ދިރާގުގެ ޕްރީޕެއިޑް ކަސްޓަމަރުންނަށް ހާއްސަކޮށްގެން، އެއްލައްކަ ރުފިޔާގެ ބޮޑު އިނާމެއް ލިބޭ ރީލޯޑް ޕްރޮމޯޝަނެއް އެ ކުންފުނިން މިއަދު ތައާރަފުކޮށްފިއެވެ.

އަންނަ މަހުގެ 31 ވަނަ ދުވަހުގެ ނިޔަލަށް ކުރިއަށްގެންދާ މި ޕްރޮމޯޝަނުގައި ބައިވެރިވެވޭނީ ދިރާގު އެޕް މެދުވެރިކޮށް ރީލޯޑްކުރާ ކަސްޓަމަރުންނަށެވެ. ދިރާގުން ބުނިގޮތުގައި، މި ޕްރޮމޯޝަންގެ ދަށުން ކޮންމެ ހަފުތާއަކު ގުރުއަތުން ހޮވޭ ނަސީބުވެރިޔަކަށް 15،000 ރުފިޔާގެ ފައިސާގެ އިނާމެއް ދޭނެއެވެ. އަދި މުޅި ޕްރޮމޯޝަންގެ ގްރޭންޑް ވިނާ ނުވަތަ ބޮޑު އިނާމުގެ ނަސީބުވެރިޔާއަށް 100،000 ރުފިޔާ ލިބޭނެއެވެ.

މި ޕްރޮމޯޝަނުގައި ކަސްޓަމަރުން ރީލޯޑްކުރާ މިންވަރު އިތުރުވާ ވަރަކަށް، ގުރުއަތުން ހޮވުމުގެ ފުރުސަތު ބޮޑުވާނެ ކަމަށް އެ ކުންފުނިން ބުންޏެވެ. އެގޮތުން، ދިރާގު އެޕް މެދުވެރިކޮށް ކުރާ ކޮންމެ 100 ރުފިޔާގެ ރީލޯޑަކަށް ގުރުއަތުގައި ބައިވެރިވުމަށް އެއް ފުރުސަތު ލިބޭނެއެވެ. މީގެ އިތުރުން، 200 ރުފިޔާއަށް ރީލޯޑްކުރާ ކަސްޓަމަރުންނަށް ދެ ފުރުސަތު ލިބޭ އިރު، 300 ރުފިޔާގެ ރީލޯޑަކަށް ތިން ފުރުސަތު ލިބޭނެއެވެ.

ދިރާގުން ފާހަގަކުރި ގޮތުގައި، މި ޕްރޮމޯޝަނަކީ އެ ކުންފުނީގެ ޕްރީޕެއިޑް ކަސްޓަމަރުންނަށް ފޯރުކޮށްދޭ ހިދުމަތްތައް އިތުރަށް ފުރިހަމަކުރުމަށް ކުރިއަށްގެންދާ ހަރަކާތެކެވެ. އަދި މިއީ ޑިޖިޓަލް ވަސީލަތްތައް މެދުވެރިކޮށް ލުއިފަސޭހަ އަދި ފައިދާހުރި ހިދުމަތްތަކެއް ކަސްޓަމަރުންނަށް ފޯރުކޮށްދިނުމުގެ މަގުސަދުގައި ފެށި ޕްރޮމޯޝަނެއް ކަމަށްވެސް އެ ކުންފުނިން ބުންޏެވެ.