުން، ސޯޝަލް މީޑިއާ ޕްލެޓްފޯމް އެކްސްގައި ކުރެއްވި ޕޯސްޓެއްގައި އޭނާ ވަނީ މި މެސެޖު ތަކުރާރުވެސް ކުރައްވައިފައެވެ.

“އަޅުގަނޑާއި ރައީސް ޕެޒެޝްކިއަން ނިއުޔޯކަށް އައީ ހަނގުރާމައެއް ވިއްކާކަށް ނޫން. އަޅުގަނޑުމެން އައީ ސުލްހަ ގާއިމުކުރަން،” އެކްސްގައި ކުރެއްވި ޕޯސްޓުގައި އަރަގްޗީ ވިދާޅުވިއެވެ.

“އެހެންނަމަވެސް، ކޮންމެ ފަދަ އުދުވާނަކާ ކުރިމަތިލާން ޖެހުނަސް އީރާން އޮންނާނީ ސާބިތުކަންމަތީގައި. އެއީ ފަނާކުރަނިވި ހަނގުރާމައަކަށް ވިޔަސް މެ.” އޭނާ ވިދާޅުވިއެވެ.

އޭގެ އިތުރުން، ހަގީގީ ޑިޕްލޮމެސީއަށް އީރާން އޮތީ ތައްޔާރަށް ކަމަށް ވެސް އޭނާ ފާހަގަކުރެއްވިއެވެ.

އީރާނުން ހުށަހެޅި ސުލްހައިގެ ހުށަހެޅުމަކީ ހޮރުމުޒް ކަނޑުއޮޅި ހުޅުވާލުމާ ގުޅޭ ގޮތުން ހުށަހެޅި ހަތް ދުވަހުގެ މަގުޗާޓެއް ކަމަށް އަލްޖަޒީރާއިން ރިޕޯޓުކޮށްފައިވެއެވެ. ގަތަރުގެ މެދުވެރިން މެދުވެރިކޮށް އެމެރިކާއަށް ހުށަހެޅި މި މަގުޗާޓުގައިވާ ގޮތުން، އެއްބަސްވުމަކަށް އާދެވޭތާ ހަ ވަނަ ދުވަހު ހޮރުމުޒް ކަނޑުއޮޅި ހުޅުވާލައި، ހަތް ވަނަ ދުވަހު އިތުރު މަޝްވަރާތައް ފަށާނެ ކަމަށް އަރަގްޗީއާ ހަވާލާދީ މީޑިއާތަކުން ބުނެފައިވެއެވެ.

ނަމަވެސް، އެ ހުށަހެޅުން ޓްރަމްޕް ގަބޫލު ނުކުރެއްވި ކަމަށް އެމެރިކާގެ އޮފިޝަލުންނާ ހަވާލާދީ ނޫސްތަކުގައި ބުނެފައިވެއެވެ. ވައިޓް ހައުސްގައި ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވި ގޮތުގައި، އީރާނުން ވަގުތުން ކަނޑުއޮޅި ހުޅުވާލަން ބޭނުންވަނީ އެ ގައުމަށް ބޮޑެތި ގެއްލުންތަކެއް ވަމުންދާތީއެވެ. އެ ހުށަހެޅުން ގަބޫލު ނުކުރެއްވި ނަމަވެސް، މި ހަފުތާގެ ތެރޭގައި އީރާނާ އެކު އިތުރު މަޝްވަރާތަކެއް ބޭއްވުމަށް އުންމީދުކުރައްވާ ކަމަށް ޓްރަމްޕް ވިދާޅުވި ކަމަށް އެކްސިއޯސް ނޫހުން ވަނީ ރިޕޯޓުކޮށްފައެވެ.