ދިވެހި ފުލުހުންގެ ހިދުމަތުގެ ރަސްމީ ތަރުޖަމާނުގެ މަގާމަށް އިންސްޕެކްޓާ އޮފް ޕޮލިސް އަހްމަދު ޝިޔާމް، ހަމަޖައްސއިފިކަމަށް ފުލުހުންގެ ހިދުމަތުން ބުނެފިއެވެ.

އެ ހިދުމަތުން މިއަދު ބުނީ ޝިޔާމް އެ މަގާމަށް ހަމަޖެއްސީ މިއަދުން ފެށިގެން ކަމަށެވެ.

ދިވެހި ފުލުހުންގެ ހިދުމަތުން ބުނީ، ޝިޔާމް މި މަގާމާ ހަވާލުވެވަޑައިގަތީ، މީގެ ކުރިން ތަރުޖަމާނުގެ މަސްއޫލިއްޔަތު އަދާކުރެއްވި ސުޕްރިންޓެންޑެންޓް އޮފް ޕޮލިސް އާރިފްގެ ބަދަލުގައި ކަމަށެވެ.

މި ބަދަލާ ގުޅިގެން، ދިވެހި ފުލުހުންގެ ހިދުމަތުގެ ފަރާތުން މީޑިއާތަކަށް މައުލޫމާތު ދެއްވުމާއި، އާންމު ހޭލުންތެރިކަން އިތުރުކުރުމުގެ މުއާމަލާތްތަކުގައި އެންމެ އިސްކޮށް ދެން ހަރަކާތްތެރިވެވަޑައިގަންނަވާނީ އިންސްޕެކްޓާ އޮފް ޕޮލިސް އަހްމަދު ޝިޔާމް ކަމަށްވެސް ބުނެފައިވެއެވެ.

މީގެ ކުރިންވެސް ޝީޔާމް ވަނީ ފުލުހުންގެ މީޑިއާގައި އިސްކޮށް މަސައްކަތް ކުރައްވއިފައެވެ.

ނަމަވެސް ފަހެއް އޯގަސްޓް 2001 ވަނަ އަހަރުން ފެށިގެން ފުލުހުންގެ ވަޒީފާ އަދާ ކުރައްވަމުންގޮސް އިނިސްޕެކްޓާ އޮފް ޕޮލިސްގެ މަގާމުގައި ހުންނަވަނިކޮށް، 26 މެއި 2014 ގައި ވަޒީފާއިން ވަކިކުރިއެވެ.

އެއީ ނޯތް ސެންޓްރަލް ޕޮލިސް ޑީވިޝަން ކޮމާންޑަރެއްގެ ގޮތުގައި ހުންނަވައި މަގާމުގެ ނުފޫޒު ބޭނުން ބޭނުންކޮށްގެން ގާނޫނާއި ގަވާއިދާ ހިލާފަށް އަމަލުތަކެއް ކޮށްފައިވާ ކަަމށް ތުހުމަތު ކޮށެވެ.

އެ މައްސަލައާ ގުޅިގެން، އޭނާ ވަކިކޮށްފައިވަނީ، ވަޒީފާއިން ވަކިކުރުމުގައި އަމަލުކުރަންޖެހޭ އިޖުރާއާތުތަކާއި އުސޫލުތަކާއި އަދި ގަވާއިދުތަކާ ހިލާފަށް ކަމަށް ކަނޑައަޅައި ދިނުމަށާއި ވަޒީފާއިން ވަކިކުރި ދުވަހުން ފެށިގެން ވަޒީފާއަށް އަނބުރާ ނުކުތުމާ ހަމައަށް ލިބެންޖެހޭ މުސާރަ އާއި އިނާޔަތްތަކުގެ ގޮތުގައި 2019 ގެ މެއި މަހުގެ ނިޔަލަށް ލިބެންޖެހޭ 1.4 މިލިޔަނަށްވުރެ ހޯދުމަށް އެދި ޝިޔާމްގެ ފަރާތުން ސިވިލް ކޯޓަށް މައްސަލަ ހުށަހެޅިއެވެ.

ސިވިލް ކޯޓުން މި މައްސަލަ ބަލައި 2019 ވަނަ އަހަރު ހުކުމް ކުރީ، ފުލުހުންގެ ވަޒީފާއިން ޝިޔާމް ވަކިކޮށްފައި ވަނީ ދިވެހި ފުލުހުންގެ ކޯޑް އޮފް ކޮންޑަކްޓްގެ ހަ މާއްދާއަކާ ހިލާފު އަމަލުތަކެއް ކޮށްފައިވާ ކަމަށް އިދާރީ މިންގަނޑުން ފުލުހުންގެ ޑިސިޕްލިނަރީ ބޯޑަށް ސާބިތުވެގެން، ޑިސިޕްލިނަރީ އަދި އިދާރީ ކުށްތަކާއި އެކުށްތަކަށް އަދަބުދިނުމާބެހޭ ގަވާއިދުގެ ދަށުންކަން، ހުށަހެޅިފައިވާ ލިޔުންތަކުން ޝަރީއަތަށް ސާބިތުވާ ކަމަށެވެ.

އެހެންކަމުން މި މައްސަލައިގައި ޝިޔާމް އެދިފައިވާ ގޮތަށް، މޯލްޑިވްސް ޕޮލިސް ސާވިސްގައި ޝިޔާމް އަދާކުރަމުން ދިޔަ ވަޒީފާ އަނބުރާ އިޔާދަ ކޮށްދިނުމަށާއި ވަޒީފާއިން ވަކިކުރި ދުވަހުން ފެށިގެން މުސާރަ އާއި އިނާޔަތްތައް ދިނުމަށް، މޯލްޑިވްސް ޕޮލިސް ސާވިސްގެ މައްޗަށް އަންގައި އަމުރުކުރާނެ ތަނެއް ނެތް ކަމަށެވެ.

މި ހުކުމާ މެދު ހިތްހަމަ ނުޖެހިން ޝިޔާމުގެ ފަރާތުން މި މައްސަލަ ހައިކޯޓުގައި އިސްތިއުނާފު ކުރިއެވެ.

މި މައްސަލަ ބެލުމަށްފަހު މިދިޔަ އެޕްރީލް މަހުގެ 16 ގައި ހައިކޯޓުން ހުކުމްކުރީ، ސިވިލްކޯޓުން ކުރި ހުކުމް ބާތިލް ކަމަށެވެ. އަދި ފުލުހުންގެ ވަޒީފާއިން ޝިޔާމް ވަކިކުރުމަށް ޑިސިޕްލިނަރީ ބޯޑުން ނިންމި ނިންމުމަކީ ބާތިލް ނިންމުމެއް ކަމަށް ކަނޑައަޅައި، ޝިޔާމަކީ އެއްވެސް ހާލެއްގައި ވަޒީފާއިން ވަކިވެފައިވާ މީހެއްކަމަށް ނުބެލުމަށާއި، ވަޒީފާއަށް އަނބުރާ ނިކުތުމާ ހަމައަށް އޭނާއަށް ލިބެންޖެހޭ މުސާރަ އާއި އިނާޔަތްތައް ދިނުމަށް އަންގާ ކަމަށްވެސް ހުކުމްކުރިއެވެ.

ހައިކޯޓުގެ ހުކުމާ ގުޅިގެން 12 އަހަރަށްފަހު އަލުން ޝިޔާމަށް ވަނީ ފުލުހުންގެ ވަޒީފާ ދީފައެވެ.