ވިކްރާންޓް މަސީ އަދި ޝަނާޔާ ކަޕޫރު ތަމްސީލުކުރާ "އާންކޯން ކީ ގުސްތާކިޔާން"ގެ ޓްރެއިލާ އިއްޔެ ނެރެފިއެވެ.

2 މިނެޓާއި 39 ސިކުންތުގެ މި ޓްރެއިލާގައި ތިންކަން ލޯބީގެ ގުޅުމެއް ދައްކުވައިދެއެވެ. ރޮމޭންސާއި، ސިއްރުވެރިކަމާއި، ޖަޒުބާތުގެ ވަރުގަދަކަން އެކުލެވޭ މި ޓްރެއިލާއަށް ފޭނުން ވަނީ ތައުރީފު ކޮށްފައެވެ.

ޓްރެއިލާގައި ޖަހާންގެ ވިކްރާންޓް ފެނިގެންދާއިރު ޝަނާޔާ ތައާރަފުކޮށްދެނީ ސަބާގެ ގޮތުގައެވެ. އާދަޔާ ޚިލާފު ބައްދަލުވުމަކުން ފެށޭ މި ގުޅުން ވަރަށް އަވަހަށް ފުރިހަމަ ލޯތްބަކަށް ބަދަލުވެއެވެ. މި ދެ މީހުން ރީތި ތަންތަނަށް ދަތުރުކުރަމުންދާއިރު، އެ މީހުންގެ ގުޅުން ވަރުގަދަވަމުންދެއެވެ. މި ގުޅުމުގައި ހިނިތުންވުމާއި، ޖޯޝާއި، ޖަޒުބާތުގެ ނާޒުކުކަން ފެނިގެންދެއެވެ.

https://youtu.be/JbCwz-1OHWE

ނަމަވެސް ކުރިމަގުގައި ހުރަސްތަކެއް ހުރެއެވެ. ދިރިއުޅުމުގެ އުނދަގޫތަކާ ކުރިމަތިލާން ޖެހުމުން، މި ދެ މީހުންގެ ގުޅުން ހީނަރުވެއެވެ. ސަބާ އެހެން މީހަކާއެކު އާ ބާބެއް ފަށައިގަންނައިރު، ހިތާމަވެރި ޖަހާންގެ މަންޒަރުތަކުން ދޭހަވަނީ އެ ދެ މީހުންގެ ދެމެދުގައި ނުނިމި ހުރި ކަންތައްތަކެއް ހުރިކަމެވެ.

ޓްރެއިލާ ނިމެނީ ކްލިފްހޭންގަރަކުންނެވެ. ޖަހާނާއި ސަބާ އަނެއްކާވެސް ގުޅޭނެތޯ، ނުވަތަ އެ މީހުންގެ ލޯބީގެ ވާހަކައަކީ ރީތި ފެށުމަކާއި ފޫހިވެރި ނިމުމެއް އޮތް ވާހަކައެއްތޯ ސުވާލު އުފައްދައެވެ.

މި ފިލްމަކީ އެކްޓަރު ސަންޖޭ ކަޕޫރު އަދި މަހީޕް ކަޕޫރުގެ ދަރިފުޅު ޝަނާޔާ ކަޕޫރުގެ ފުރަތަމަ ފިލްމެވެ. މި ފިލްމު ޑައިރެކްޓްކޮށްފައިވަނީ ސަންތޯޝް ސިންގެވެ. ސްކްރިޕްޓް ލިޔެފައިވަނީ މަންސީ ބަގްލާ އެވެ. ޒީ ސްޓޫޑިއޯސް އަދި މިނީ ފިލްމްސް އިން ޕްރޮޑިއުސްކޮށްފައިވާ "އާންކޯން ކީ ގުސްތާކިޔާން" ތިއޭޓަރުތަކަށް ނެރެން މަޖެހިފައިވަނީ މިމަހުގެ 11 ގައެވެ.