ޕޭން އެމެރިކަން ހެލްތު އޯގަނައިޒޭޝަނުން ނެރުނު ނިންމުމަކާ ގުޅިގެން، 26 އަހަރަށްފަހު އެމެރިކާއަށް މީސަލްސް ބަލި ނައްތާލެވިފައިވާ ގައުމެއްގެ ރަސްމީ ދަރަޖަ ގެއްލިއްޖެއެވެ.
މި ދަރަޖަ ގެއްލުނީ އެމެރިކާގެ އެކި ސަރަހައްދުތަކުގައި މީސަލްސް ބަލި ފެތުރެމުންދާތާ 12 މަހަށްވުރެ ގިނަ ދުވަސްވެފައިވާތީއެވެ. ދުނިޔޭގެ ސިއްހަތު ޖަމިއްޔާގެ މިންގަނޑުތަކުގައިވާ ގޮތުން، ގައުމެއްގައި އެއް ވައިރަހެއް މެދުކެނޑުމެއްނެތި އެއް އަހަރު ދުވަހަށްވުރެ ދިގު މުއްދަތަކަށް ފެތުރެމުންދާނަމަ، އެ ގައުމަކުން އެ ބަލި ނައްތާލެވިފައިވާ ދަރަޖަ އުވަައިލެވޭނެއެވެ.
2026 ވަނަ އަހަރުގެ މިހާތަނަށް އެމެރިކާއިން 5,400 އަށްވުރެ ގިނަ މީސަލްސް މައްސަލަ ވަނީ ރިޕޯޓުކޮށްފައެވެ. މިއީ 1991 ވަނަ އަހަރަށްފަހު އެ ގައުމުގައި އެއް އަހަރު ތެރޭގައި މި ބަލި މިހާ ބޮޑަށް ފެތުރުނު ފުރަތަމަ ފަހަރެވެ.
ސިއްހީ އިދާރާތަކުން ހާމަކުރާ ގޮތުގައި ބަލިޖެހުނު މީހުންގެ ތެރެއިން 96 ޕަސެންޓް މީހުންނަކީ ރައްކާތެރިކަމުގެ ވެކްސިން ފުރިހަމަކޮށްފައި ނުވާ މީހުންނެވެ.
އެމެރިކާގެ ސެންޓާސް ފޯ ޑިޒީޒް ކޮންޓްރޯލް އެންޑް ޕްރިވެންޝަނުން ބުނާ ގޮތުގައި، މީސަލްސް ވެކްސިން ދޭ މިންވަރު ދަށްވުމަކީ ބަލި ފެތުރުމަށް މެދުވެރިވި މައިގަނޑު ސަބަބެވެ. ޚާއްސަކޮށް ކުޑަކުދިންގެ މެދުގައި ވެކްސިން ދިނުމުގެ އިންސައްތަ ފާއިތުވި އަހަރުތަކުގައި ވަނީ ދަށްވެފައެވެ.
ސިއްހީ މާހިރުން ބަޔާންކުރާ ގޮތުގައި މި ދަރަޖަ އަލުން ހޯދުމަށްޓަކައި ވެކްސިން ދިނުމުގެ ހޭލުންތެރިކަން އިތުރުކުރަން ޖެހެއެވެ. އަދި ބަލި ފެތުރުން ހުއްޓުވުމަށް ސަރަހައްދީ ސިއްހީ އިދާރާތަކާ ގުޅިގެން ޚާއްސަ ފިޔަވަޅުތަކެއް އަޅަންޖެހޭނެއެވެ.
ކޮމެންޓް