އެމްޑަބްލިޔުއެސްސީގެ މުހިންމު ކޮންޓްރޯލުތަކެއް އޮތީ ބޭރު ކުންފުންޏަށް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަމުން ރައީސް ވިދާޅުވީ އެމްޑަބްލިޔުއެސްސީއަކީ ސަރުކާރުގެ 100 ޕަސަންޓު ހިއްސާވާ ކުންފުންޏަކަށް ބަދަލުކުރުމުގެ މަސައްކަތްކުރަމުން އަންނަ ކަމަށާއި އެކަމުން ދިވެހީންނަށް ފައިދާތައް ވެގެންދާނެ ކަމަށެވެ.

"އެމްޑަބްލިޔުއެސްސީއަކީ ވަރަށް ފައިދާވާ ކުންފުންޏެއް. އެހެންނަމަވެސް އެމްޑަބްލިޔުއެސްސީގެ މުޅި ޝެއާ ހަމައެކަނި 20 ޕަސަންޓުން ނިމެނީކީ ނޫން. މި މުޅި ލިޔެކިޔުންތައް ބައްލަވައިލެއްވީމާ އެނގޭނެ މިކަން ކޮށްފައި މިއޮތީ މުޅި ކުންފުނީގެ ކޮންޓްރޯލު ބޭރުގެ ކުންފުނީގެ އަތްމަތީގައި ގާތްގަނޑަކަށް މި އޮންނަނީ. ޕްރޮކިއުމަންޓް ކުޑަކުޑަ ކަމަކުން ފެށިގެން އެންމެ ބޮޑެތި ކަންކަމަށް ދާންދެން. ބޯޑު މީޓިންއެއް ބޭއްވިޔަސް، ޑިސިޝަން މޭކިންގައި މައިނޯރިޓީ ކޮންޓްރޯލު ޝެއާ އޮންނަ ފަރާތުން ކޮންޓްރޯލު އެބަކުރޭ،" އެމަނިކުފާނު ވިދާޅުވިއެވެ.

ރައީސް ވިދާޅުވީ ބޭރުގެ ކޮންޓްރޯލު އޮތް ކަމުގައިވިޔަސް، އެމްޑަބްލިޔުއެސްސީއަކީ ދިވެހީންގެ ކުންފުންޏެއް ކަމަށާއި އެހެންކަމުން އެކަމަކީ ވަރަށް ގޯސްކޮށް ކޮށްފައި އޮތް ކަމެއް ކަމަށެވެ. އަދި މި ސަރުކާރުން މަސައްކަތްކުރަމުން އަންނަނީ އެކަން ރަނގަޅުކުރުމަށް ކަމަށް އެމަނިކުފާނު ވިދާޅުވިއެވެ.

ދިރާގުގެ 51 ޕަސަންޓުގެ ހިއްސާ ވެސް ސަރުކާރަށް ނެގުމަށް ކެބިނެޓުން ނިންމާފައިވާ ކަމަށާއި ދިރާގަކީ ވަރަށް ފައިދާވާ ކުންފުންޏެއް ކަމަށެވެ. މިހާރު އޮންނަ ގޮތުން މެޖޯރިޓީ ހިއްސާ، 52 ޕަސަންޓު ދަނީ ބޭރުގެ ބައެއްގެ އަތްމައްޗަށް ކަމަށް އެމަނިކުފާނު ވިދާޅުވިއެވެ.

"އެ ބޭރަށް ދިއުމުގެ ބަދަލުގައި ދިވެހި ރައްޔިތުންނަށް ފައިދާވާ ގޮތަށް، ދިވެހީންނަށް އެ ފައިދާވާ ގޮތަށް ބަދަލުވެގެންދިއުން އެއީ ވަރަށް ބޮޑު ކާމިޔާބަކަށް ވާނެ. އޭރުގައި ވެސް މިކަން ނުކުރަން އޭރުގައި އިދިކޮޅުގައި ތިބި ފަރާތްތައް ގޮވާލަމުންދިޔަ އެމްޑީޕީގެ ސަރުކާރުން ދިރާގުގެ ޝެއާ ވިއްކާލިއިރުގައި. އެހެންނަމަވެސް އެކަން އެބޭފުޅުން ކުރެއްވެވި އޭރުގައި،" އެމަނިކުފާނު ވިދާޅުވިއެވެ.

ރައީސް އިތުރަށް ވިދާޅުވީ ދިރާގުގެ މެޖޯރިޓީ ހިއްސާ ސަރުކާރަށް ލިބުމުން، އެ ކުންފުނި ދިވެހި ރައްޔިތުންނަށް ލިބި، ދިވެހި ރައްޔިތުންނަށް ދިވެހީންގެ ކުންފުންޏެއްގެ ގޮތުގައި ބަދަލުވެގެންދާނެ ކަމަށެވެ.