ފ. އަތޮޅު މަޝްރޫއު ހުއްޓުވި ލީޑަރުންނާއި އިލްމުވެރިން ހަނުތިބުމަކީ ކަންބޮޑުވުމެއް ކަމަށާއި ރަސްމާލޭގައި ހިންގުމަށް ހަމަޖެހިފައިވާ ޔޫއޭއީގެ އީގަލް ހިލްސް ކުންފުނީގެ 20 ބިލިއަން ޑޮލަރުގެ މަޝްރޫއަކީ ރާއްޖެއަށް ދިމާވާނެ "ބޮޑު މުސީބާތެއް" ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.

ޔާމީން މިފަދައިން ވިދާޅުވެފައިވާ އިރު، އެ މަޝްރޫއު ހިންގުމަށް ތާއީދުކުރައްވާ ކަމަށާއި ނަމަވެސް ހަމައެކަނި މައްސަލައަކީ އެ މަޝްރޫއު މާލެ ސަރަހައްދުގައި ހިންގުން ކަމަށް ކުރީގެ ރައީސް މުހައްމަދު ނަޝީދު ވަނީ ވިދާޅުވެފައެވެ.

ޔާމީން ވިދާޅުވި ގޮތުގައި، އެ މަޝްރޫއު މާލެއާ ކައިރިވިޔަސް އަދި ދުރުވިޔަސް އަންނާނެ ތަފާތެއް ނޯންނާނެއެވެ. އަދި މި ސަރުކާރު ނިމި، ވަތަނީ ލީޑަރަކު ވެރިކަމަށް އައިސްފިނަމަ އެ މީހުންނަށް އެ ފުރުސަތު ނޯންނާނެ ކަމަށް އުއްމީދުކުރައްވާ ކަމަށް ވެސް އެމަނިކުފާނު ވިދާޅުވިއެވެ.

ޔާމީން ތުހުމަތުކުރެއްވި ގޮތުގައި، އެ މަޝްރޫއުގެ ދަށުން ރާއްޖޭގައި ވަޒަންވެރިވާނީ ޔަހޫދީންނެވެ. އަދި އެތަނުގައި އުޅޭނީ ޔަހޫދީންގެ ގޮތްތަކަށް ކަމަށާއި، ރާއްޖޭގެ އަމުރުމައުރޫފު އެތަނަކަށް ނުހިނގާނެ ކަމަށް ޔާމީން ވިދާޅުވިއެވެ. މީގެ އިތުރުން، ޔަހޫދީންނަކީ ނުފޫޒުގަދަ އަދި ނުރައްކާތެރި ބައެއް ކަމަށާއި، އިސްރާއީލަކީ ދުނިޔޭގެ އެންމެން ނަފުރަތުކުރާ ގައުމަށް ވެފައިވަނީ އެހެންވެގެން ކަމަށް ވެސް ވިދާޅުވިއެވެ.

މި މަޝްރޫއާ ގުޅޭގޮތުން ވާހަކަދައްކަވަމުން ޔާމީން ވަނީ އެމަނިކުފާނުގެ ވެރިކަމުގައި ފ. އަތޮޅުގައި ހިންގަން އުޅުނު ސައުދީ އަރަބިއްޔާގެ މަޝްރޫއާ އަޅާކިޔުއްވައިފައެވެ. ޔާމީން ވިދާޅުވި ގޮތުގައި، 10،000 މިލިއަނަށް ވުރެ ކުޑަނޫން އެ މަޝްރޫއަކީ އިސްލާމީ އުސޫލުތަކާ އެއްގޮތަށް ހިނގާނެ، އަދި ދިވެހިންނަށް ވަޒީފާ ލިބޭނެ މަޝްރޫއެކެވެ. ނަމަވެސް އޭރު ތިބި ހުރިހާ ރައީސުންނާއި ލީޑަރުން ގައުމު ވިއްކާލަނީ ކަމަށް ބުނެ އެކަމާ ދެކޮޅަށް އަޑުއުފުލައި އެ މަޝްރޫއު ހުއްޓުވާލީ ކަމަށް ވިދާޅުވިއެވެ.

އޭރު ފަޅެއް ދޫކޮށްލަން އުޅުމުން އެކަމާ ދެކޮޅަށް ތެދުވި މީހުން، މިއަދު ދިވެހިންގެ ފައިސާއިން ހިއްކާފައިވާ ބިމެއް ދޫކޮށްލާއިރު ހަނުތިބުމަކީ ކަންބޮޑުވުމެއް ކަމަށް ޔާމީން ފާހަގަކުރެއްވިއެވެ. އަދި ނިޝާން ގާޒީގެ ޝަރަފާއި އެއަށްވުރެ މަތީ ޝަރަފުތައް ލިބިފައިވާ ބޭފުޅުންނާއި، ދީނީ އިލްމުވެރިން ވެސް މިކަމާ ދެކޮޅަށް ބަހެއް ވިދާޅުނުވާކަން ފާހަގަކުރައްވައި ޔާމީން ވަނީ ފާޑުވިދާޅުވެފައެވެ.

ޔޫއޭއީގެ ކުންފުންޏަށް ރަސްމާލެއިން ބިން ވިއްކާލަނީ ކަމަށް ޔާމީން ތަކުރާރުކޮށް ވިދާޅުވަމުން ގެންދެވި ނަމަވެސް، ރައީސް ޑރ. މުހައްމަދު މުއިއްޒާއި މިނިސްޓަރުން ގެންދަވަނީ އެ ވާހަކަތައް ދޮގުކުރައްވައިފައެވެ.

އެކަމާ ގުޅޭގޮތުން ވާހަކަދައްކަވަމުން ހައުސިން މިނިސްޓަރު ޑރ. އަބްދުﷲ މުއްތަލިބު މިއަދު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ ރަސްމާލޭގައި ޔޫއޭއީގެ އީގަލް ހިލްސް ކުންފުނިން ހިންގުމަށް ހަމަޖެހިފައިވާ ބިޔަ މަޝްރޫއުން ތަރައްގީ ކުރާ ކޮންމެ ތަނެއް ވިއްކޭނީ ދިވެހި ސަރުކާރުން ހުއްދަ ދޭ ބަޔަކަށް ކަމަށެވެ. އަދި ރަސްމާލޭން ތަންތަން ނުވަތަ ޕްރޮޕަޓީތައް ގަންނަ ފަރާތުގެ މިލްކަކީ އެ ގަންނަ ތަނެއް ނުވަތަ އެ ޕްރޮޕަޓީ އެކަނި ކަމަށް މިނިސްޓަރު ވިދާޅުވިއެވެ.

"އެ ޕްރޮޕަޓީއެއް ވިއްކާލާނަމަ ނުވަތަ އެފަރާތެއް މަރުވުމުން ވާރުތަވާނަމަ، ވާރުތަވާނީ ދިވެހި ސަރުކާރުން ބަލަން ޖެހޭ ކަންކަން ބެލުމަށްފަހު ހުއްދަ ކުރާނަމައެވެ. ސަރުކާރުން ހުއްދަ ދޭނަމަ ހުއްދަ ދޭނީ އެކަމަށް ކަޑައެޅިފައިވާ ފީ ނެގުމަށްފަހުގައެވެ. އެހެން ކަމުން އޮޓަމެޓިކުން ވާރުތަވާނޭ ކަމަށް ބުނުމަކީ ހަގީގަތާ ހިލާފު ވާހަކައެކެވެ،" މިނިސްޓަރު ވިދާޅުވެފައިވެއެވެ.