ދުބާއީގައި ބޭއްވި ސީމާ އެވޯޑްސްގައި، 'ޕުޝްޕާ 2: ދަ ރޫލް' އިން ޕުޝްޕާ ޓީމަށް ބޮޑު ފަސް އެވޯޑް ލިބިއްޖެއެވެ. މި ޝޯގައި، ފިލްމުގެ ޑައިރެކްޓަރު، ސުކުމާރް ވަނީ، 'ޕުޝްޕާ 3: ދަ ރޭމްޕޭޖް' ގެ ނަމުގައި ފިލްމުގެ ތިންވަނަ ބައި ހަދާނެކަން ކަށަވަރުކޮށްދީފައެވެ.

ސީމާގައި ލިބުނު އެވޯޑްތަކުގެ ތެރޭގައި، އަލޫ އަރުޖުންއަށް އެންމެ މޮޅު އެކްޓަރުގެ އެވޯޑާއި، ރަޝްމިކާ މަންދަންދާއަށް އެންމެ މޮޅު އެކްޓްރެސްގެ އެވޯޑު ހިމެނެއެވެ. އަދި ޑައިރެކްޓަރ ސުކުމާރއަށް އެންމެ މޮޅު ޑައިރެކްޓަރުގެ އެވޯޑާއި، މިއުޒިކް ކޮމްޕޯސަރ ދޭވީ ސްރީ ޕްރަސާދުއަށް އެންމެ މޮޅު މިއުޒިކް ކޮމްޕޯސަރުގެ އެވޯޑު ލިބުނެވެ. ޝަންކަރ ބާބޫ ކަންޑޫކޫރީއަށް 'ޕީލިންގްސް' ލަވައިން އެންމެ މޮޅު ޕްލޭބެކް ސިންގަރ (ފިރިހެން) ގެ އެވޯޑު ލިބުނެވެ.

އަލޫ އަރުޖުން ވަނީ ސޯޝަލް މީޑިއާގައި މި ހަބަރު ހިއްސާކޮށް، އެވޯޑްތައް ފިލްމުގެ ޓީމާއި ފޭނުންނަށް ހަދިޔާކޮށްފައެވެ. 'ޕުޝްޕާ: ދަ ރައިޒް' 2021 ގައި ރިލީޒް ކުރެވުނުއިރު، ބައިނަލް އަގުވާމީ މާކެޓުން 350 ކްރޯޑު ރުޕީސް ހޯދައި، އެ އަހަރުގެ އެންމެ ގިނަ އާމްދަނީ ލިބުނު އިންޑިއާގެ ފިލްމަށް ވެފައިވެއެވެ. 'ޕުޝްޕާ 2: ދަ ރޫލް' 2024 ގައި ބައިނަލް އަގުވާމީ މާކެޓުން 1871 ކްރޯޑު ރުޕީސް ހޯދައި، އެ އަހަރުގެ އެންމެ ގިނަ އާމްދަނީ ލިބުނު އިންޑިއާގެ ފިލްމަށް ވެފައިވެއެވެ.

ޕުޝްޕާ 2 އަކީ ތެލިނގޫ ބަހުން ހެދި ފިލްމުތަކުގެ ތެރެއިން އެންމެ ގިނަ އާމްދަނީ ލިބުނު ފިލްމެވެ. އިންޑިއާގެ ފިލްމުތަކުގެ ތެރެއިން، 'ދަންގަލް' ފިޔަވައި އެހެން ފިލްމަކަށް ޕުޝްޕާ 2 އާ އަޅައިކިޔޭނެ ގޮތެއް ނުވެއެވެ. މި ފިލްމުގައި އަލޫ އަރުޖުން ދައްކުވައިދެނީ، ކޫލީއެއްގެ ގޮތުގައި މަސައްކަތްކޮށް، ފަހުން ސްމަގްލް ކުރާ މީހެއްގެ ރޯލެވެ.

'ޕުޝްޕާ 2: ދަ ރޫލް' ނިމުނީ 'ޕުޝްޕާ 3: ދަ ރޭމްޕޭޖް' އަންނާނެކަން ހާމަކުރަމުންނެވެ. ނަމަވެސް ޑައިރެކްޓަރު ސުކުމާރަށް ރާމް ޗަރަންއާއެކު ފިލްމެއް ހަދަން ޖެހިފައިވާއިރު، އަލޫ އަރުޖުން މިހާރު ދަނީ އެހެން ފިލްމެއްގެ މަސައްކަތް ކުރަމުންނެވެ. މިކަމުގެ ސަބަބުން، ޕުޝްޕާ 3 ހެދޭނެކަމާމެދު ގިނަ ބަޔަކު ޝައްކުކުރަމުން ދިޔައެވެ. ނަމަވެސް މިހާރުވަނީ އެކަން ކަށަވަރުވެފައެވެ.