ހޮންގްކޮންގުން ރާއްޖެއަށް ދަތުރުކުރުން މަނާކޮށް، އެ ގައުމަށް ދަތުރުކުރުން މަނާ ލިސްޓުގައި ރާއްޖެ ހިމަނައިފިއެވެ.

ހޮންކޮންގުން ފިޔަވަޅުތައް އަޅާފައި މިވަނީ ދުނިޔޭގައި ހަލުވިކަމާއެކު ފެތުރެމުންދާ ކޮވިޑު ބަލީގެ އާ ވޭރިއަންޓް، އޮމިކްރޯން" ރާއްޖެއިން ފެނިފައިވާތީއެވެ.

ކޮވިޑުގެ އާ ވޭރިއަންޓް، "އޮމިކްރޯން" ރާއްޖެއިން ފެނުނުކަން ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ރޭ އިއުލާންކޮށްފައިވާ އިރު، އާ ވޭރިއަންޓަށް ޕޮޒިޓިވްވެފައި ވަނީ ސައުތު އެފްރިކާއިން މިދިޔަ މަހުގެ 21 ވަނަ ދުވަހު ރާއްޖެ އައި ފަތުރުވެރިއެކެވެ.

ހޮންކޮންގުން ރާއްޖެއަށް ދަތުރުކުރުން މަނާކޮށް، އޭ ލިސްޓުގައި ރާއްޖެ ވަނީ ހިމަނައިފައެވެ. ރާއްޖޭގެ އިތުރުން އެ ލިސްޓުގައި ދެން ހިމެނެނީ ޓޫނީޝިއާ އާއި ސެނެގަލްއެވެ.

ވޭތުވެދިޔަ 21 ދުވަހުގެ ތެރޭގައި އެ ގައުމުތަކުގައި މަޑުކޮށްފައިވާ މީހުން އެ ގައުމަށް އެތެރެވުން މިމަހުގެ ނުވަވަނަ ދުވަހުން ފެށިގެން ވަނީ މަނާކޮށްފައެވެ.

އެ ގައުމުގެ ރައްޔިތުންނަށްވެސް ދަތުރުކުރެވޭނީ ވެކްސިން ފުރިހަމަކޮށްފައިވާ ނަމައެވެ. ނަމަވެސް އެމީހުން ވެސް 21 ދުވަހުގެ ކަރަންޓީނުގެ މުއްދަތެއް ފުރިހަމަކުރަން ޖެހޭނެއެވެ. އަދި އެ މުއްދަތުގައި ހަ ފަހަރަކު ޓެސްޓު ކުރާނެއެވެ.

ދެކުނު އެފްރިކާގެ ގައުމަކުން ފުރަތަމަ ފެނުނު އެ ވޭރިއަންޓް މިހާރު ވަނީ ދިވެހީން އާންމުކޮށް ގޮސް އުޅޭ އިންޑިއާ އާއި ސްރީ ލަންކާ އަދި މެލޭޝިއާ އިން ވެސް ފެނިފައެވެ. އެ ވޭރިއަންޓާ ގުޅިގެން ދުނިޔޭގެ ގިނަ ގައުމުތަކުން ވަނީ ބޯޑަރުތައް ބަންދުކުރަން ވެސް ފަށައިފައެވެ.

ދުނިޔޭގެ އެކި ގައުމުތަކުގައި ހަލުވިކަމާއެކު އޮމިކްރޯން ވޭރިއަންޓް ފެތުރެން ފެށުމާއެކު މިދިޔަ މަހުގެ 28 ވަނަ ދުވަހުން ފެށިގެން ރާއްޖެއިން ވެސް ވަނީ ފިޔަވަޅުތަކެއް އަޅަން ފަށައިފައެވެ. އެގޮތުން އެ ދުވަހުން ފެށިގެން ދިވެހިންނާއި ވޯކްޕާމިޓް އޮންނަ މީހުން ނުހިމެނޭ ގޮތަށް، ދެކުނު އެފްރިކާ، ނެމީބިއާ، މޮޒަންބީކް، ލެސޯތޯ، ބޮޓްސްވާނާ، ޒިންބާބްވޭ އަދި އެސްވަޓީނީން ރާއްޖެއަށް މީހުން އެތެރެވުން ވަނީ މަނާކޮށްފައެވެ. އަދި އޭގެ ތެރޭގައި ރާއްޖެ އައުމުގެ 14 ދުވަސްކުރިން އެ ގައުމުތަކުގައި އުޅެފައިވާ މީހުންނާއި 12 ގަޑިއިރަށްވުރެ ގިނަ އިރު، ޓްރާންސިޓްވެފައިވާ މީހުން ހިމެނެއެވެ.

ހެލްތު އިމަޖެންސީ އޮޕަރޭޝަންސް ސެންޓަރު (އެޗްއީއޯސީ)ގެ ތަރުޖަމާނު ޑރ. ނަޒްލާ ރަފީގު މީގެ ކުރިން ވިދާޅުވެފައިވަނީ ބަލި ފެނުނު ދެކުނު އެފްރިކާގެ ހަތް ގައުމަކުން ރާއްޖެ އައުން މަނާކުރި ނަމަވެސް ރާއްޖެއަށް ބަލި އައުން ނުހުއްޓުވޭނެ ކަމަށާއި ނަމަވެސް ބަލި ފެތުރުން ލަސް ކުރެވި ކޮންޓްރޯލް ކުރެވިދާނެ ކަމަށެވެ. އަދި އާ ވޭރިއަންޓަކީ ޑެލްޓާ ވޭރިއެންޓަށްވުރެ ބޮޑަށް ބަލި ޖައްސާ މިންވަރު އިތުރުކުރާ ވޭރިއެންޓެއް ކަމަށާއި މިއީ ބަލި ޖެހިފައި ތިބި މިހުންނަށް ތަކުރާރުކޮށްވެސް ބަލި ފެތުރިދާ ފަދަ ވޭރިއެންޓެއް ކަމަށް ވިދާޅުވިއެވެ.

އާ ވޭރިއަންޓު ފެތުރުން ކުޑަކުރުމުގެ ގޮތުން ފިޔަވަޅުތައް އިތުރަށް ހަރުދަނާ ކުރާނެ ކަމަށާއި އެގޮތުން ރާއްޖެ އަންނަ ފަތުރުވެރިން ޕީސީއާރު ޓެސްޓުތައް ހަދާފައި ހުރިތޯ ބަލައި ވެކްސިން ފުރިހަމަކޮށްފައިވާ މިންވަރު ބެލުން އިތުރަށް ހަރުދަނާ ކުރާނެ ކަމަށް ޑރ. ނަޒްލާ ވަނީ ވިދާޅުވެފައެވެ. ރާއްޖެ އައުން މަނާކުރި ގައުމުތަކަށް ރާއްޖެއަށް ދަތުރުކުރި މީހުން ހޯދައި ޓެސްޓުކުރަން ނިންމާފައިވާ ކަމަށްވެސް އޭނާ ވިދާޅުވިއެވެ.