މަސްވެރިންގެ ދުވަސް: ބޮޑުކަންނެލި މަސްވެރިންގެ ހައްގުގައި މަސައްކަތް ކުރާ، ބޮޑުކަންނެލި މަސްވެރިންގެ ޔޫނިއަން (ބީކޭއެމްޔޫ)ގެ އިފްތިތާހީ ޖަލްސާ މިއަދު ހެނދުނު ގުޅީފަޅުތެރޭގައި ވަނީ ބާއްވައިފައެވެ. މި ޖަލްސާގައި ކަންނެލި މަސްވެރިކަން ކުރާ 70 އަށްވުރެ ގިނަ ދޯނި ބައިވެރިވެ، ކަނޑުމަތީގައި މަސްވެރިންގެ އެއްބައިވަންތަކަން ވަނީ ދައްކާލައިފައެވެ. މި ޖަލްސާގައި ބޮޑުކަންނެލި މަސްވެރިކަން ކުރާ މަސްވެރީން ވަނީ އެމީހުންގެ ޝުއޫރުތައް ބަންޑުންކޮށްލައިފައެވެ. އެގޮތުން އިންތިހާބުތަކާއި ދިމާކޮށް މަސްވެރިންނަށް އެތައް ހުވަފެންތަކެއް ދައްކަމުންދިޔަ ނަމަވެސް އެއިން އެއްވެސް ހުވަފެނެއްގައި ކުލަ ޖެހޭތަނެއް ނުފެންނަ ކަމަށް މަސްވެރިން ފާހަގަކުރިއެވެ. ޖަލްސާއަށްފަހު މަސްވެރިންގެ ޝުއޫރުތައް ބެނާތަކުގައި ލިޔެ މަސްދޯނިތަކުގައި ހަރުކޮށް، މަސްވެރިން ވަނީ އެ ދޯނިތަކުގައި މާލެ ވަށައި ދުއްވައި އެމީހުންގެ "ސައިޒު" ދައްކާލައިފައެވެ.