ދެކުނު އޭޝިއާގެ ތިމާވެށީގެ ސައިންސްވެރިންނާއި ތަޖުރިބާކާރުން ނޭޕާލްގެ ކަތަމަންޑޫގައި ބައްދަލުކޮށް، ނެތިދިއުމުގެ ބިރު ހީވެފައިވާ ޗައިނީޒް އަދި އިންޑިއަން ޕޭންގޮލިން ހިމާޔަތް ކުރުމަށް 25 އަހަރުގެ ސަރަހައްދީ ޕްލޭނެއް އެކުލަވާލުމުގެ މަސައްކަތް ފަށައިފިއެވެ.

‘ޕޭންގޮލިން ކޮންޒަވޭޝަން އިން ސައުތު އޭޝިއާ’ ގެ ނަމުގައި ފަސް ދުވަހުގެ މުއްދަތަށް ކުރިއަށްގެންދާ މި މަހާސިންތާ އިންތިޒާމުކޮށްފައި ވަނީ އައިޔޫސީއެންގެ ޕޭންގޮލިން ސްޕެޝަލިސްޓް ގްރޫޕާއި ސައުތު އޭޝިއާ ވައިލްޑްލައިފް އެންފޯސްމަންޓް ނެޓްވޯކް (ސާވެން) އަދި ގްރީންހުޑް ނޭޕާލް ގުޅިގެންނެވެ. މި ބައްދަލުވުމުގައި ދެކުނު އޭޝިއާގެ ހަ ގައުމަކުން މަންދޫބުން ބައިވެރިވާ އިރު، މީގެ ތެރޭގައި ސަރުކާރުތަކުގެ އިސް އޮފިޝަލުންނާއި ތިމާވެށީގެ ދިރާސާކުރާ ފަރާތްތައް ހިމެނެއެވެ.

ޓްރެފިކް ޖަމިއްޔާއިން އާންމުކޮށްފައިވާ ތަފާސްހިސާބުތަކާ ހަވާލާދީ ރިޕޯޓުތައް ބުނާ ގޮތުން، 2018 އިން 2022 އަށް އެކަނިވެސް އިންޑިއާއިން 1،200 އަށްވުރެ ގިނަ ޕޭންގޮލިން ވަގަށް ނަގައި ވިޔަފާރިކޮށްފައިވެއެވެ. އަދި އޭގެ ކުރީގެ އަށް އަހަރު ތެރޭގައި 6،000 އެއްހާ ޕޭންގޮލިން މަރާލާފައިވާ ކަމަށް ލަފާ ކުރެއެވެ. މި ޖަނަވާރަކީ ހިނި އަދި ފަސްކާނދި ފަދަ ސޫފި ކޮންޓްރޯލްކޮށް، ބިމުގެ ދިރުންތައް ދެމެހެއްޓުމުގައި މުހިންމު ދައުރެއް އަދާކުރާ އެއްޗެކެވެ.

ނޭޕާލްގެ ޑިޕާޓްމަންޓް އޮފް ނޭޝަނަލް ޕާކްސް އެންޑް ވައިލްޑްލައިފް ކޮންޒަވޭޝަންގެ ޑިރެކްޓަރު ޖެނެރަލް ޑރ. ބުއްދި ސާގަރް ޕައުޑެލް ވިދާޅުވި ގޮތުގައި، ގައިރު ގާނޫނީ ގޮތުގައި ޖަނަވާރުގެ ވިޔަފާރިކުރާ ފަރާތްތަކުން ގައުމުތަކުގެ ސަރަހައްދީ ރޮނގުތަކަށް ނުބަލައެވެ. އެހެންކަމުން، އެކަން ހުއްޓުވުމަށް ކުރާ މަސައްކަތްތައް ވެސް ވަކި ގައުމެއްގެ ބޯޑަރަށް ހަނިކުރެވިގެން ނުވާނެ ކަމަށް އޭނާ ފާހަގަކުރެއްވިއެވެ.

ގްރީންހުޑް ނޭޕާލްގެ ޑިރެކްޓަރު ކުމާރް ޕައުޑެލް ވެސް ވަނީ، މިކަމުގައި ސަރަހައްދީ ގައުމުތައް ގުޅިގެން މަސައްކަތް ކުރުމުގެ މުހިންމުކަން ފާހަގަކުރައްވައިފައެވެ.

އައިޔޫސީއެންގެ ޕޭންގޮލިން ސްޕެޝަލިސްޓް ގްރޫޕްގެ ކޯ-ޗެއާ ކެރީ ޕާކަރު ވިދާޅުވި ގޮތުގައި، ދެކުނު އޭޝިއާގައި އުޅޭ ޕޭންގޮލިންގެ ބާވަތްތަކާ ގުޅޭގޮތުން އަދިވެސް އިތުރަށް ދިރާސާކުރަން ޖެހޭ ކަންކަން އެބަހުއްޓެވެ. އެހެންކަމުން، މި 25 އަހަރުގެ ޕްލޭންގެ ކާމިޔާބީ މިންކުރާނީ ސައިންޓިފިކް ހޯދުންތަކާއި ޖަނަވާރުގެ އާބާދީއަށް އަންނަ ބަދަލުތަކުގެ މައްޗަށް ބިނާކޮށްގެންނެވެ.

މި މަހާސިންތާ ނިމޭ އިރު، ޕޭންގޮލިން ހިމާޔަތްކުރުމަށް ކުރިއަށް އޮތް 25 އަހަރަށް އަމާޒުކޮށްގެން ސައިންސުގެ މައްޗަށް ބިނާކޮށްފައިވާ ދިގުމުއްދަތުގެ އެކްޝަން ޕްލޭނެއް އެކުލަވާލައި ސަރަހައްދީ ގައުމުތަކުން އެއަށް އަމަލުކުރަން ފަށާނެ ކަމަށް ރިޕޯޓްތައް ބުނެއެވެ.