ނޭޕާލަށް ބޯކޮށް ވާރޭވެހި، ފެންބޮޑުވުމާއި ބިންގަނޑު ކަނޑައިގެން ދިއުމުގެ ސަބަބުން ގިނަ ބައެއްގެ ފުރާނަ ގެއްލުނު ހިތާމަވެރި ހާދިސާއާ ގުޅިގެން ރައީސް ޑރ. މުހައްމަދު މުއިއްޒު ތައުޒިޔާ ވިދާޅުވެއްޖެއެވެ.

ނޭޕާލުގެ ބޮޑުވަޒީރަށް ފޮނުއްވި މެސެޖެއްގައި ރައީސް ވިދާޅުވީ، މި ގުދުރަތީ ކާރިސާގައި ލިބުނު ފުން ގެއްލުންތަކާއި ފުރާނަ ގެއްލިދިޔަ ހަބަރު އެއްސެވީ ނުހަނު ފުން ހިތާމައާއެކު ކަމަށެވެ. އަދި މި ހިތާމައިގައި ދިވެހި ރައްޔިތުންނާއި ސަރުކާރު ބައިވެރިވާކަމަށް ރައީސް ވިދާޅުވިއެވެ.

ރައީސް ވިދާޅުވީ ހާދިސާގައި ވަކިވެދިޔަ ފަރާތްތަކުގެ އާއިލާތަކަށާއި، ގެއްލިފައިވާ މީހުންގެ އާއިލާތަކަށް ކެތްތެރިކަން ދެއްވުން އެދިވަޑައިގެން، އެ ފަރާތްތަކާއެކު ދިވެހިރާއްޖެ ވާކަމުގެ ޔަގީންކަން ދެއްވާކަމަށް ރައީސް ވިދާޅުވިއެވެ.

މީގެއިތުރުން، ގެއްލުން ލިބުނު ހުރިހާ ފަރާތްތަކަށް ރައްކާތެރިކަން މިންވަރުކުރެއްވުމަށާއި، އަނިޔާވި މީހުންނަށް އަވަސް ޝިފާއެއް ލިބުމަށްވެސް އެމަނިކުފާނު އެދިވަޑައިގެންނެވިއެވެ.

ނޭޕާލަށް ކުރަމުންދާ މޫސުމީ ވިއްސާރައިގައި ހިނގި އެކި ހާދިސާތަކުގައި މިހާތަނަށް ވަނީ 14 މީހުން މަރުވެފައެވެ. އަދި ވީނުވީއެއް ނޭނގި ގިނަ ބަޔަކު ގެއްލިފައިވާއިރު، މީހުން ހޯދުމާއި ސަލާމަތްކުރުމުގެ މަސައްކަތް ކަމާބެހޭ ފަރާތްތަކުން ދަނީ ކުރަމުންނެވެ.