މާލެ ދެކުނުފަރާތު ބޮޑުތަކުރުފާނު މަގުގައި ހުރި ސްޓެލްކޯގެ ޕަންޕު ސްޓޭޝަން ނަގަން ނިންމާފައިވާ ކަމަށް މާލެ ސިޓީ ކައުންސިލުން ބުނެފިއެވެ.

މާލެ ސިޓީ ކައުންސިލުން ބުނީ މާލޭގެ ދެކުނު ފަރާތު ބޮޑުތަކުރުފާނު މަގުގައި މިހާރު ހުރި ސްޓެލްކޯގެ ފިއުލް ޕަންޕު ސްޓޭޝަނުގެ ސަބަބުން މަގު ބޭނުންކުރާ ފަރާތްތަކަށް ދިމާވަމުންދާ ދަތިތަކަށް ހައްލެއް ހޯދުމަށާއި އެ ޕަންޕް ސްޓޭޝަން މަގަށް ދަތިނުވާނެ ގޮތަށް ބަދަލު ކުރުމާ ގުޅޭގޮތުން މާލެ ސިޓީ ކައުންސިލުން ކަމާ ބެހޭ ފަރާތްތަކާ އެކު މަޝްވަރާ ބައްދަލުވުމެއް ބާއްވައިފައިވާ ކަމަށެވެ.

މާލެ ސިޓީ ކައުންސިލްގެ އިދާރާގައި އިއްޔެ ބޭއްވި އެ މަޝްވަރާ ބައްދަލުވުން ރިޔާސަތު ބެލެހެއްޓެވީ މާލެ ސިޓީގެ ޑެޕިއުޓީ މޭޔަރު މީކާއިލް މުހައްމަދު ރިޔާޟްއެވެ۔ އެ ބައްދަލުވުމަކީ ތިމާވެއްޓަށް ކުރާނެ އަސަރުތައް ވަޒަން ކުރުމުގެ (އީއައިއޭ) މަސައްކަތުގެ ތެރެއިން ކަމާބެހޭ ފަރާތްތަކުގެ މަޝްވަރާ ހޯދުމަށް ބޭއްވި ބައްދަލުވުމެއް ކަމަށް އެ ކައުންސިލުން ބުންޏެވެ.

ބޮޑުތަކުރުފާނު މަގުގައި މިހާރު ފިއުލް ޕަންޕް ސްޓޭޝަން ހުރި ސަރަހައްދަކީ ދުއްވާ އެއްޗެއްސާއި ހިނގާބިނގާވެ އުޅޭ ފަރާތްތަކަށް ބޮޑެތި ދަތިތަކާ ކުރިމަތިވާ، އަދި ޓްރެފިކް އިންސިޑެންސް އިންތިހާއަށް ބޮޑު ސަރަހައްދެކެވެ. މަގުގެ އެއްލޭނުގެ ބައެއް އޭގެ ސަބަބުން ބަންދުވެ، ހުޅުމާލެ އާއި މާލެއާ ދެމެދު ދަތުރުކުރާ އުޅަނދުފަހަރަށް ވެސް ނުރައްކާތެރި އެކްސިޑެންޓްތައް ހިނގުމަށް މަގުފަހިވާތީ، މިއީ އާންމުންގެ ބޮޑު ޝަކުވާއެއް އޮތް ކަމެއް ކަމަށް ސިޓީ ކައުންސިލުން ފާހަގަ ކުރެއެވެ.

މާލެ ސިޓީ ކައުންސިލުން އިސްނަގައިގެން ކުރިއަށްދާ އެ މަޝްރޫއުގެ ދަށުން، މިހާރު މަގުމަތީގައި ހުރި އިމާރާތް އެއްކޮށް ރޫޅާލައި، ފަޅު ތެރެއިން 103 އަކަމީޓަރުގެ ސަރަހައްދެއް ހިއްކައިގެން 330 އަކަފޫޓުގެ އާ ޕަންޕް ސްޓޭޝަނެއް ބިނާކުރުމަށް ހަމަޖެހިފައިވާ ކަމަށްވެސް މާލެ ސިޓީ ކައުންސިލުން ބުނެއެވެ۔

ޑެޕިއުޓީ މޭޔަރު މީކާއިލް ވިދާޅުވީ، ބޮޑުތަކުރުފާނު މަގުގެ ޓްރެފިކް ފްލޯ ރަނގަޅުކޮށް، އާންމުންނަށް ފަސޭހަކޮށްދިނުމަކީ ސިޓީ ކައުންސިލުން ނުހަނު އިސްކަންދޭ ކަމެއް ކަމަށެވެ۔ އަދި އެމަސައްކަތް 90 ދުވަހުގެ ތެރޭގައި ނިންމުމަށް ރޭވިފައިވާ އިރު، މަގުގެ ބައެއް ސަރަހައްދުތައް ވަގުތީގޮތުން ބަންދުކުރަން ޖެހުނު ނަމަވެސް، އެއީ މުޅި މާލޭގެ ޓްރެފިކަށް ބޮޑު ލުޔެއް ލިބިގެންދާނެ ކަމެއް ކަމަށެވެ۔

އެ މަޝްވަރާތަކަށްފަހު، ތިމާވެށީގެ ހުއްދަތައް ލިބުނުހާ އަވަހަކަށް މަސައްކަތް ފެށުމަށް ތައްޔާރުވަމުންދާ އިރު، ކައުންސިލުން ވަނީ ޓްރެފިކް މެނޭޖް ކުރުމުގައި ފުލުހުންނާއި ކަމާބެހޭ އިދާރާތަކާއެކު ގާތުން މަސައްކަތް ކުރާނެކަމުގެ ޔަގީންކަން ދީފައިވާނެ ކަމަށެވެ.