އެމްޑަބްލިޔުއެސްސީ، 100 ޕަސެންޓް ސަރުކާރުގެ ކުންފުންޏަކަށް ބަދަލުކުރަން ނިންމައިފިއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ރައީސް ޑރ. މުހައްމަދު މުއިއްޒު ވިދާޅުވީ ބޭރު ކުންފުންޏަކަށް އެމްޑީޕީ ސަރުކާރުން ވިއްކާލާފައިވާ އެމްޑަބްލިޔުއެސްސީގެ ހިއްސާ އަނބުރާ ހޯދުމުގެ މަސައްކަތް ކުރަން ސަރުކާރުން ނިންމައި އެ މަސައްކަތް ފެށިފައިވާ ކަމަށެވެ.

"މިކަމަކީވެސް ރައްޔިތުންނަށް ވަރަށް މުހިންމު ކަމެއް. ރައްޔިތުންނަށް ހިދުމަތް ދިނުމުގައި އަދި އެމްޑަބްލިޔުއެސްސީ އިތުރަށް ހަރުދަނާކުރުމުގައި ކުރަންޖެހޭ ކަމެއް. އެހެންވީމަ، ބޭރު ކުންފުންޏަކަށް ވިއްކާލާފަ އޮތް 20 ޕަސަންޓުގެ ޝެއާ ގަނެ، 100 ޕަސަންޓު ސަރުކާރު ހިއްސާވާ ކުންފުންޏަކަށް އެމްޑަބްލިޔުއެސްސީ ބަދަލުކުރުމަށްޓަކައި ކުރަންޖެހޭ މަސައްކަތް މިހާރު އެވަނީ ފެށިފައި،" އެމަނިކުފާނު ވިދާޅުވިއެވެ.

ރައީސް ވިދާޅުވީ ވަރަށް ސްމޫތުކޮށް، ވަރަށް ކާމިޔާބުކަމާއެކީގައި އެ މަސައްކަތް ކުރިއަށް ގެންގޮސް ނިންމާލެވޭނ ކަމަށާއި އެމްޑަބްލިޔުއެސްސީގެ އިތުރުން އެމްޑީޕީގެ ފުރަތަމަ ސަރުކާރުން ވިއްކާލި ދިރާގުގެ 51 ޕަސަންޓު ހިއްސާ ސަރުކާރަށް ހޯދުމަށް ވެސް ނިންމާފައިވާ ކަމަށެވެ.

އެންމެ މުހިންމު އެއް ކަމަކީ ދިރާގުގެ ޝެއާ ސަރުކާރުގެ ޕަސެންޓޭޖް 51 އިންސައްތައަށް ބޮޑުކުރުން. އެނގިވަޑައިގަންނަވާނެ ފަދައިން، ދިރާގަކީ ސަރުކާރުގެ މެޖޯރިޓީ ޝެއާ އޮއްވައި އެމްޑީޕީގެ ފުރަތަމަ ސަރުކާރުން ދިރާގު ޝެއާ ވަނީ ވިއްކާލާފައި. ސަރުކާރުގެ ރައްޔިތުންގެ ވަރަށް ބޮޑު ހަރުމުދަލެއް. އަޅުގަނޑުމެން ގަބޫލުކުރާ ގޮތުގައި ދިރާގުގެ ޝެއާ 51 އިންސައްތައަށް ބޮޑުކުރުމަކީ ރައްޔިތުންގެ ހެވާއި ލާބައަށްޓަކައި، ރާއްޖޭގެ އިގުތިސާދު ފުޅާކުރުމަށްޓަކައި އަދި ރާއްޖޭގެ އިގުތިސާދު އިތުރަށް ކުރިއަށް ގެންދިއުމުގައި ކޮންމެހެން ކުރަން ޖެހޭ ކަމެއް،" އެމަނިކުފާނު ވިދާޅުވިއެވެ.