ޝަރުއީ ކޯޓުތަކަށް ހުށަހަޅާ މައްސަލަތަކުގައި ގޮތް ކަނޑައެޅުމުގެ އިހުތިޔާރު އާޓިފިޝަލް އިންޓެލިޖެންސް (އޭއައި)އަށް ދޫކޮށްލުމަކީ ކުރެވޭނެ ކަމެއް ނޫން ކަމަށް ރާއްޖޭގެ އުއްތަމަ ފަނޑިޔާރު އަބްދުއްޣަނީ މުހައްމަދު ވިދާޅުވެއްޖެއެވެ.

އުޒްބެކިސްތާނުގެ، ސަމަރުގަންދުގައި އިއްޔެ ބޭއްވި އެސޯސިއޭޝަން އޮފް އޭޝިއަން ކޮންސްޓިޓިއުޝަނަލް ކޯޓްސް އެންޑް އިކުއިވަލަންޓް އިންސްޓިޓިއުޝަންސް (އޭއޭސީސީ) ގެ ހަތް ވަނަ ކޮންގްރެސްގައި އުއްތަމަ ފަނޑިޔާރު ވަނީ އަދުލު އިންސާފު ގާއިމުކުރުމުގެ ފެންވަރު މަތިކޮށް، އަވަސް އިންސާފެއް ހޯދައިދިނުމުގައި ޑިޖިޓަލް ޓެކްނޮލޮޖީގެ ދައުރާ ގުޅޭގޮތުން ތަގުރީރެއް ދެއްވައިފައެވެ.

އުއްތަމަ ފަނޑިޔާރު ވިދާޅުވީ ޓެކްނޮލޮޖީ ކިތަންމެ ކުރިއަރައި ދިޔަ ނަމަވެސް، ފަނޑިޔާރުންގެ ޒިންމާ އަލްގޯރިދަމްތަކަކަށް ދޫކޮށްލައިގެން ނުވާނެ ކަމަށެވެ. އޭގެ ބަދަލުގައި ޝަރުއީ ދާއިރާތަކުން އިސްކަންދޭންވާނީ އޭއައި އަކީ މަސައްކަތްތަކަށް އެހީތެރިވެދޭ ވަސީލަތެއްގެ ގޮތުގައި ބޭނުން ކުރުމަށް ކަމަށް އުއްތަމަ ފަނޑިޔާރު ވިދާޅުވިއެވެ.

ރާއްޖޭގެ ކޯޓުތަކުގައި މައްސަލަތައް ނުނިމި ލަސްވާ ސަބަބުތައް ދެނެގަތުމަށާއި، ޝަރީއަތްތައް އަވަސްކުރުމަށް ޒަމާނީ ޓެކްނޮލޮޖީގެ އެހީތެރިކަން ހޯދަމުންދާ ގޮތްތަކަށް ބަލަން ޖެހޭ ކަމަށް އެ މަނިކުފާނު ވިދާޅުވިއެވެ. އެގޮތުން، ރާއްޖޭގެ ޝަރުއީ ނިޒާމުގެ ތެރޭގައި ފުރިހަމަ ކޭސް މެނޭޖްމަންޓް ސިސްޓަމެއް ގާއިމުކުރުމަކީ މި ތަސައްވުރުގެ މުހިންމު ލަނޑުދަނޑިއެއް ކަމަށް އުއްތަމަ ފަނޑިޔާރު ވިދާޅުވިއެވެ.

އެހެން ގައުމުތަކުގެ އުއްތަމަ ފަނޑިޔާރުންނާއި ދުސްތޫރީ ކޯޓުތަކުގެ އިސްވެރިންނާ އެކު ބޭއްވި މުހިންމު ބައްދަލުވުންތަކެއްގައިވެސް އުއްތަމަ ފަނޑިޔާރު ވަނީ ބައިވެރިވެވަޑައިގެންފައެވެ.

މި ކޮންގްރެސް ނިންމާލާފައި ވަނީ ދުސްތޫރީ ކޯޓުތަކުގައި ޒިންމާދާރުކަމާ އެކު އޭއައި ބޭނުންކުރުމާ ބެހޭގޮތުން އެކުލަވާލި "ސަމަރުގަންދު ޑިކްލަރޭޝަން" ފާސްކުރުމަށް ފަހުގައެވެ.